حب اللحوم .. أحمد الشيخ

[حجر الظلت]

حب اللحوم
أحمد الشيخ
ما عشقتك لي غلاتك
إنتي أغلى من العيون
أو هويتك لي حلاتك
إنتي أجمل شيء يكون
يا المعلق في الشناكل
إنت هيجت البطون
أم العيال كاشفة حالي
عايزة لحمة وإنت غالي
إنت غالي يا الخيالي
ديمة في السلخانة باين
ملمسك ناعم حريري
وهناك في أطراف بعيدة
ناس كتير باعوك كيري
أصلو ما بقدر عليك
أخير تشوف ليك حد غيري
بياكلو من البقري فخده
ومن بطون الضأن كبده
الظروف حنت عليهم
والدنيا صارت ملك إيديهم
ونحن ناكل في التسالي
وإنت غالي
نحن جنينا وسعرنا
عليك أبدا ما قدرنا
كلما الماهية تعلى
إنت برضو كمان بتغلى
كم موظف بيك هايم
يحلم في يوم يتغدى شية
فوقها دكوة وشطة حارة
علي يمينها مرارة نية
نفسو مجروحة وحزينة
إنهد من أكل السخينة
ومعاها ماجي
ما بصح أبقارنا زينة
ونحن ناكل في السخينة
الأرض بتنادي لينا
والأمل معقود علينا
لو مرقنا علي المزارع
أو مشينا علي المصانع
بكرة نشبع في الكوارع
والجقاجق والزبادي
نبني مجدك يا بلادي