انتصار الحب فى الباديه (فى اطار التوثيق لتراث الجعلين)

[العاصفه]

فى اطار التوثيف لمناطق الجعلين
هدية من العم عبدالدائم الحسن لشبكة ومنتديات دار جعل
مسرحية انتصار الحب فى الباديه (سعاد) وهى قمة من الروعه تصور مدى نزاهة وعفة الحب فى مناطق الجعلين .سوف اقوم بانزالها فصل فصل اتمنى ان تنال اعجابكم
سكوت 00 حنبداء
المكان مكان ماء وعدد من البنات والاولاد ينتشلون الماء من البئر ويتبادلون الحديث يقود ذلك الحديث (حمد) وهو أحد فرسان القبيلة سألن عن (سعاد) وهى عشيقته وعن عدم مجئيها وترد عليه عدد من البنيات بأنها هذه الايام غيابها كتر تارة دلع وتارات تشكو التعب الخ000 فيقاطعهن حمد
حمد: لالا مابتدلع الرايقة مى ملخومة
كاملة الصفات الفى البنات معدومة
أرجوكن ياالبنات بالله سيبن لومه
أنا خائف عليها بس لا تكون محمومة

عائشة: أظنك يا حمد قلبك صبح يهواها
أظهر ريدك ليها شايفنك وقف فى حماها
أديك الاكيدة القلبى مابخفاها
أولاد الحسين دايرنها أحسن تكوس لى سواها

حمد: أولاد الحسين مابهمونى شان ريدى ليها شديد
وأنا برضى بحبها وقلبى ليها بريد
متفقين على الزواج من زمننا قديم وبعيد
والله أموت عشانا وفى هواها أبقى شهيد

أمنة: نحن خلاص مشينا وإت أقيف أرجاها
هسع تجيك الرايقة فى معناها
ماإنت إياك سيد روحهاوإنت كل مناها
فى وداعة الكريم يجمعك بيها وكمان تلقاها

حمد : فى وداعة الاله (وبعد ذلك تنصرف البنات ويفضل وحده يدوبى):

طال بى الحسار وحالتى ديمة حزينة
وكمل لى النميم والسمحة مابيه تجينا
مساهر الليل براى قلبى جاتو غبينة
وحاربت المنام حرب الحراز للعينة
***
الجاهلة البريدها أنا ما بدورو عذابها
أنا خائف عليها لا يحرقو شبابا
سائلك ياكريم هون لى أنقر بابها
ويقولوا لى خير وأبقى من خطابها

وبنما هو يدوبى يحضر إليه الشباب عمر ، سعد وعلى

الشباب: إزيك ياحمد

حمد: مرحب حباب أخوانى العارفين ضميرى وكل حسارو
قمر الحلة وين الليله مالو خبارو
لابان لا ظهر خل القلوب إحتارو

سعد : فات من عصير روح يونس جارو
يونس لى همومو الزايدة ليه حساره
نار حبك أظنها فى قليبو ذادت نارو

عمر: ظاهر عليك ياسعد عارف جميع أخبارو
وعارف حبهم الليهو مابضارو
أصبح تدافع ليهووتقدم كمان أعذارو

(تظهر سعاد على جانب المسرح يراها حمد )

حمد : تراه داك ظهلر فى جوفى توقد نارو
يارجال خلاص خلو الكلام أضارو
خلو اليمر بعدين نقول أخبارو

على : أصلو قمرا خجول بين الرجال مافات
يارجال أرح بسراع حدى الشدرات
(يختفون جميعا عدا حمد جالسا ووجهه بين كفيه تمر سعاد وتقف بالقرب منه وتعجب لوحدته)

سعاد : هوى يا الخو مالك نعل ماك متحسس موجوع يا الاخو

حمد : أى والله أنا بيك حاس
ومن زمننا بعيد لا نوم ولا نعاس
وأنا المقدام00(تقاطعه سعاد)

سعاد : أسكت لايسمعوك الناس

حمد : الناس لولاهم ولو لا قولهم
أنا ما كان بى العذاب وأعضاى بادى نحولهم
والاحباب قراب صعبان على وصولهم

( الشباب يضحكون وياتى صوتهم من خلف الشجرات)

سعاد : وووب ياحمد سمعونا وبشتنو حالنا
وبكرة يزيد كلام الناس تكون عزالنا
فى وداعة الكريم يرعاك ويسند حالنا

حمد : فى وداعة الاله ويفضل يدوبى الاتى:

فى وداعة الاله فى لسانها ما أحلاها
وقولة هسى تقول ما إتحثوبا سواها
أم جسما رزين فى قلبى رسمتو هواها
سائلك ياكريم تحفظا وترعاها
(يدخل عليه الشباب)

حمد : أخوانى العزاز النار على نارين
ومن قومة الجهل عاشق الحديثها رزين

على : ياحمد الولوف قلبك رهيف وضعيف
وحبك لى سعاد ماليهو أبدا قيف
أولاد عمها متل النهار فى الصيف
والخوف الشديد باكر يسلوا السيف

حمد : ياعلى السيف مابخافو وقلبى ماهو ضعيف
وحبى لى سعاد حبا أصيل وشريف
ماهو الحب الليهو الناس فى طريقو تقيف
كدى أعصر قلبك بى حجر لآ تخليهو يبقى ضعيف

عمر : لاتعيبوهو حمد الزول هواه شريف
ومن زمن الجهل مالك زمامو عفيف
ستار للعروض وكريم بعشى الضيف
والحارة إن بقت مابخلى زولا يقيف

سعد : أنا مابلوم حمد لكنى عارف الباقية
والله العظيم كان عندى أختا ساوية
أديك ليها ياحمد كان راضية أو مى راضية

حمد : شكرا ياسعد فضلك على كتير
وشكرا ياعمر والله إنت أمير
وإت ياعلى نصحك عظيم وكبير
باكر من الدغش نتلاقى عند البير

عمر : آى والله الليل هود وأصبح ظلامو كتير
فى وداعة الكريم كل زول يمسك طريقو يسير

الجميع : فى وداعة الاله 00000000

والى الفصل القادم انشاء الله

[حجر الظلت]

ود حامد سلام
يا ريت تكبر الخط شوية عشان نقدر نشوف .. باقي النظر عقاب

[العبدلابي]

تسلم أخي ود حامد على الموضوع الجميل...
ننتظر المزيد إن شاء الله...

[حجر الظلت]

حقيقة مسرحية جميلة تضاهي مسرحية العبادي (المك نمر) .. يا ريت تكمل سرعة نحن حفظنا الجزء الأول خلاص

[العاصفه]

ود حامد سلام
يا ريت تكبر الخط شوية عشان نقدر نشوف .. باقي النظر عقاب

حاضر يامك

[العاصفه]

تسلم أخي ود حامد على الموضوع الجميل...
ننتظر المزيد إن شاء الله...

مشكور يا عبدلابى يشرفنى انك تكون فى البوست دا

[العاصفه]

حقيقة مسرحية جميلة تضاهي مسرحية العبادي (المك نمر) .. يا ريت تكمل سرعة نحن حفظنا الجزء الأول خلاص

والله هى فعلا تضاهى كل المسرحيات المعروفه

[العاصفه]

الفاصل التانى بيبداء والشباب فى فسحة حول البير ومن الاولاد سعد, عمر وعلى ومن البنات عائشة وأمنة وأمينة وهن يحملن صفائح الماء وسعد يدلى بالدلو ليملاء وهو يدوبى:



سعد : الزول الولوف البى الغرام هالكنا
ما إتلفظ شتم بس بى السكات هالكنا
أرون ياغنم إيانا ليك خلقنا
نرعاك بالضحى والحر مابحرقنا
وإن عنك غفلنا المرفعين شاركنا
( البنات وعمر يضحكون على سعد)

عمر : ياسعد مابتعرف الدوبيت
الظاهر عليك متربى فوق البيت
الزول البسدر وفى خلاه يبيت
معلوم تمام بتعلم الدوبيت

سعد: ياعمر قصر لسانك عنى
وإت كان بتدوبى أحسن منى
قرب جاى تعال أنشل دلوك وغنا

عمر : ماتقول فتر من الدلو وجبيدو
الزول الضعيف الجر بجرح إيدو
وهنا يأخذ الدلو من سعد ويدلى به وهو يدوبى قائلا:

عمر: الليل البهود أنا ماهو تب نومنى
والزول المريض فى حالو أحسن منى
لوسألوك هوى أوعك تخبر عنى
يبقى يقولوا فيك قولا أكيد يشغلنى

سعد : ياعمر بتخاف حديث الناس
الزول الصميم مابشغلوا الوسواس
إلا تراكزول لا أصل ليك لا رأس

عمر : ياسعد ماتوجه حديثك لى
بعدين يجوا الاهل يسوا الدية
وأنا مابخاف من المقال النية
خوفى الكتير على السمحة ست عينيا

آمنة : ياعمر خسمتك بى سيدى الحسن الشكل خليهو
كدى أقدم على سعد أمسك كمان فى إيديهو
ما إنتو أخوان الشكل شن فيهو
عليك الله ياعمر كان بتعزنى تعافيهو

عمر : العفو ياسعد إتلومت فيك بالحيل
وشكرا يا أمنة كلامك سمح بالحيل
ورايك بقبلو وديمه ليهو بميل

سعد : العفو ياعمر والله مازعلان
دى ماها مشيكلة بتحصل ديمة للصبيان
والله جقليب عجيلا باللبن شبعان
(يضحك الجميع000000000000 وتدخل فى اللحظة دى سعاد)

سعاد: إزيك ياسعد وإت ياعمر كيف حالك وياالبنوت سلام
(الجميع مرحب حباب سعاد)

آمنة :ياسعاد تعالى حدانا قربى لينا
وختى صفيحتك حدى صفيحة أمينة
باقى عمر دوام بيملى الصفائح زينة

سعاد: لا لا صفيحتى مابملاها عمر الشايب
بملاها الولوف الليهو قلبى أنا طايب

آمنة : قصدك سعد المابعرف يدوبى؟

سعاد: سعد وين بلحق الحارياهو
زولى الولوف شاحدة الكريم راجياهو
يتقبل دعاى ويجمع هواى بهواهو

فى الحظه دى يدخل (حمد) ويلقى التحية ومن ثم تضحك البنات 00000

سعاد: مرحب حبابك حمد مالك قليبى وسيدو
ومن قمت ونشيت شرب من حنانو وريدو


عائشة: ياسعاد عرفناك وعرفنا الفيك
أكان لى حمد أهلك محال يدوك
أولاد الحسين إياكى ليهم وليك

سعاد :أولاد الحسين أخوانى وأولاد عمى
لكن حمد ياهو البكشف غمى
وياهو البزيد لى هناى ولى سعادتى ينمى

آمنة: والله العظيم قولك أكيد مقبول
وغرامك لى حمد مافيهو أبدا قول
الا العوازل والناس كلامها يطول


حمد : الناس مابهمونا وحبنا ليهو مابنسيب
والحب مو محال ولا هو شيتا عيب
يجمعنا الزواج وكمان ميعادو قريب

وهنا تحمل البنات الصفائح ويغادرن وحمد ياخد صفيحة سعاد ليملاها وهو يدوبى قائلا:

الليله البريدها معانا ومتمنه
شايله القيروان رزينه كيف تتنى
سمح معجنها وحوريه من الجنه
يا بت الرجال حبك أكيد شاغلنا

ثم يرفع الصفيحة لسعاد وقبال ماتخرج سعاد من المسرحيلتقى بها أخوها إسمه(حسن) ويتحدث معاها بصوت مسموع وحمد ماكان عارف إنه عنده أخو وياهو البتكلم معاها دا فعندما حاول حسن الإنصراف ناداه حمد0

حمد: هوى يا الآفندى تعال مروح ليه
ماتكمل حديثك ظاهر عليك سفيه

سعاد: لا ماتشتمو ماعندو نية" شينة


حمد : لاتنضمى دايراهو يحقر بى
حاميك أنا وشرفك أمانة على

حسن: صبرك ياحمد

حمد: لا تقولى حمد

حسن: صبرك ياحمد أسمع كلامى وأحكم
أنا مابلومك ليك حق تسبنى وتشتم
بل أشكرك000000

حمد: شكرك مانى دايرو

سعاد: دا أخوى ياحمد

حمد: أخوك! اللوم على والشينة

حسن: أبدا ياحمد لا لوم عليك لا شينة
دا الواجب لابد من تحمينا

حمد: قولى يا حسن وين من زمان ماك ظاهر

حسن: بدرس فى المدينة الليلة جيتكم زاير

حمد: أول ماشفتك قلت زولا غاير
وجيتك زول شكل طابق حسامى وساير

حسن : ظنيتو دمك فاير
والله زولا عفيف على غرامك غاير

وفى اللحظه دى تنصرف سعاد000000000

حمد : سعاد ياها الاخت ماها العايبة
وأنا مابدس عليك كان حاضره وإن كان غايبة

حسن: شكرا مودع للاله

حمد: وين ماشى لازما على أكرمك

حسن: لاحق سعاد

حمد: سعاد وصلت قبيل
أمشاكا الفريق يمين الليله ملكا زارنا

حسن: لا لا قصدى أقول سعاد جاها العريس اليله شرف دارنا
ولازم نكرموا ونوريهو كل أفكارنا

حمد: جاها العريس!!!

حسن: عمى الحسن طالب سعاد لى الطاهر
مالك ياحمد الهم عليك بان ظاهر

حمد: لا لا بدور أقول الخير

حسن : مودع للاله0000
وبعد أن ينصرف حسن يرجع حمد ويجلس مع سعد وعمر فى حيره شديدة فيدخل عليهم على ويلقى التحية

على: سلام آ صبيلن00 ها صبيان سلام (ولم يرد أحد)
ها صبيان طير البكم هود عليكم حام؟

سعد: قرب ياعلى خليك جاى قدام
الموقف صعيب لابدور سلام لا كلام

حمد: شن فى إيدوا مادام شيخ الامين ماضيهو
هو باقى زولا صعب ماشفتوا وكتين يصروا وشيهو
فى الوداعة ياشبان أنا جنيت براي وعقلى صبح دربكان
ومن غير سعاد فى الحلة مالى مكان
لكن سعاد مابخليها مادام عينى فيها المويه
وأقتل كل البقربا حتى إن كان بقى أخوية
والى اللقاء فى الفصل القادم

[حجر الظلت]

الأخ العزيز ود حامد
نحن متابعين وإنشاء الله بعد تنتهي يتم تسجيها علي كاسيت وسي دي ..

تحياتي

[العاصفه]

الأخ العزيز ود حامد
نحن متابعين وإنشاء الله بعد تنتهي يتم تسجيها علي كاسيت وسي دي ..

تحياتي
اولا اتاسف للانقطا نسبة لظروف خارجه عن الاراده ونعود ليك تانى ي حجر الزلط
طبعا المسرحيه دى اتمثلت فى مسارح مناطق ودحامد بصوره واسعه جدا ولى زمن طويل امكن كل مسارح المدارس فى المنطقة
لكن مافى مانع نشوف زوول يلقيها وتسجل فى كاست بالتنسيق مع العم عبدالدائم الحسن صاحبها
ومشكور على المتابعه

[العاصفه]

الامين والد سعاد والحسين والد طاهر وحسن شقيق سعاد والنور وهو طفل صغير للمراسيل0000000000

الامين: يا حسن ناديناك نشاورك فى زواج سعاد
دايرين نعقد ليها لى طاهر ورينا رأيك عاد

حسن: رأى بعد رأى سعاد هى الشوره أو الابية
رسلوا النور اليمشى يناديها
وأطرحوا الامر وشوفوا الباقية عليها
وبعد داك بتعرفوا رأى ويانى بتبع ليها

الامين: دا أخر الزمن حتى البت يشاوروا ليها
تعال يا النور أجر لى سعاد ناديها

(يخرج النور وبعدفترة تدخل سعاد)

الامين: ياسعاد إنتى من دون جنآى بريدك
ومن زمنا قديم متمنى أحضروا جديدك
عمك الحسين جانى طالب إيدك
لى طاهر وليدو المن زمن الرضاعة بريدك


طاهر ود أخوى إخترتو ليك برآى
ومو زولا غشيم دايما بكوسوا رضاى
عندو المال كتير ومليان رجالة ورأى


مناى يابتى توافقى ويشوف أبوك جديدك
وتفرح أمك تقول الليله يوم عيدك
ويفرح عمك وفوق مال وليدو يزيدك
وتفرح البنات تبارك ليك تمسك إيدك


سعاد: أصبر يا أبوى لامن نبقى أنا وإنت برانا
وحتى أمى نجيبها توافق وتبقى الجميع رضيانه
وندرس للامر وتبقى الجميع فرحانة

الامين : لا لا عمك قال مسافر داير النجيضة يقوم
ماشى لى وليدو المسكنو الخرطوم
يودوا الخبر وتتلملم الحروم
يطلقن للزغاريد ويقولن بخيت اليوم


سعاد: يابا الامين اللى الضيوف عزام
وياجبل الرويس* المابغطى غمام
ويابحر الدميره الغالب العوام
وياسحاب الخريف اللى البدولهام
ستار للعروض وتربى فى الايتام
ومما خلق ماشفنا ليك زولا لام
لكن طاهر ود أخوك البى الفريق حوام
يكشف فى العروض ولى الرجال شتام


رأى بقولو ليك يا أبوي
طاهر ودعمى ودايراهو يبقى أخوي
وإن جبرتونى عليه يانى الحوته الكملت عليها الموية


الامين: دا رأيك يابتى عاد ياسعاد
أمانه ماكت بريدك وريدى ليك كل يوم يزداد
فى يوم وحيد حبى تخليهو كلوا عناد


سعاد: دا رأى بقولو الاصلو مابنزاد
طاهر أنصحوهو وشوفولو غيرى سعاد
لانى مابريده الاصلو مابنراد00000 (يقاطعها حاج الامين )

الامين: كفى يابت كلامك سبب لى هم وسهاد
وحلف شن زدتيهو أهجم عليك بالسنين الحاد
وأقطع ليك رويسك وأريح الحساد

كدى أمشى للصباح والبضلا خلى
وأرضى بى ود عمك والعناد سيبى
وحرم شن أبيتى أقطع لى رويسك وأريح الغاوى

(تنصرف سعاد ويبقى داخل المسرح الامين والحسين عم سعاد ووالد الطاهر000000000)

الحسين: أخر الزمن الناس بقت لخباته
البت مو منها لاعبات عليها أخواتها
دايرات يفرقن بينا ويفرحن الشماته

كلام البت كعب عكر علينا حياتنا
ودا رأى بقولو ليك عشان تعمر البناتنا
البت لازم نجبرها عشان ماتخرب البناتنا


الامين: كلام البت نسيبو وفيه ماسألين
شن دايرين بيهو مادام أنا وإت متفقين
نلم ناس الفريق نعقد ليهم فى الحين

حسن: ياعمى الحسين رأيكم فى البشوفها عقوبتو قبيحة
البت مى دايراهو ماتسوا لينا فضيحة

الحسين: دا زمنا نحنا البت مابنشاور ليها
شورتها عند أبوها ياهو البيعقد ليها


حسن: دا قولالشرع البت لابد هى يشاوروها
وإن رفضت أقيفوا بس خلوها
دا حرام يا أبوى المابتبقى لا تسوها

الامين: كفى يا ولد الفضيحة بلاك منو السواها
أصبح تحرض فيها وكمان وقفت حداها


حسن: خلاص أنا مسافر والدايرين تسوها مابرجاها

الامين: طير إنت أصلك ماك نافع مادام القبيح تبداء


الامين: تعال ياالنور 000 النور هوى تعال

الامين: يا النور أمش لى خالك بخيت وحسين
وحبوبتك زينب وأمك أم سترين
وناس الفريق جملة الفى الفريق قاعدين
الحاضر يكلم الغايبين
قولهم أبوى وعمى الحسين ليكم جميع عازمين
لى عقد الولاد البيهو مسرورين
يجونا فى مساء الاحد صبحان على الاتنين

(وبعد فترة يدخل أهل الفريق لحضور العقد0000000000000000000000)

الامين: الشاى ياولدكب للحسين وأولاده
وكب للعريس طاهر ولوف وأنا قلبى رايدو
كب للناس جميع دى عادات العرس وعوايدو
وخلالبنوت يغنن ليهو00000000

طاهر: لا لا أنا جبت البغنى وغناهو رايق وزينة





جبل الرويس اعلى جبل فى منطقة ودحامد ويقع فى الجزء الغربى من ودحامد

[حجر الظلت]

يا سلام يا سلام
والله يا ود حامد انا عايز القصيدة دي كلها يا زول الشغلة دي كده بتجهجهني معاك .. يا ريت تجيبها لي معاك يوم السبت في العرس انشاء الله

[العاصفه]

بعد ماعرست سعاد طاهر بالقوة
يبداء بهم المشهد التالت وهم فى بيتهم ويتحدث طاهر قائلا:

ياسعاد بريدك وريدى ليك شديد
ومو ريدا قريبطول زمانو بعيد
كايس لى لماتك والقسمة مى بالليد

نحمد للكريم ربنا اللمانه
فى عش الزواج الليلة تم بنانا
أصبحنا مسرورين والقلوب فرحانه
لاهم لا كدر والدنيا خيره معانا

ها سعاد مالك بقيتى لى فى حيره
سارحة مع الخيال صورتك بشوف تغييرها
موعاجبك كلامى ولا صايداك غيره


سعدا: كلامك لى كعب وأتركنى مندى السيره
من يوم عقدت على أصبحت مكسورة الجناح وعضيرة

عرسك لى كعبلا ريحة عاد لاقماش
ياسجم الرجال الجيتن لى فتاش
أنا خائفة بعد دا العرس دا يبقى فراش
ويندم أبوى القتلنى بالرشاش


طاهر : أبوك الله يخرب أبوك اللى الرجال غشاش
لسانو طويل حلف الجروف عشاش
ماهو مأدبك ولى بنوت الفريق نباش



سعاد : طاهر أبوى زولا كبير وإت عارفو لاتشتمو

طاهلر : أبوك الله يخرب أبوك
الله يكتل أبوك(يردد فيها وهو خارج من المسرح تاركا سعاد براها وهى تبكى وتمنح قائلة:


يا أهلى ماتلومونى زادن على جنونى
ديل ناس أبوى ظلمونى ومن حبه لي حرمونى
على العرس جبرونى وفى ود أعمى رمونى
شكيت وما عزرونى وبكيت وما خلونى
جابو العنج دقونى ياريتم لوقتلونى

وهنا يدخل الطاهر وهو سكران وملطخ بالدم ويقول لها:
دا شنو ياخايبة

سعاد: خايب إنت ياملخوم المرقت بى درب المريسة تحوم
وجيتنى سكران وجسمك كلوا ماشى دموم
كدى أنقشر فوق العنقريب داك نوم0000 ويقع طاهر أرضا وبعده ينوم

أها فى الحظه دى يأتى صوت حبيب القليب (حمد) من بعيد وهو يدوبى قائلا:
أنا ببكى وبنوح أفكارى فيك محتاره
ونار حبك قسم فى جوفى توقد نارها
تعال ياموت تعال لى قلبى أناالمجروح
تعال ياموت تعال أرجوك أخد الروح
الزول البريدو اليله فات خلانا
عرسك ياسعاد خلى القلوب حيرانا
طاهر ود أعمك عكر علينا صفانا
لابد من أكتلو وأدخل الزنزانه

ثم يدخل حمد المسرح وهو شايل سكين ليقتل طاهر وهو نائم ولكن تسرع سعاد وتمسك يده وهى تقول:
أقيف ياحمد لاتقتلو كان بتريدنى

حمد :طائع لى أوامرك كلامك فوق العلى بزيدنى
سعاد : أصبر ياحمد كتلك ليهو إنت بزيد لى شقاى
خليهو بكتلو ليك برأى
من خوف الحكومه عملت ستين رأى
باكر من الدغش بسقيهو سم فى الشأى

حمد : تسقيهو سم فى الشاى!
كلامك لى سمح خلانى أعيش فى هواى
فى وداعة الكريم ياست الفكر والرأى

يخرج حمد من المسرح وترجع سعاد وتضع الشاى وتصب فيه السم وتصحى طاهر00000000

سعاد : طاهر00 طاهر كيف أصبحت ظاهر عليك تعبان

طاهر : هو زولا بشوف وشيك بكسب رضى الرحمن

سعاد: قوم الشأى

طاهر : مابدوروا شأهيك على حرمان(ويكشح الشاى بيده ثم يحاول الخروج)

سعاد: هسع ماشى وين مخلى البيت وراك خربان؟

طاهر : البيت شن البيت البى هموم الدنيا ديمه ملان
يسكن فيه مين بلا الضبع والوحشان
أقعد مع منو أقعد معاك إت ياجان

سعاد: خلاص أنا ماشه ناس أبوى مادام أصبحت على زعلان

طاهر: أنا حالف يمين الباب دا ماتفوتيهو

سعاد: بفوتو

طاهر: شن فتيهو طلقانه طلاق تلاته (ويمسك شعرها وينزل فيها ضربا وهى تصرخ)

سعاد : ياحسن أخوى ألحقنييييييييييييييييي
(ويدخل حسن وبقوه وبسرعة يمسك بيد طاهر وبصوت قوى يقول له:

أجمع عليك إيدك ياسجم الرجال ياخايب
قايلنك ود قبيلة وإت تاريك عايب
عرسك ليها هم وكم سببت ليها مصايب
بعد مو الشتيمة أصبحت ليها تضارب


ها سعاد ورينى السبب أحكيهو لى بسرعة
خلينى أهجم عليهو وأشربمن دميموا أنا جرعة

سعاد : ياحسن أخوى هدى أعصابك
مافى عوجة لكن حسى هو الجابك
طاهر شتمنى وشتم كمان أصحابك
ومو واقف هنا ساعى يكوس فى خرابك

طاهر ظنيتو جنى وعقلو صار ملخوم
دا مو داير عرس دا داير ينطلق ويحوم
جبت ليهو الشأى وصحيتو من النوم
لم فى شتيمة ومن فراشو مابى يقوم
داير لى فضيحة ولى أبوى اللوم

قلتلو ماشه ناس أبوى حلف على قسم وطلاق
دا مو داير عرس دا عديم الخلقة والاخلاق

حسن : خلاص أختى بسوقا منك بقت طلقانه
ياسجم الرجال أب كلمتا خيبانه
إت مابتستاهلها لكن ناس أبوى خرفانة
عقدو لك عليها دون ماتكون رضيانه

ثم يأخد حسن سعاد من يدها ويذهبوا لديارهم وبهذا يسدل الستار على المشهد الرابع من المسرحية ولكن ياترى ماذا سيحدث بعد هذا هل سوف ترجع لطاهر؟ ام سوف يظفر بها حمد فى النهايه
حتى نرى ذلك ننتظر الحلقة القادمة وهى الاخيرة من هذه المسرحية
هاكم من دار جعل

[ود الجاه]

تسلم على هذا الجمال البشبه دار جعل

[حمدي السمر]

الله عليك ياود الجاه علي رفع البوست
والله علي ود حامد اللذيذ
مسرحية في قمة الروعة

[سلمى أحمد]

قمة الأبداع يالجعليين

[ودحران]

يا لك من انسان فنان مبدع للغايه مزيدا من التقدم واتحافنا اكثر ولازم تكمل انا فى الانتظار