أحمد عوض الكريم أبو سن في وصف الحسان

[حجر الظلت]

الإخوة في السودان أون لاين ،،
تحية طيبة ،
هذه الأبيات نظمها شاعر الدوبيت أحمد عوض الكريم أبو سن " في وصف الحسان" وقد قالها وكان مع الوزير عمر الحاج موسى في مؤتمر الإتحاد الإشتراكي بكسلا :
دخلت المؤتمر جابني الوزير الزين
معاه محافظ البلد الأديب ورزين
جملة الحاضرين في الجلسة ممتازين
رجالا بالعمار والفايدة مهتمين
******
مجتمع البنات المنظرن وزين
رئيستو محاسن الحسنا وكلامها حسين
الصيد الجفل من جايمة القانصين
سمحتو الوافرة تستاهل حنين وحنين
*******
وزير الإتحاد أب رسوة أحمر عين
علي سلمت في القصر الحصين وأمين
مشى وساقني مع الوفد الهميم في الحين
مباشر بارتياح سر القلب والعين
****
مواطنين البلد والليهو جو ضايفين
قالوا لو النقوم الإستراحة دحين
تشوف أمهار تشوف صيدا مراتعو عسين
رقابهن ريل وخدادهن بتضوي رتين
*****
قت ليهم بعد ما كبر قعدت أنين
رجع في لحظة لي عشرة وتمانية سنين
بي سبب السموح أمات فواطرا صين
ضاع صبري وفقد نومي وعدمتو يقين
******
في يوم الأحد عشرين وخمسة عدال
اجتمع الشباب في قاعة العمال
فيهو خدار وفيهو صفار وفيهو جمال
جمال ظبي الفلا ومهر الضرا القدال
*****
مقابلة الوزير الماهو مكشوف حال
ليها أتهيات بي كل نوع وأشكال
الله الخالق الشايب مع الأطفال
يرزقن حلالا فيهو تيه ودلال
*****
فطايم الدورن برق الهجوع الشال
قعدت مقابلن ما بين جدار ورجال
في دغس العيون الفمهن عسال
الشوف كان بيكتل كان كتلو غزال
*****
في كسلا أم تقاق اليوم وجدت مجال
مجالا بي عظمتو بتضرب الأمثال
وزير ومدير وكل الشعب والعمال
معاه موظفات فاهمات جمالهن كال