جو رائع فى البطانة (أم هبج) [الأرشيف] - شبكة الجعليين

مشاهدة النسخة كاملة : جو رائع فى البطانة (أم هبج)

المك جدنا

22-10-2008, 10:33 PM

الليلة السحاب فوق البطانة منيِل
وولع جمرة القلب القبيل متحيل
طريت ست الصبا ال ما جالسوها العيٍل
جمالها يفوق على قدر العقل مايخٍيل
*****
حرقوصك نتل جاب من هواك دعاش
خيم فوقك الليلى ومكاييل هــاش
اتعتم سماك أسقى الـ أكانوا عطاش
عربك تالتة ..واقفين..لابرش لافراش
*****
ركزن لك بروقك عكلن قيزانك
انهلن بشايرك واستعد عربانك
اتدلقن سحابك نع فوق وديانك
بى فرحة وطرب دقو الرباب عربانك
*****
أضحو مبسطين شاكرين كريما حى
سندوا الواقعة حلبوا وشربوا من النى
اتملى التبوب مصعن حمير الرى
قاموا يعافرو فى الشقق الرباطن نى
*****
أخدوا الهجسة لى الكيفة الشميشا ضحي
يات من كان حلف قال الكرامة علي
أم ريد لولـت القــلاى ,جميلة الزى
أرياح الـــدمك غمرن ربوع الحى

الشنقيطي

23-10-2008, 01:58 AM

سودانية

18-11-2008, 06:09 PM

مشكور يا مك على الشعر الجميل

المك جدنا

18-11-2008, 08:20 PM

الشنقيطى ,,, سودانية ,,, مشكورين على المرور والطلة .

المك جدنا

18-11-2008, 09:06 PM

نســيمك يا ام هبج شفخانة المتألم
حُقًنٍك سيف وسلفٍك راس حصان متكلم
أكان كتَم سمـاكٍ وليلك أمسى مضلٍم
مابشق بيكى طالب الجامعة المتـعلم

******
بت المن رشاشن بالبطانة اتهوًن
وقفن فوق علو ومن الأنيس اٍتحوَن
وآ أسفايا من الكل يوم بتــلون
شهدان موسى من فرو المنازل ضوَن

******
بت اللا زمان نطحت فيافى وصَي
يجادعن بالبغو قش البطانة الني
دغسات العيون الما بيرد الحى
لي ليمك شحد ربى ورفعت اٍيدي

******
مبسوطة البطانة وقاستا النقاعة
دار خبر الرحيل اتباشروبو جماعة
قاصداك اريل الفودة البضوى شعاعا
أحمت عينى تغمد عقربا اللطـاعة

المك جدنا

14-07-2009, 10:55 PM

ببكى عليكى يا بطانة اب على وحسان

وببكى عليكى من يومو الرمو الخزان

حكموك الاجانب لا ابل لا ضان

و ختوك فى الدفاتر بى قلب فرحان

بت ابوها

15-07-2009, 05:30 PM

مشكور جدا علي الابيات الرائعة:oh:

<object width="425" height="344"><param name="movie" value="http://www.youtube.com/v/qfogbSmbtFY&hl=en&fs=1&"></param><param name="allowFullScreen" value="true"></param><param name="allowscriptaccess" value="always"></param><embed src="http://www.youtube.com/v/qfogbSmbtFY&hl=en&fs=1&" type="application/x-shockwave-flash" allowscriptaccess="always" allowfullscreen="true" width="425" height="344"></embed></object>

المك جدنا

17-07-2009, 10:03 AM

شكرا بت ابوها على المرور الجميل المشبع برائحة الدعاش , وعطور الباشندى المنتج فى سهول البطانة الندية .

وشوفى هذا الابداع مع الاخوة الفرجونى والامين وعاصم البنا فى البطانة : http://www.youtube.com/watch?v=PWDxqXsV1dEم

بت ابوها

25-07-2009, 05:31 PM

ابداع جد

وهذا جمال البطانة لا يفارقها ابدا

هييع فرتاق الصفوف العامرة

25-07-2009, 05:57 PM

مشكور يا مك على الشعر الجميل

ود البحيري

30-07-2009, 05:10 PM

جدنا هاك البيت
من ود عمنا طه ود تاشلهمة البطحاني
القبلي في كوع الشمال براقك ماســـك<?xml:namespace prefix = o ns = "urn:schemas-microsoft-com:office:office" /><o:p></o:p>
وقشط سدرو في عامر سحابو وساقك<o:p></o:p>
والسيل دهك تبونك قرنن شــــــــقاقك<o:p></o:p>
والضايق نشوقك حار عليهو فـــراقك<o:p></o:p>

ودبلة

30-07-2009, 07:59 PM

:eh_s(17):صح السانك

ذكرتنا المطر الخريف والدعاش ونسايم الليل0( البطانة )

يعطيك الف عافيه

المك جدنا

04-08-2009, 07:55 AM

ود سند قال فى البطانة :

انفجرت تعولك وقاسك الوبال

ردعك مغرباوى وهجعة برقك شال

عربك شالوا فوق زملا مُضى وفيال

مع الحمريب دعاشك جابلو ريحة نال

العكادي

04-08-2009, 08:52 AM

نعم فقد سمعنا كثير علي جو البطانة الجميل لدرجة بقت في خاطري ومستني اقرب لحظة ونسافر ونشوف زي ما بقولوا البشوف ما زي البيسمع

المك جدنا

04-08-2009, 08:54 AM

ودعلى شاعر البطانة قال :

قليعات الزرق صبحن تعولن ماطرة
محريبن طلق ريحة الفلير والباترة
ان دورتهن فوق ام محاجنن قاطرة
تلقى العافية من غير بنسلين ودكاترة

*** ***
وقيل فيها :

الخد المعطر بالفلير والباترة
زيادة عليه نسمات البطانة الماطرة
معشوقى البريدو وريدتى ليه مواترة
دكتورى وطبيب نفسى وجروحى القاطرة

المك جدنا

04-08-2009, 09:17 AM

وقال شاعرها :

شيل براق سحابك يا المرية يختٍف
مايع عفرتٍك جارى وصبيبو يهتف
يا الريٍك من الهبَاك مليهو تقٍطف
نيلك زاق وتبرك يا المرية يكتف

*** ***
اتكجرن ضهاريك وهمبريبك برَد
سون عجة النوق الجناهو مفرَد
ابوكتيرة انملأ وتباب بلول ازرَد
قمرى نعيمة فوق سنط الحفاير غرد

*** ***
تعول النترة صحَن والبهايم عشن
البقر انملن حفور قلوعهن وبشن
الضان جاب مخاد وألبل جمالهن رشن
البلدات زرعناهن خفيف وانحشن

ود البحيري

04-08-2009, 09:29 AM

تسلم جدنا المك
وهاك من عمنا البطحاني طه ود الشلهمة في خريف البطانة
طه ود الشلهمة إشتهر بوصف البطانة وهومجيد
القبلي في كوع الشمال براقك ماســـك<?xml:namespace prefix = o ns = "urn:schemas-microsoft-com:office:office" /><o:p></o:p>
وقشط سدرو في عامر سحابو وساقك<o:p></o:p>
والسيل دهك تبونك قرنن شــــــــقاقك<o:p></o:p>
والضايق نشوقك حار عليهو فـــراقك<o:p></o:p>
<o:p> </o:p>
<o:p> </o:p>
بعد دور الجفاف قـــام عفرتك متباري<o:p></o:p>
وسحابك نيلتو زرقة وبرقك إلفح فاري<o:p></o:p>
وإتكسا بالخدار وجــــهك الكان عاري<o:p></o:p>
وإنعقدن رواينك يا أم نداياً تــــــــاري<o:p></o:p>
<o:p> </o:p>
<o:p> </o:p>
مبسوطة البطانـــــــــــة إتنعمــت قدام<o:p></o:p>
شابع قشها وقاسا المـــــــــزرقن وقام<o:p></o:p>
أخــــــــــلو الدكة لا مخبــر ولا حوام<o:p></o:p>
ولي فيهن صديق روحاً ملاني غرام

المك جدنا

24-09-2009, 09:47 AM

تسلم ود البحيرى وشكرا على كلمات عمنا طه ود الشلهمة الرائعة ودعواتك لينا وانت فى بلد المسجد الحرام مكة المكرمة .

عمرالخواض احمدمحمد سمساعة

24-09-2009, 12:24 PM

شكرا الجبلابى انا دائما اذهب للبطانة كل خريف واقعد شهر وشهر ونص وكل المناطق التى يذكرها الشعراء فى مساديرن بعرفا و جيت من البطانة قبل العيد بى يومين رغم انو كنا صايمين لكن على الطلاق يا مك لو شفتها فى الخريف اجمل من دوحة العرب واجمل من صلالة يازول صلالة شنو وماليزيا شنو دى جنة عديل ولو ما ربنا قال الجنة فيها مالا عين رأت ولا اذن سمعت .الزول يقول يوم القيامة الجنة تكون هنا فى (الباساى)

المك جدنا

09-10-2009, 10:12 PM

شكرا اخوى عمر على المرور وتحياتى لولدنا البطل الشايل البندقية ربنا يحفظه وتقبل تحيات ناس عباس التنقر وكل ناس قوز الحاج وناس ديم القراى المعانا .

المك جدنا

09-10-2009, 10:14 PM

الخريف الجاى معاكم ان شاء الكريم ياعمر فى البطانة

المك جدنا

09-10-2009, 10:42 PM

وقيل فى البطانة

يا المردا الكواتلك قشهــــــن متماحــــــــل
شال براقك الهــــــجعة وسحابك راحــــــل
فيك ود عُنــــز الصى العيونو كواحــــــــل
ضامر هاف و عالى ارداف وايضا فى البدن متناحل

المك جدنا

09-10-2009, 10:49 PM

وقيل فيها :

يا المردا التلينى مع الجمال الخبن
شال براقك الهجعة وسماك اتغضبن
اخضرت وطاطك وجوالبك كبـــــن
خضر عسينك شر تبرك ولبن

نار الدرين

10-11-2009, 01:05 PM

الاخوة الكرام
اولاً سلام مطبق ليكم واحد واحد واعتذر لغيابى عن هذا المنتدى الرائع لمدة طويلة. ولكم كل العتبى حتى ترضو.

اليكم هذه الروائع من اب هبج:

براق المشابك لم سحابو وكرا
اخد الليل وباكر فوق شريط جرا
السيل والغرق منع السعية الفرا
حنتوت ام هبج لبس العمم وانشرا

العجمية من بحر المحيط إنجرت
يومين بالسيول قارعة النعم ما فرت
بطانة اب سن رمت توب الحزن وانسرت
البل حاشن الكترة وعجوفهن درت

رزاها الضل واسياد البهايم ساقو
أرعد ودودى فوق سهم العنابطة زراقو
يا مولاى ارحم ها العباد الضاقو
بالرهب المتل جلد ام عوينة دفاقو

الليلة السحاب على البطانة اتزحم
بخت الماخد ام ضرعاً مبين ولحم
ابشرى ان شاء الله صنقور العقيد اترحم
الهنقيلة تنتهى والحبار اتوحم

ثم التحيات الزاكيات لكم ولصاحب البوست بلا حدود

عبد المنعم

20-02-2010, 01:25 AM

التحية لك جدنا المك - التحية لكل المتداخلين جميعا بلا حدود شوية ونسة ليكم : فى جولة فى سهول البطانة والدنيا خريف ،وقد كست الخضرة الأرض على مد البصر والجو غيم والسحاب مزرقن ،وسحاب الهرف زى دخان الجبخانة والدنيا صباح وطه الضرير والطيب ودضحوية يمتطون إبلهم فى طريقهما الى( أبودليق ) تأمل ود ضحوية ذلك المنظر كأنه يريد أن يقول : براق المشابك لملم سحابو وتراا * أخد الليل وباكر فوق شريط جرا * السيل والغرق منع السعية الفرا * حنتوت أم هبج لبس العمم وإنشرا * والحنتوت عشب أخضر ذو زهرة بيضاء ينمو فى الخريف وأم هبج هى كنية لأرض البطانة شبه الأرض كأنها تلبس العمم من الفرح وهوتشبيه بليغ جدا ، وبعد طول المشوار أناخا إبلهم لياخذوا قسطا من الراحة فى ذلك المكان ذو الخضرة العجيبة . بدأ طه الضرير يداعب فى اللاب تب بال WIRELESSوكان يبحث عن رد من محبوبته فوجد ردا قصيرا SMS فأنشد يقول :

شديت الPENTIUM وأصبح يبرطع جايط
والINERNET دقش قلبتو صايت صايت
على أم شعرا حلال ماطولنوا وسايط
وعطشان الغرام مابيرونوا 2K BITE

رد عليه الطيب ود ضحويه قائلا :

الفيك ياطه VIRUS والله الكريم الشافى
ومافيدك طبيب حتى أم بقيت MCAFEE
غير لخلوخة الهرفة أم قليبا جافى
وأركز لى التجييك ياطه OPTIONS مافى

إستسلم طه وقال :

إيميلك وصل زود عل الهم
والفكر إنشغل والRAMعلي والROM
ياالصلاح جميع أنا والحبيب نتلم
دعوات الصلاح جميع DOT.COM

الليلة أم شلوخ لاقيتا عند الCHAT
والVIRUS ضرب قلبى ومحى الفايلات
يوم شافنى الفقير البكتب البخرات
قالDEFRAGمابفيد أحسن TO REFORMAT

بعد ماكت فقير بخراتى WORD و EXCEL
دقشتنى أم رشوم خلت (درايفى ) إختل
القلب الكان زمان MOTHER BOARD و INTEL
بقى CHIPSET رخييص كل ماربطو إنحل

الخبر الأكيد الليلة جابو الYAHOO
وقال ست البنات إيميلنا مى طارياهو
ست القوام HARD WARE نظامو براهو
غرامك VIRUS الهجعة - البقرض الجاهو

ودمتم أحبابى

المك جدنا

20-02-2010, 10:19 AM

ا

الفيك ياطه VIRUS والله الكريم الشافى
ومافيدك طبيب حتى أم بقيت MCAFEE
غير لخلوخة الهرفة أم قليبا جافى
وأركز لى التجييك ياطه OPTIONS مافى

إستسلم طه وقال :

إيميلك وصل زود عل الهم
والفكر إنشغل والRAMعلي والROM
ياالصلاح جميع أنا والحبيب نتلم
دعوات الصلاح جميع DOT.COM

الليلة أم شلوخ لاقيتا عند الCHAT
والVIRUS ضرب قلبى ومحى الفايلات
يوم شافنى الفقير البكتب البخرات
قالDEFRAGمابفيد أحسن TO REFORMAT

الخبر الأكيد الليلة جابو الYAHOO
وقال ست البنات إيميلنا مى طارياهو
ست القوام HARD WARE نظامو براهو
غرامك VIRUS الهجعة - البقرض الجاهو

ودمتم أحبابى

والله ديل همباتة ديجتال هههههه ههههههه :D :D :D
الله يجازى محنك يا اخوى عبد المنعم وشكرا على عصرنة
شعر اهلنا الغبش الاشاوس .

عصوومي

21-02-2010, 03:29 PM

لك الشكر على نشر هذه الكلمات