من روائع ود شورانـــــي

[بت الخدر]

قلبي الليلة منطقت المغاني فتحة
من العاند القمح كلابي شرحة
يا عوض الكريم العيون سهر الليالي جرحه
خدو يسير وروباتو علي الكتوف لفحه

أب كرمت بعد ما شدرو الغزار ما شحة
جاه مدعدع المزعوب نهار الضحة
علي هجوم السحى الدرع قلوبنا الوحة
يالليلة الأمل فيهو لا بطل لا صحة

اتكجرن ضهاريك وهمبريبك برد
سون عجة النوق الجناهو مفرد
أبوكتير انملا وتباب بلول أزرد
قمري نعيمة فوق سنط الحفاير غرد

دناي القفارات البعرف العوم
نقضت عليقتو باكر بيهو قصدي شيوم
كان سهل علينا الواحد القيوم
بشوفبو الكافي قاعد ومن وسط مقسوم

لي تعباً مطول منو خلاي حابسو
جيتو الليلة وتبويح ضرب فوق يابسو
اب خداً بيلمع بالغضب مو عابسو
متوطي الحشم توب المحامد لابسو

الهضليم بعد فته الدروك متجفل
أجدع فوق يمينك وفي مشيك لا تسفل
ما دام خالقي بي الروح والرزق متكفل
واغل درة اليمني المباعه مقفل

قمز من شايتو بي دلعة وسراعة وعيد
قصدو اليوم يشوف الفوقو دخل الريد
الخلا الهرع يعمل جفيل الصيد
تقيل قدمو ومشيهو ممايحة وسنيد

ود العانس العالي ومسدس جوفو
قام طربان وفرقن بالهويدا كفوفو
تاتاي الفلو العزل حميرو ودوفو
قصدو الليلة بي روح الشميشة يشوفو

تقاي الدقاق جاهن رميهو شتات
مسك واسع المسافة وشارع العربات
بريبة البجازن ومهرة التابرات
أضمن عندها المرواح علوق ورباط

درعات الوحيش القاد سلولن مـارق
شبت فوق قـنوب شافت بريقاً طارق
مختصره وعفيفه وناس لقاها جرارق
وين مايبين جمال تأمرلو يرجع عارق

الذيبنان دخل والقلب طرى المعشوقة
برطمه نيله المزره وسماها بروقه
بت خيل القسيم ام ايمنا مطلوقه
عاجبانى نغمها دقاق وحالى نشوقه

الاكليل دخل شنق وعتق ياقيه
ذكر قلبي أنس الموضعه متاقيه
السبب الخلا نفوسنا داخلات فيه
ذوقه كتير موفر والجمال حاويه

الاكليل دخل شته وعتق كياقيو
ذكر قلبي انس الروبتو غامته كتوفو
المانعنا دون الحي عملنا نشوفو
ادعج مايقه عسلا صافي معشوقه حالي كروفو

نحنا سهمنا دايماً في المصادف عالي
نحن العندنا الخلق البتاسع التالي
نحن للمحن بنشيلها ما بنبالي
نلوك مرهن لامن يجينا الحالي

ها الأيام بشوف جروحها جداد
وتكدر ونوح النوم علي ما عاد
من فرق أم دغستاً خلقة مي مرواد
مجنون ليلى خير مالاي ضاقلو رقاد

يوماً بالعتامير فوق ضهر عنافي
ويوماً شايل أب جقرة التقيل كتافي
الخلاني شايل النهار والليل حافي
خايف اللينة تطلب شيء وأقولها مافي

الليلة المطيرق في نعيم وسرورة
وإت النوم عبدتو ما قريت لك سورة
ساعتين إن صبر كت تحظى بي البدورة
سعدك أصلو داك ما بجبر المكسورة

من حسيس أم رشوم الحار بقول واغلبي
وما لقيت لي طبيباً بعرف الحاصل بي
شمبانيها مو براني خافس قلبي
زي هنتر نهار زنهارو واقف حربي

مربوعت قوام سمحة ونغيمة حنين
كفل أمات لبب فيك يالتكيلي العين
بالدرعا العقايدك لروايده هجين
رفقاً بي العلي وأنا في هواكي سجين

قت لي القالي شايفك من أمس ملفوح
سببي الزولو ما اتعشى ورقد مسدوح
وهبه جمالو غير حنة ودلال ومسوح
عفيف وطيباتو خلقة معاهو طبق الروح

إن وقفت عديل وإن مشت تتفزر
وان عملت غلط تمشي وتجيك تتعزر
أبيض خاطره ورشرش عيونه مفزر
فيك شيمت الضحوي اب سحاباً مزر

غنم السيسبان ضمر من الكراش
ثوب ضلوعن انظف من رفيع الشاش
الخلاني لا شايل في المدير والباش
سليب الضحى ودفع الدراهم كاش

وريث كرم الجدود الفضلة ماشي عديل
بقيف في الفاقة مهما تزيد بشوفها قليل
قال للراح يوزع العلوق لا تكيل
يات من سيد جمل يدخل براه يشيل

كتير من قلبه مؤمن بيك وفقك نايم
عندك مستمر ضبح أم سناماً قايم
كل الديش عموم المستقيم والقايم
بات من كان يقول إن شاء الله خيرك دايم

المكرمته زي عين البحر متابعة
خلاوي مفروشة مضيفة ساقية وشابعة
خترانه الكرامة وقمنا يوم الرابعة
بي تكسي ولواري الدامر المتابعة