ركيزة الحله

[الحاج أبو عاقلة]

ركيزة الحلة
حباب أم حُمّد حبابك خالو
يا ركيزة الحلة وسند المالو
تتباشر وكت الناس بضارو
أجواد وكريم فاضت انفالو
كريم الاصل السمحة خصالو
عشا البايتات التوقد نارو
هجئة ليل لضيفو الزارو
حبابك خالو
يا الفوق الحوبة مافي مثالو
أسداً يحمي عرين أشبالو
تلباًَ عاصي وفك عقالو
يقابل الموت متوشح شالو
فارساً يخشى عدونا نزالو
حبابك خالو
جاي بتسأل الليد كيف حالو ؟
والخاطر طول شن أخبارو؟
الزول من رَيّح إتعدى قُبالو
لِحق الرَوّح فات قبالو
لا عتب تاني لا جانا خبارو
خلانا ضحية لي قلنا وقالو
حتى الشفع ملو سآلو

لسع بتسأل عن حالنا يا خالو
هاني أنحنا الحال في حالو
الشقى والمحنة علينا إنهالو
والبيت الكانت توقد نارو
سورو أنهد وزادو إجارو
سرقو البسمه من أطفالو
والجوع الكافر إستطون دارو
وإتحكر فينا يسو أفعالو

لسع بتسأل عن حالنا يا خالو
ما حالنا الفينا يغينك سؤالو
خريجنا العالم كترت أعزارو
عشان يلقى وظيفة أو يصلح حالو
يا يبصم أعمى أو يقبل نارو

لسع بتسأل عن حالنا يا خالو
راعينا الهمو في جيبو ومالو
سوها طوابق وبنوك...! إتبارو
والشعب الضايع زاد إهمالو
بترولو الصادر من كل آبارو
عليهو إتوكل .. علق آمالو
لا حل مشاكل لا ريح بالو


لسع بتسأل عن حالنا يا خالو
زولاً سافر يكيد عزالو
يكسب رزقو ويعود لدارو
يصلح حالنا ويكتر مالو
ما خاتي الغربه يوم في بالو
رسوم وضرائب زادت أهوالو
لا قادر يرجع لا طال آمالو
ومن غادرنا وشد رحالو
لا خلى سعيه لا عيشاً كالو
حتى صبرنا يوم روح شالو

لسع بتسأل عن حالنا يا خالو
ناس ساس يسوس يوم جونا وقالو
الخدمة مقابل أصواتنا ينالو
قسموها الحلة أبداً ما بالو
البيت الواحد تأجج نارو
والفتنه تتاوق من فوق أسوارو
المؤمن يٌلدغ من أقرب جارو
غيب ونمية للناس إحتالو
الشمل إتفرق في الحلة يا خالو

لسع بتسأل عن حالنا يا خالو
دا حال الدينا الكل في حالو
لا جاراًً يشفي غليلنا سؤالو
لا زولاً يمسح دمعاتنا السالو
لا أيداً قادره من خيرها ننالو
دا حال الدينا الكل في حالو


لسع بتسأل عن حالنا يا خالو
لمتنين يا خال الناس يضارو
وفي حشانا الظلم بتوقد نارو
السافر بره وناسي صغارو
متغرب ديمه متبهدل مالو
لا خاله لا عمه ضاقت من فالو
في الغربه الشينه ما ساتر حالو
يا ريت لو عقّب وربا عيالو
الحاج أبو عاقله
النهود / 23/6/2007

[عمر الطيب حبيبي]

الصديق الغالي ابوعاقلة ..
حينما ننتمي إلى ترابنا .. ننتمي إلى مأخذنا ومحتوانا وحيواتنا ..
فالتراب ولا الإغتراب ..
تحتكم فينا الدعوة .. والتواجد الدائم خلف مرتكزنا الأول .. ألا وهي الدار .. البلد .. الوليدات ..
ولكن ..
ينبقي حقا توفر ما يخولنا للتواجد ..

لسع بتسأل عن حالنا يا خالو
لمتنين يا خال الناس يضارو
وفي حشانا الظلم بتوقد نارو
السافر بره وناسي صغارو
متغّرب ديمه متبهدل مالو
لا خاله لا عمه ضاقت من فالو
في الغربه الشينه ما ساتر حالو
يا ريت لو عقب وربا عيالو

أخي العزيز .. إنما هذا هو إحساس للشاعر .. ولكنه حقيقة لنا واقع نعيشه في كل لحظاتنا ..
وأنت تضيء عقولنا وتلونها جمالا ونورقا .. أنت تلونها أيضا حكمة و معرفة ..
فدم لنا روعة ونهلا منه نرتوي
وطبت خيرا صديقي الغالي ..

[rose]

[moj=up:7fa2152343]حباب أم حومد حبابك خالو
يا ركيزة الحلة وسند المالو
تتباشر وكت الناس بضارو[/moj:7fa2152343]

ما أجمل حرفك .. عسى أن لا يغبره مرور حرفنا ...

ودمت بكل الجمال اخى ابوعاقله ...


ودام الود

[الحاج أبو عاقلة]

أخي وصديقي عمر الطيب حبيبي
سلام وسلام لناس الخرتوم
متى العوده نحن في الإنتظارك
كملت مناديل الورق
لا وقفت سيل لدموع لا كما جف العرق
كما تعلم حبيبي
أن القصيده تحكي عن قضية إجتماعية ماثله أمامنا صباحا ومساء
ونحن كإعلامين نستلم ما يربو عن 10 إعلانات من المحكمة الشرعية شهرياً ( طلاق للغيبه وخوف الفتنة ) وعند سؤالنا عن سبب الطلاق بواسطة المحكمة نجد الإجابة أن الزوج سافر منذ 7 أو 8 أو 10 سنوات وترك أسرته واطفاله ولم يعد ولم يرسل مستلزماتهم لذلك زوي الزوجة يطلبون الطلاق وهذا المشهد يتكرر يومياً في مكاتبنا بمركز الزاجل هنا في النهود ولو قرأت صفحة إعلانات المحاكم تعطي ربك العجب. هل كل هؤلاء ( فزو) من أولادهم.
القصيده تعبر عن هذا المشهد الإجتماعي الذي تدمى له القلوب. وطبعاً الخال هو أحن أفراد الأسره لذلك نجده يتصدر مثل هذه المشاكل

[الحاج أبو عاقلة]

ما أجمل حرفك .. عسى أن لا يغبره مرور حرفنا ...

ودمت بكل الجمال اخى ابوعاقله


الرائعة أبداً روز : تحية صباحية بطعم البرتقال -
شكراً على المرور

[مينو]

up
up

[الحاج أبو عاقلة]

شكراً مينو على المرور