كفتيرتك ..أحمد الشيخ

[حجر الظلت]

كفتيرتك
أحمد الشيخ
كفتيرتك في السوق مرمية
وكبايتك يابسة ومجدوعة
يابت الخلطة النوبية
يا حلوة ورايعة ومربوعة
كانونك كان عامر بالناس
صناع عمال ومساعدية
حارسنك طول اليوم
تجار وسماسرة عطلجية
كم استحملتي رذالة الناس
عشان أمونة وزكريا
فتشنا عليك في كل السوق
ورتنا صديقتك قمرية
حزنانة بتبكي بدمعا حار
والعدة هناك في البلدية
كشوك يا حواء من الأسواق
وأصبحت إيدك ملوية
إنتي الجيتي تشدي الشاي
بتفتشي في لقمة هنية
بتخافي كتير من كشف الحال
أبيتي الطرق الملوية
أحلامك على قدر لحافك
ما عايزة عمارة وعربية
عاجبك بيتك في الإنقاذ
أو حاج يوسف ردمية
كشوك يا حواء من الأسواق
والدمعة في خدك متكية
وهسه خلاص خليتي الشاي
بتبيعي مريسة وبقنية

[نبيل الهتمي]

والله الاخ مبدع عديل كده.. وأكتر شى عجبني في كلامو المزج الرائع .... (طوريتك في الطين مرمية..ومريم محمود)