يا حليلك ويا حليلي قصيدة مهداة للصفر البارد

[مهيرة الوطن المتألق]

يا حليلك
يا حليلك ويا حليلى ..
لما حبك يبقى تانى ..
والقى فيه راحتى وضليلى
ولما عينيك تبقى مرفى ..
للغلابه وللتعابى ..
وللبحبك ياخليلى …
وياحليلك وياحليلي…
لما تبقالى الهوية ..
وتبقى ريحتك هى .. هى ..
وتبقى عزة تلالى ليا ..
صدق بى عمق القضية ..
وتبقى أنت ياكا أنت ..
ونبقى نحتا يانا نحنا ..
شوقنا فى حدق المآقى ..
ولهفة لى يوم التلاقى ..
وليك بعود لو طال رحالى ..
وياحليلك وياحليلى ..
لما حبك يبقى منفى ..
وتسرى فى جوايا رجفة ..
كيف أحبك ؟؟ وكيف بحبك ؟؟
يا وطن تحنانو وقفة ..
ويا عشق معناه غالى
وياحليلك ويا حليلى ..
كيف مصير البكره راحل ؟؟
لملم أشلاه الحزينة ..
وفارق الحب والمدينة ..
والصبية الفى عيونها
باقة من أشواق حنينة
والبلاسم والمواسم ..
والمشاعر الجد أمينة ..
وياحليلك ويا حليلى ..
يا حليل زولا بحبك ..
كل مناه يسعد بقربك ..
يا وطن مهرك دمانا ..
وجرتقك أجمل هوانا ..
والضريرة مزيج وفانا ..
والحريره الريده ذاته
والحنين خرزه فى سمانا ..
والهلال الفى جبينك ..
حبك أنت الفى حشانا ..
وعشقك أنت الفى حدانا .
ياحليلك وياحليلي ..
ياحليل بلدى وهواها ..
ويا حليل أختي وصفاها ..
وياحليل أمى ورضاها
وياحليلها سهير حليلها ..
حليل سهير وحليل وفاها ..
ما سهير النسمة داعشة .
ما سهير المطره راشه ..
ما سهير كل الأعاشة ..
فى عويناتها إرتعاشه
وصدق لحظاتى المعاشه ..
ويا حليلها ويا حليلى ..
شاده اوتارى وبهاجر ..
والزمن من طبعوا غادر ..
والحنين ليك الهوية
مهما طال البعد باكر ..
يا عروسه وياصبية ..
فيكى ما أحلى الضفائر ..
تهته فى حبك وهمته ..
ضعته قالوا عليا شاعر ..
فى عيونك يا بلدنا
وفى خدودك يا بشائر ..
وفى سماحتك يا عرسينا
ياقمر سطاع وناير ..
ويا وطن جوانا ممدود
غالى أولو مالى آخر ..
ويا عشق راجعالو باكر
ويا حليلك وياحليلى ..
احدى قصائد ديوانى الذي يحمل اسم ( الحب في عيون سودانية ) الصادر عن مطابع الثورة ببنغازي 1998م

[هشام عباس عمر]

يازولة براحة علينا خلينا نفهم الحاصل ؟؟الحاصل شنو ؟؟؟؟
ما ممكن الولولة دى كلها ساى ...ياحليلى ويا شريرى............. مات ليكم قلب ولة شنو ؟؟؟
(منايا ومنفايا )والله الحكاية دى دايرة الزعيم ...
بعدين شن لما بنغازى بالرياض ؟؟حيرتونا ...
يا الصفر البارد شوف ليك طريقة توقف بيها الولولة دى ولة كمان حيكون عندنا راى تانى..
وانت عارف المحس ديل لسانم طويل بس غالبم العربى ...
اخ الشمار نسانا اهم حاجة ..مرحب بيك يا مهيرة بت عبود ولة مو كدى ؟؟والله صراحة شعرك جميل وشكلك كدة ضايعة ساكت فى البلد الفقر دى ..على العموم نحنا عندنا شعار لازم توافقى عليه اولا (الزعل مرفووووووووووووووووووووووووووووووووووع)...

[مهيرة الوطن المتألق]

يا ناس يا هوى انا سودانية ملامحى ارتسمت فيها خارطة السودان لكن لما بديتو تلبعوا ساكت اها انقول ليكم والله انا اصولي وجذورى جعلية لكنى لم ارى معقل أبائي المتمة انا ولدت ونشأت وترعرت بحى ود البنا بامدرمان ويا جماعة انا اتنفس امدرمان بس حاجات مرقتنى من البلد والله يكون في عونى انا لم افقد قلبا بل فقدت الحضن الاكبر البلد انا اعيش في منفي اختيارى رفقا بمن تحبكم والزعل مرفوووووووووووووووع
نجاة

[هشام عباس عمر]

هوووووووووووووووووووووووووووو....طلعت جعلية !!!
لكن انتى اخترتى مهيرة وعندكم بنونة وبعدين البعرفوا انا عن الجعليات انهن ما بيولولن حتى قالوا الجعلية من فورتها بتدق راجلها .................ههههههههههههههههههههههههها.
على العموم الله يرد غربتك وتتمتعى بربوع المتمة وشندى وكمان انا عازمك عندنا فى ارض المحس رأيك شنو؟؟؟؟
اقول ليك حاجة الغربة حارة صحيح لكن بالشايفنو هنا والله كنت تشوفى الويل ..انا شخصيا بعد ما اتدمر مشروعى طالع والله لو بقونى رئيس ما راجع ..وزى ما قال الهندى البلد دى لو قاعد يجرها كلب ما حاقول ليه جر...
واقول ليك بصراحة كنت عايز اتزوج جعلية لكن خفت ..على ابه بس كل صباح اتجلد واتبهدل والجيران يتفرجوا على..هههههههها.
قولى للقذافى هشام عباس قال ليك مشتاقيين....

[حجر الظلت]

up

[الزعيم]

حالتك جعلية وبت أمدرمان كمان زي الزعيم وتهدي القصيدة للصفر البارد الشايقي :cry: أخ يا القهر! : :evil: : لا.. لا.. لا.. زعلان لمن غلط بعدينك أنا عنصري في حاجاتي :twisted: ..
وهو صحيح يعني عرقنا مخلوط بالحلفاوي يعني مو جعلي مية لكن برضك يا مهيرة.. يظهر كان نفسك تكوني شايقية وكده :P
والموضوع ده طبعاً الزعيم ما راح يسكت عليهو.. وحا يعلن الحرب الباردة ع الصفر والسبب إنتي مع إني ما بقدر استغنى عن ماواضيعوا المجنونة 8)
شفتي خلاص الحرب بدت زمان مواضيعوا مية وكيف .. وما عارف داك.. ويا الصفر والله العظيم إنت عسل..
لكن تاني وين حرب ولعتيها هه:wink:
الجد بعد كده
ألف شكر ليك يا أروع قلم نسائي يحمل أجمل تعبير في ما ينتقيه من مفردات تلج القلوب ودون استئذان ..
والشي البشد في أشعارك إنها بتعمل على تأصيل المفردة السودانية القديمة اللي بتحسسنا بحنية أمهاتنا والأم في الأول بعدينك أخواتنا وخلاتنا وعماتنا ونسوان جيرانا ال .. لمن تدخل تحس في عيونم كلام كتييييييييييير بس ما عندهم القدرة على التعبير.. لكن بيصلك من خلال احساسك وقرايتك الصحيحة لعيونم الجميلة .. والحمد لله في السودان أون لاين لقينا إنسانه رائعة بقامتك لمن نقرا ليها نرجع للأيام ديك ونتذكر حاجات جميلة وبعضها كان فايت علينا بتضح من خلال مراجعتنا لإبداعك يا مهيرة..