دنيا بس

[سيد موسى محمد]

( دنيا بس )
لو صحيح يا دنيا فيك خير .... مابتلبن و ياكله الطـــير
داير اغنى غنايا رزين ...
بكرة بيهو يلولوا الصغيرين
يانفس ماتقربى الشين
صمى خشمك و امسكى العين
اعرفى رزقك جبتى من وين
مايزلك جوع المصارين
و مايغرك لبس الدلاقين
ابقى عشرة على المساكين
و صلى فرضك و قولى امين
ياكريم يا الله الستر
كل قاسية تعدى و تمر
يا عيون لاتشابن كتر
ياقلب لا تزرع الضر
ابعد الشر منو تر
ارخى خلى الغيرك يجر
و اطوى خلى الغيرك يشر
داير افطمك ابيت تتفطم
يا قلب طاوعتك ندم
مافى يوم باريتك سلم
انت تزرع و غيرك يلم
ان بقيت فى المريود عشم
يبقى اقرب ليك النجم
الشتيلة الشاربة من نيل
بهدلتنى و هدتو الحيل
دايرة همة و نفسا طويل
دايرة مهرا عاتى و اصيل
دايرة درقة و سيفا صقيل
ودايرة فاتحة تشيل العراقيل
الشتيلة السيدها مكروب
ديمة صارى و شيهو مقلوب
كلبو ينبح حاجر الدروب
سيفو يلمع و شركو منصوب
يخاف عليها ان هبت هبوب
لو اموت و اتغطى بالطوب
من اكل دفيقة ما بتوب
ابقى سقدة و فارق النوم
جرو نفسك و جرب العوم
فى البحور الموجا مردوم
مافى زول بى يموت بلا يوم
يا وصلت المنو محروم
يا غرقت سلمت من لوم
الصغير الحاجبو مقرون
كم جريح بى سهمو مطعون
كم نصيح خلاهو مجنون
حارسو جنا قرنو مسنون
فى الكتال كاتال و ملعون
شن اسوى انا يا الصغيرون
و انت دربك ماهو مامون
يا القلوباب كربوا القيد
سموا باسم الله ارفعوا الليد
جنى جنا قاهر عنيد
ليهو قاموا و قعدوا الاجاويد
كل يوم فى غيو بى يزيد
لا حبوب لا حقنة بى تفيد
لا نفع كى المراويد
تكفى يا ود موسى العبر
مافى زولا بيها اعتبر
انت كم سامحت و غفر
و انت كم ظلموك و صبر
و انت كم كشفوك و ستر
و انت كم منعوك و شكر
طار حمامك قالولو كر
طش سهمك و شركك هبر
جد كسرك بعد انجبر
و الصغير الساكن الكجر
فى النعيم ماجايب خبر
و لو صحيح يا الدنيا فيك خير
مابتلبن و ياكله الطير
**********

سيد موسى

[القريشابي]

مشكور يا سيد
إبداع عديييييييييل
تسلم يا راقي

[جعليه حاره]

كلام جميل .. يديييييييييييييييك العافيه

[العاصفه]

سيد موسى
والله ما عارف نقول ليك شنو بالظبط
اولا مشاتقين ليك كتير
وتانى بالتبادى كلامك دا ووالله ما بنلقاء لينا شكر يليق بيهوا
فدمت بخير

[حجر الظلت]

سيد موسى ازايك
والله قصيدة مافيها كلام
وانا من هسه اتخيلت عبدالواحد يأدي فيها بي رمية مع نقرشة بي الطنبور
. ..وذكرتني برمية الحوري الشهيرة ولعلها مجاراة لها ::

العبوس الخيرها ما دام
أخدي مشوارك يا جدي الشام
بي بعيد وأديني السلام
نخاف لا بد نتلام
في العبوس الخيرها ما دام
********************
تدوم يا حوري ما بتدوم
ما تخت في البطالة لوم
بالشهف ما بيكبر الكوم
والرزق من الله مقسوم
الجدية الديسة مردوم
فوق خدو شلخو مختوم
روقلت بي برق السموم
فرقتنا الخيرها ما بيدوم
********************
الجدي المرعى السهانين
أنت حراسك تمانين
كلو واحدا عندو قصرين
كل قصرا عندو حارسين
كلو حارسا عندو كلبين
كلو كلبا عندو جروين
ده كلو حرسا لي العريجين
كلو جروا فيه ضنبين
كلو واحدا سالو سكين
يا كريم يا الله الحنين
يتلقي المريود بعد حين
********************
يا قشيش وداي الكربكان
يا الشرب بي النجمة رويان
عوج البل وفقع الضان
وجعِك الما اتلقي في مكان
مرة كلوة ومرة مصران
فرقتنا الما ليها أمان
كلو واحدا بقى في مكان
********************
الشتيل الشايل متردم
سيدو فسلان رامي الهدم
في قعاد الضل يحرِم
يا قلب مالك بي تهم
ترعى غنم إبليس تقسم
ربي كان قاسملك قسم
في جنينة تنوم
****************
الحقيقة أنا لايم الجدي
لي تمانية يوم متكفي
ناري توقد وناسي تمشي
مالها ست الريد ما بتجي
********************
أنا يا القلوباب أرفعوا الكف
يا الفريعاب أرفعوا الكف
أقروا يس وكتروا التف
القويريق الما خلف
اليعوم تالاك إنزقف
حالي يا ست الريد وقف
إنتي ليه ربطك معاي مرق بف
********************
الشتيل الزارعينو فوق القيف
أنا جيت وقفت داير لي ليف
سيدو قال لي هني تب لا تقيف
********************
أنا من صغير تبيت جِني
حالي عشرة وراضي والديْ
ما بيقولوا الجيران أفيْ
الولوف أنا حن علي
قلبي في كرعي الحِديْ
وإنت نايم وأنا جمري حيْ
أتقلب جاي الجرح نيْ
إن إتقَلَبْ جاي الجمر حيْ
داير أدُق طمبوري النِقيْ
كان يونسني الليل شويْ
داير أوصفها سمحة الزيْ
********************
ربي كاتب لي ما يشاء
اليسوي الخير بي يلقا
واليسوي الشر بي يرجا
مالي مالو الهم متل ده
*****************
تدوم يا حوري ما بتدوم
ما تخت في البطالة لوم
بالشهف ما بيكبر الكوم
والرزق من الله مقسوم
الجدية الديسة مردوم
فوق خدو شلخو مختوم
روقلت بي برق السموم
فرقتنا الخيرها ما بيدوم
+++++++++++++++
محمد سليمان الحوري

[حجر الظلت]

الأخ العزيز سيد
والله القصيدة جميلة انا هسه قريتها 3 مرات وح أكتبيها مفرقة بي فواصل ..
بس عليك الله رسلها لي عبدالواحد طوالي وخلي يسجلها ويرسلها ليك بأسرع فرصة ..

أتنبأ لهذه القصيدة ان تكون احدى الدرر الفنية لعبد الواحد مديني

تحياتي

[حجر الظلت]

( دنيا بس )
لو صحيح يا دنيا فيك خير .... مابتلبن و ياكله الطـــير
---------------
داير اغنى غنايا رزين ...
بكرة بيهو يلولوا الصغيرين
يانفس ماتقربى الشين
صمى خشمك و امسكى العين
اعرفى رزقك جبتى من وين
---------------
مايزلك جوع المصارين
و مايغرك لبس الدلاقين
ابقى عشرة على المساكين
و صلى فرضك و قولى امين
---------------------
ياكريم يا الله الستر
كل قاسية تعدى و تمر
يا عيون لاتشابن كتر
ياقلب لا تزرع الضر
ابعد الشر منو تر
ارخى خلى الغيرك يجر
و اطوى خلى الغيرك يشر
--------------------
داير افطمك ابيت تتفطم
يا قلب طاوعتك ندم
مافى يوم باريتك سلم
انت تزرع و غيرك يلم
ان بقيت فى المريود عشم
يبقى اقرب ليك النجم
-----------------
الشتيلة الشاربة من نيل
بهدلتنى و هدتو الحيل
دايرة همة و نفسا طويل
دايرة مهرا عاتى و اصيل
دايرة درقة و سيفا صقيل
ودايرة فاتحة تشيل العراقيل
------------------
الشتيلة السيدها مكروب
ديمة صارى و شيهو مقلوب
كلبو ينبح حاجر الدروب
سيفو يلمع و شركو منصوب
يخاف عليها ان هبت هبوب
لو اموت و اتغطى بالطوب
من اكل دفيقة ما بتوب
-------------------
ابقى سقدة و فارق النوم
جرو نفسك و جرب العوم
فى البحور الموجا مردوم
مافى زول بى يموت بلا يوم
يا وصلت المنو محروم
يا غرقت سلمت من لوم
-------------------
الصغير الحاجبو مقرون
كم جريح بى سهمو مطعون
كم نصيح خلاهو مجنون
حارسو جنا قرنو مسنون
فى الكتال كاتال و ملعون
شن اسوى انا يا الصغيرون
و انت دربك ماهو مامون
----------------
يا القلوباب كربوا القيد
سموا باسم الله ارفعوا الليد
جنى جنا قاهر عنيد
ليهو قاموا و قعدوا الاجاويد
كل يوم فى غيو بى يزيد
لا حبوب لا حقنة بى تفيد
لا نفع كى المراويد
---------------
تكفى يا ود موسى العبر
مافى زولا بيها اعتبر
انت كم سامحت و غفر
و انت كم ظلموك و صبر
و انت كم كشفوك و ستر
و انت كم منعوك و شكر
طار حمامك قالولو كر
طش سهمك و شركك هبر
جد كسرك بعد انجبر
و الصغير الساكن الكجر
فى النعيم ماجايب خبر
و لو صحيح يا الدنيا فيك خير
مابتلبن و ياكله الطير
**********

سيد موسى

[محمد النمير]

الاستاذ السيد لك الود اتحفتنا وانا اعلم قبل غيري انك ترقد على كوم من (الابداع) الذي
لم يرى النور بعد ولم تره اعين المنتظرين .
شهادتي في الخال السيد مجروحة وهذا وحده الذي يقف حائلا دون الاطراء لكن حقيقة عندما
تفرأ للسيد
يقفز لذهنك عمالقة شعراءنا ود الرضي ، ابو صلاح ، سيد عبدالعزيز . السيد يمكنه ان (يقدل) في بساطهم
بلا تواضع ...لعل الاستاذ السيد هنا يلبس ثوب الزاهد العارف وهذا نتاج حس صوفي عله استمده من
مجالسة العارفين واهل الطريق في ام ضوابان وكدباس .
رجاءا امطرنا من سحب ابداعك ولاتبخل علينا نحن في امس الحاجة لكلمة تدغدغ احساسنا فمابالك بقصيدة
كاملة .... اضع قلمي حياءا فلم يجف المداد وفي الخاطر الكثير وفي انتظار ابداعك وتقبل مروري المتواضع

[سيد موسى محمد]

مرورك مامتواضع ... يا و لدنا الغالى ... بس حكاية ناس ود الرضى .. و ابو صلاح ... ديل صروح .. نحنا كان لقينا طريقة نقعد فى ظلهم ساكت ..كفانا ...
لك محبتى ....

[حمدي السمر]

يا سلاااااااااااااااام استاذنا القامة
علي هذه الروعة ...
اتفق مع حجر الظلط ...
فيما ذهب اليه

[هشام]

الخال ابومازن
الشوق بحر
كسحت مراكبنا معاك يابوسيد في دنيا ابداعك الرصين وجد الواحد ماعارف
يكتب ويوصف كيف لنو في حضرت اشعارك يعجز التعبيران يوفيك حقك
واصل ابداعك واشعارك وابحت الدفاتر القديمة وطلع المستخبي وياريت
لو تتحفنا بي قصيدة مراد
لك عاطر الود والاحترام