محاولات للتنفيس عن طريق النمَّه!

[حجر الظلت]

محاولات للتنفيس عن طريق النمَّه!

يا اهلى العزاز جادِع عليكم نمَّه
للوطن البهضرب خاتَّا فوقو الحُمَّه
مرواد الحرب ما بشفى الضغاين ضُمَّه
من بعد الشتات عُقُب البلاد تِتْلمَّه
*** *** *** ***
ما بِنْدورها عيشةً بالنفاق ومظاهر
وما بِنْدوركى يا السافرة ام لباساً ظاهر
نحن اولاد غُبُش كايسنو رزقاً طاهر
من قومة الدُغُش لامِن نجمنا يساهر
*** *** *** ***
رِكِب لِك فوق جموحاً ما بتدور الَّلكه
جيتِك كارِف المحلب بدور الدِّلكه
من جخنوب دروبِك ما بخاف والشِّبكه
دحين يا ام رشيم ارجينى فوق الدَّكه
*** *** *** ***
حلاة القدلة فوق صيدةً اسمها حليمه
يطوطِح كفلها الناس النفوسها سليمه
ترعاها العيون ساوات ضميرها وليمه
انكسر اللجام ركَّبنى فيها جريمه
*** *** *** ***
اخيراً على لسان همباتى محشِّش:
برَّكتَ فيلتى البركبه
وهمبتَّ ريدتِك من غشيم بى عنكبه
ورضيتى بَىْ رغم الفلس والعشكبه
حنَّكتَ لحظات العشم رغم الدلال والجقلبه
لمّن صحيت شفتَ الحلم سايل بحر فى المرتبه

[حجر الظلت]

:lol:
الناس في العروض ماتقيسة بي تيبانة
ما يغرك لباسن والعروض عريانة
ديل حراس رزق زي التكنو أمــانة
زي إبل الرحيل شايلة السقى وعطشانة

[حجر الظلت]

يقول عبد الله ودأبوسن واصفاً إستقبال أهل محبوبته له:



مشيت وجيت لقيت دلوا السلوقي

يجوني الناس يعجوا يقيفوا فوقي

شاكي الغلبة لكن جد شوقي

متل جمل العلوق كل حين أهوقي



الشم خوخت بردن ليالي الحرة

والبراق برق من منا جاب القرة

شوف عيني الصقير بي جناحو كفت الفرة

تلقاها أم خدود الليلة مرقت برة



ضقنا الحنضل اليانكي وبلعنا المرة

كملت كوتة التمباك صقعنا الجرة

وو كت إتقفلت شقيش قبل بي المرة

نرمي أمرنا في بلد المعاني الحرة



قولو الباقي فوق الموت مكشر نابو

ومارق مخلبو وكايس علي أصحابو

نحن رجالو..نحن أخوانو .. نحن أحبابو

ما يعوج الدرب والليلة قلنا حبابو



صباراً علي النايبات بحاكو أيوب

دروبن عرج علي الماعندو زاد وأرقوب

شيتاً شفتو بي عيني للمرقوب

دفعوا الدية كاش زي ملصة المرقوب

[حجر الظلت]

يمشي ام تتالي الليلة باروو وزايرو
اتخنتل متل زرع الذرة الفي جزايرو
نهداً دابوا قام عراوي زرايرو
قال للناس تراهو الموت بشيل الدايرو


الادب الرفيع دارساه بدري دراسة

والذوق والظرف من امهاته وراثة

الا معاي دايما قوة راسه


صادني الصاد (محلق) وابتليت بي غيك

دعجة وكحلة وبضوي مع الكواكب ضيك

رفك عالي فوق للمعالق طيك

وسويتلي صي صي يا المقفره صيك


أيامك مضن زي البروق الرفـن

النوح طال عليك ترع العيون ماجفَّن

تاج حب الوداد راقد معاك إتكفن

الدين والبشاشة إتقالدن وإتوفن



بتشكي عليّ مالك عارفة لي غير الخلقنامذلة

دحين يا صاحبي أخيرلك بالصبر تتحلى

أنا كان عندي شيتاً يشفي من العلة

كان أولابو روحي القربت تنسلا

[حجر الظلت]

سماكي زرقتو متل الطاجن الممسوح

واتكل سحابك زي سطور اللوح

إتحليتي بي نسيمن عطورو تفوح

وفيك ريحة دعاشتن ترد الروح



تعال يا شيخ النريك صفاتنا

ما عاشرنا ذولا ضاق عسلنا وفاتنا

نحن رجال عمل نحن الخشن كفاتنا

نحن وفانا للعاشرنا حده وفاتنا





مرقت بي هنا بي اضانها سمعت كرة
وفوق كارتوت شخيتيرا تخين خره
قلاتو الوهاط بي لشقة قبلوه محره
يا باسط النعم اسقيها في هل المره


، ود عريج دومتك خرفت قلب القلادة كدوبة

وايدك طولت من شقة البادية

أوام دنقلا الفي اللجة قلب الهوبة

اترتع تقول شارب لذيذ الكوبا


من عيشة الرذيلة ابليس حرمنا

ومن الحاجة التعيبنا نعزقدمنا

نحن اولاد كمال وافر كرمنا

تستر الحال بارنا ان اصدمنا


ضراع المسافات والواطة المتسعة

عينو في الكرباج ويابي اللسعة

ابيض ليهو زنقدة يعوم بالنسعة

طيار السعودي قام من البلد يوم تسعة



تبعنا المجالس ودرنو قدرنا

وبقينا نماذح البسوانا والمو قدرنا

وكتين بالدراهم نشتريهو قدرنا

مافيش فايدة نشحن بالغبينة سدرنا

[الكتيابي]

كع تسلم يا حجر

[وهج الحروف]

:lol:
الناس في العروض ماتقيسة بي تيبانة
ما يغرك لباسن والعروض عريانة
ديل حراس رزق زي التكنو أمــانة
زي إبل الرحيل شايلة السقى وعطشانة


:61::61:
والله كلام ياحجر الزلط

قول زيادة