معاناة زول في الغربة كتير مشتاق الى السودان

[سيدة]

بسم الله الرحمن الرحيم وبه نستعين
انا المغتربة انا المنكربة لي سنين فيك ياغربة اريد اكتب مسلسل فيك وعن حياتي وعن ناس كتار بالحيل بقت ملامح عويناتم طشاش في طشاش لاقادرين يسافروا يبلو الشوق وويشوفواالام والاخوان ويشموا تراب الوطن الغالي والجيران والخلان حليلي انا وحليل اهلي بقيت مسلوبة وزي طيراً جريح وطريح نائم فوق عشيشه ينوح وينك يمة وين اخبارك وين كلماتك وين سلاماتك خمسة سنين كتار بالحيل على زولاً عشق ارض الخضار والنيل وكان اتربى في القرية يعشق فيها حتى الطين وصوت اغنامنا راجعة في المغيرب وريحة الدعاش والليل ونواصل

[حجر الظلت]

الأخت العزيزة سيدة ،
مرحب بيك في المنتدى ونتمنى ليك إقامة طيبة ..
الغربة حارة وصعبة لكن الناس مجبورة عليها .. ونتمنى إنو الحال يتصلح والنا ترجع لأرض الوطن ..
ولي عودة
كمال

[Nachtigall]

الاخت الكريمة سيدة
الف مرحب بيك بيننا
وشكرا على القصيدة الجميلة يافردة
:D :D :D
حليلي انا وحليل اهلي بقيت مسلوبة وزي طيراً جريح وطريح نائم فوق عشيشه ينوح
تصوير بديع ورائع
.
ناخ تيغال

[هشام عباس عمر]

مرحب بالاخت سيدة
يا اختى الغربة قاسية نعم والاحساس بالحنين قاتل وقلبى مع كل مغترب لكن.........
بالوضع الهنا والله عدوى ما اتمنى ليه يرجع !!!!!!!!!!!!
اذا كنتم مغتربين فعلا لانكم بعيدين عن الوطن ماذا عنا المغتربون داخل الوطن ؟؟
اليست غربتكم افضل؟؟احمدوا الله يا سادتى قد تعودون يوما وتسعدون بالوطن وحالكم افضل فما بالكم بمن اغتربت معدتهم عن خيرات الوطن ما بالكم بمن شنقته مظالم ولم يجد للعدل منفذ ما بالكم بشخص يبحث عن الحرية فى بلده ويسترق كل حين وحين ؟؟
ما بالكم ب6الف طبيب يتظاهرون بحثا عن عمل ولا عزاء لملايين الخرجيين الذين لا يحملون صكوك التبعية والولاء لان الكفاءة فى عطلة طويلة؟؟؟
اما افضل للغربة ان تحتويهم؟؟؟
ومن اراد منكم الفاقة فاليلاقينى بالارض الوطن...