المخمسات

[الكليس]

الأخوه الأعزاء ..بعد التحيه
المتتبع للشعر السوداني يجده هو الأشبه وألأقرب للشعر
الجاهلي والفصيح وأغلب لهجتنا العاميه تجد بها كلمات
قد نظنها عاميه وهي الأفصح من بين جميع اللهجات
العربيه الأُخرى ..حتى طريقة بناء الشعر فنجد تشابه
كبير ولو شذ في الشعر العربي , وما لفت نظري هو
الخماسيات في الشعر الشعبي السوداني , وللعلم أول
من قال هذا النوع من الشعر هو أمرئ القيس بالرغم من
أن العالمين بالشعر استنكروه أمثال أبي العلاء المعري
وابن رشيق وابن منظور , ولكن ما أريده هنا هو وجوده
في الشعرالشعبي السوداني عند الحاردلو وأهلنا في دارفور
وكردفان .وكمثال لهذا النوع أورد اليكم قصيده للشاعر
شاعر الدوبيت الكبير يوسف البنا :
زمناً حقيقه الناس حُنان
زمن النفير لي بيت فلان
زمن السيوف ضاربات سُنان
وتدردِق الجزر السُمان
والخير عميم
زمن الرجال تيران نُطاح
يتكامجوا ودايماً قُباح
زمناً قبُل مافيش صراح
لي بت برا يتم الصُفاح
لابسات لبس ساتر حشيم
قلع المطامير الرُشاش
زمن المسور خاتي العماش
زمن الرجال فيهن مُشاش
ما برقدوا الجيران عُطاش
وبكمدوا أب جرحاً أليم
زمناً علينا القش بفيد
زمناً بجونا عرب صعيد
زمن الغباش راقد لبيد
فرنبو عجَّال ودعبيد
خربن بلاد عبدالرحيم
ودطلحه في أبو دليق بنادي
هجَّ المدائن والبوادي
الأجرب أب كرماً بعادي
يشبه أب درق الجدادي
وفي النايبات بسد ما داب خِريم
فوقو تتزابن قبيلتو
وكلها المسعيه هيلتو
معقول بطرِّز بي تقيلتو
وحاشي مابقوم بيها شيلتو
فارس المغارات ام بريم
الى ان يقول
طلوحه ناظر أولاد أولاد مسير
سمتان وسدرو ملان بقير
في التوج وبالغابه أم صرير
برعن مع الدود أب كرير
حُرات وتيلادن قديـــم
سارحنبهن جنيات دُواس
مابفروا من يوم الدُفاس
في زنقة اليوم أب نحاس
بتالبوا ومابيخشوا بـاس
وبقنِّعوا الدعجه ام رشيم
ونواصل القصيده
ــــــــــ
ودام الود

[الكليس]

المخمسات التي وردت على لسان أمرئ القيس كلها جاءت على نمط التسميط وللذكر منها :
مرابع من هند خلت ومصايف..يصيح بمعناها صدى وعوازف
وغيرها هوج الرياح العواصف.وكل مسفٌ ثم آخر رادف

بأسحم من نوء السماكين هطَّال
ـــــ
ودام الود

[عمر الجيلي محمد]

الكليس والله شوقتنا وفي انتظار المزيد من المخمسات

[مينو]

أجمل ما فى هندسة الحياة هو أن نبنى جسر من التواصل فوق بحيره النسيان

أرى فيك الحس الهندسى وانت تبنى جسور التواصل مابين ذاك الماضى الجميل والحاضر المبنىّ على الماضى


كن دائما بهذا الألق

[الكليس]

الكليس والله شوقتنا وفي انتظار المزيد من المخمسات
الأخ عمر الجيلي لك التحيه والشوق ..
ودي عشان خاطرك الغالي :
زمن أب خير كان برفه
بدابر العادم العرفــه
داره أم زور أُم خِـرفه
تتمقنع عقرب قرفــه
وحابك فوقه الغيم
فوقه بزيم القـارح
ويمصع رِقها مارح
فلتت من السـارح
ناطره صبيب المارح
سماها كسدبو الهيم
ــــــ
ودام الود

[الكليس]

أجمل ما فى هندسة الحياة هو أن نبنى جسر من التواصل فوق بحيره النسيان

أرى فيك الحس الهندسى وانت تبنى جسور التواصل مابين ذاك الماضى الجميل والحاضر المبنىّ على الماضى


كن دائما بهذا الألق

من يجعلنا نجود ونبحث عن الجميل وإن كنا كذلك فهو من
أجل المتلقي الذي يتمتع بالحس المرهف والتذوق الراقي
لذلك تتلمذنا في مدارسكم ..
ولك الشكر ست الفريق على الطله البهيه ..
ـــــ
ودام الود

[حجر الظلت]

فوووووووووق

[محمد محبوب]

و الله عدي راي شايفو اشتر شوية لكا استحملوه غايتو

(لا اري هناك اي علاقة بين آل البنا و الفن لا في الشعر ولا الغناء و لا الدوبيت)

و الله ورسوله اعلم

[حجر الظلت]

ود المحبوب سلام
لا اري هناك اي علاقة بين آل البنا و الفن لا في الشعر ولا الغناء و لا الدوبيت

كيف الكلام ده يا راجل ؟؟؟؟؟؟؟؟

الأمين البنا والفرجوني ديل أسياد الدوبيت

ويوسف البنا كمان .. يعني ممكن يكون عندك فيهن رأي لكن ما عندهم علاقة نهائي دي بالغت فيها ..

أبحث في الموقع بإسم البنا .. وأرجع لي


والله أعلم

[حجر الظلت]

http://www.albawga.com/turath/darg3l/yousif_albana/ya_7leel_zama.mp3

[محمد محبوب]

طبعا يا حجر الزلط متوقع ردود زي دي لكن ناس الفرجوني و الامين وغيرهم من ال البنا ناس بالاسم بس عشان ود البنا لكن لمن تسمع ليهم ما بتحس باي لمسة جمال في الموضوع بالجد والله انا لمن القي واحد من ناس البنا ديل وبالذات عندهم وليد طالع اليومين ديل في الكفر بغير محطة التلفزيون طوالي


طبعا ده راي شخصي

[حجر الظلت]

أنا معاك إنو عاصم البنا ويوسف البنا مثلا ما علي قدر كده .. لكن الأمين البنا والفرجوني ما فيهم كلام بالذات في الدوبيت

[محمد محبوب]

رايك شنو في الامين عبد الغفار في الدوبيت او اللحو؟

[حجر الظلت]

رايك شنو في الامين عبد الغفار في الدوبيت او اللحو؟

والله يا ود محبوب الأمين عبد الغفار ده ما بسمعوا وبعتبر غناه " إزعاج" .. أما الأحو والله ما فيه كلام لكن طبعا زي ما بقولوا الشغلانة أذواق ..

وليك تحياتي مرة أخرى

[محمد محبوب]

فعلا الحكاية ازواق, لكن كان الله كاتب ليك عرضه سمحة اسمع اغنية ود النور حبابك للامين عبد الغفار

[محمد محبوب]

تخريمة:
بمناسبة العرضة, هنا الفنانين والعازفين في طرابلس عارفيني زول بدور العرض شديد, فلمن اخش اي حفلة بسلم عليهم من بعيد وبقعد لغاية ما يدوني اغنية عرضة اقوم اعرض وافوت, في فنان اسمو محمد عباس صاحبنا (غني في عرسي) مشيت عليه وقلت ليه أعرضنا, الزول غني اغاني عرضه سمحات خلاص لكن الشباب طلعوا ما ناس عرضه ناس كريمات ساي وتملس, اها انا اضايقت ضيق شديد مشيت عليه اشكرو فقلت ليه (و الله يا ود العباس ما قصرت اعرضتنا لكن للاسف ما لقيت لي عارض يعرض معاي) صاحبك ضحك بقوة والمكرفون كان مفتوح هههههههه ختيتو في حته ضيقه خلاص

ودمتم

[حجر الظلت]

والله يا ود محبوب مرات الزول يكون خرمان ليه لي عرضة لكن ما يلقاها .

مرة سمعنا في حفلة جعليين في المايقوما وعزمنا واحد قريب العريس .. أها يا زول اليوم أكان خميس وإنا إتبسطت بسطا جد وقلت الليلة أمشي ألقى لي دلوكة وشتم حار وأعرض وآخد لي سوطين تلاتة .. يا زول من عصرا بدري لبست جلابيتي وطاقيتي والشبشب الإيطالي حق الجلد ومشيت علي الجماعة .. يا زول جابو الغدا طبعا صفرة كفولك الخلق دي علي كترتها لامت قالوا كفانا .. يا زول بعد الشوية جابو الشاي والدلوكة دورت وعمر الحواري يغني والناس بدت تتمولص للجلد .. وقلنا الليلة نسوي البدع .. فجأة يا زول يقوم عمك أبو العريس يحلف إنو ما في زول يندق نهائي .. وقدر ما الناس حاولت معاه ياخي خلي العيال ديل يدقوا مالك ومالهم إنت خش جوه كان ماك داير تحضر .. الزول حلف طلاق وقال سوط مافي وشال السوط مسكو عندو .. المهم عندي صاحبا لي جايب سوطو معاه قام طلع السوط أداه للعريس .. أبو العريس قام زعل وفرتق الحفلة قال كلو زول يشوف صايبو وأمشي يا ولد سوق مرتك وإتوكل تاني ما عندك حاجة في البيت ده ..

وعلي كده لا لمينا في عرضة ولا سوط .....

[محمد محبوب]

لكن والله جعلي جد هههههههههه
المهم العريس ساق المرا
في مثل سمعتوا يوم عرسي طبعا دخلنا انا واخوي الاصغر مني و الشباب قايمين وقاعدين واحد فيهم قال لي (العروس للعريس و الجري للمتاعيس)

لك الود

[حجر الظلت]

المتاعيس ديل ما نحن زاتنا يا ود محبوب ...

سلامي

[محمد محبوب]

انت عليك الله مالينا حرامات وطلاقات ولسه ما عرست؟؟؟؟؟؟؟؟
لكن ما اتلومت فينا يا حجر الزلط قربت اجاريك في الحلايف دي كان ودرت مني بت عمي