صدر الوصول - قصيدة من ديوان الحب في عيون سودانية-

[مهيرة الوطن المتألق]

صدر الوصول
ما شبعته منك يا بلد..ويادوبى بملاها العيون ..
من حسنك الما ليه حد
القى المقادير بالجبر ..سايقانى لى غربه ونكد
….يا…بلد..
انا عايزه املى عيونى فيك..انا بلقى فيك عيونى مد
ياخدنى لى عمقك واشوف شوقى فى حشاك سكن رقد…
يا…بلد..
شبابيكك مشبكه فى شبك شوفى ..
واشجارك وازهارك ..تهفهف لما نسمه تميل
واحس بى غربتى وخوفى …
ونيلك كلما حلقته …ينساب يسيل حسرتى واسفى
ترابك يشابى لى ارجع..صراع بين عشقك وظروفى..
نسايمك رغم ضغط الجو..تصر على هزى وارجافى..
على خطوطك ..بحس بأنى زول مهووس..
بحبك وعشقك الصوفى ..
وصوتك سامعه نادانى ..يهز الرعشه فى حروفى ..
اشوفك بى عيونى براى ..وافتش ليك فى جواى ..
والقاك رؤيا بتجمل رؤاها الرؤية فى شوفى..
يا..بلد..
بشوف نيلك..واحب نيلك ..
واهمس ليه واقول يانيل..
ارتفعنا رغم اننا فيك هوينا..
لا نسيناك..ولا جفيناك..ولا غير حسنك هوينا
يابلــــــــد…
كل شئ فيك جميل..حتي طعم المر وحاتك فيك جميل ..
حتي ريحة الشاى وقهوتك أم زنجبيل…
كل شئ فيك جميل..
حتى ايماءات بناتك ..فيها ذوق راقى واصيل..
حتى لفتاتن تحاكى نخيل بلادنا وكت يميل..
مونليزا الابتسامه..ومونليزتنا..زايده فتنه..
بالتأنى الفى كلامه..وابتكار الرقه فى صيغة سلامه…
لما تهمس ليك مرحب شهد يتقطر ويسيل..
كل شئ فيك جميل..
حتى اولادك عيونهم فيها ليل ممزوج بنيل..
حتى قاماتهم بواسق..زى (جبل مره) و( توتيل ) ..
شفت فيهم لمحة ( القاش)و (الحلنقه)
منطق يقنع كل دخيل
كل شئ فيك جميل..
حتى لونك فى شعارك ..شفته طاوع المستحيل..
حتى سفراك قبل يغادروا ..
بشدوا لى دروبك رحيل..
يشيلوا من حسنك مهابه ومن جمال اهلك رحابه ..
ويدوا للعالم دليل..
كل شئ فيك جميل.. سمحه حلوه..
جميله حتى..وانتى بين ظل السحابه
شاعله بى شمسك شعيل..
يابلـــــــــــد..
وداع وسلام ..يا نبض الاحاسيس جد..
ووداع ووداع ..وقلب ملتاع..
وناسك ليا عزة ومجد..
وتانى وداع ..وبرجع مهما طال الصد…
واقول يا سلام ..
سلام يآمنة يا زينه..يا تكوة حنين لينا ..
ويا سمر المساء الساحر..
سحر خاطرى وغناوينا..
ورسم الفه فى خطاوينا..وكمال الروح وكت تهداء..
وداعكم لياسلام وسند.. وتانى وداع..ولينالقاء..
لو..ما..مته..فيكى ..كمد يابلد
قبل مغادرة الاجواء السودانية..18/4/1996م