يا مشرع الحلم الفسيح ... أزهرى محمد على

[rose]

يا مشرع الحلم الفسيح
أنا بينى مابينك جزر
تترامى .. والموج اللّديح
القدرة والزاد الشحيح
كملتو .. ما كِمل الصبر
نتلاقى فى الزمن المريح
ميعادنا فى وش الفجر
يا مشرع الحلم الفسيح

يا مشرع الحلم الفسيح
يا بعض منى .. وفينى ساكن
أنا أصلى منك ومشتهيك
و بيناتنا ليل الغربة ... داكِنْ
هبّة هبوبك..
أفتح شبابيك المساكن
وسـِّع دروبك ..
ولـِّع مصابيح الأماكن
يا مشرع الحلم الفسيح


يا مشرع الحلم الفسيح
يومنا النـّهِـبْ .. أسلِبنا خوفنا
كبـِّرنا قدرك .. مرتين
وطـِّول قدر كتفك .. كتوفنا
يا رغبة الرعد البيسكن ..
بين غناوينا وحروفنا
ضوِّى الدساكر والضفاف
عبِّى الحناجر بالهتاف
سدِّد مسامات الرِّعاف
نوِّر مغاراتنا وكهوفنا


يا مشرع الحلم الفسيح
أنا وإنت .. والمطر الفصيح
حانطوِّع الزمن القبيح
نأخد بعض .. شكل السما
حدِّثنى دايماً .. كلما
تنشف على البر الضفادع
يهجر الضو المواضع
وتسقط من الكف الأصابع
حدثني دايماً كلما
تحرد مراسيك السفن
تسكن مرافيك الزعامات .. الدُمى
حدثنى لو تاهت خطانا ..
على الدروب المبهمة
أو ربما..
تهدم آلات الشوارع ..
وترجمْ العُزّى الصواقِع
حدثنى لو مطرك همى ..
حدثنى لو صادف الكى المواجع
وضلك على الساحل رمى
حدثنى لو مطرك همى
علمنا دايماً كلما
نبذر على أرضك شهيد
يطلع شمس ..
يبهر بأنوارو السما

يا مشرع الحلم الفسيح

[ساداتكو]

راقة حقاً يا هذه باختيارك دائماً لما يعيشُنا في الزمنُ الفسيح...

شكراً لهذا الاختيار الجميل وردتُنا الراقية...

ودمتي للمزيد عنواناً...

[Abu baker]

يا مشرع الحلم الفسيح
أنا بينى مابينك جزر
تترامى .. والموج اللّديح
القدرة والزاد الشحيح
كملتو .. ما كِمل الصبر
نتلاقى فى الزمن المريح
ميعادنا فى وش الفجر
يا مشرع الحلم الفسيح

يا مشرع الحلم الفسيح
يا بعض منى .. وفينى ساكن
أنا أصلى منك ومشتهيك
و بيناتنا ليل الغربة ... داكِنْ
هبّة هبوبك..
أفتح شبابيك المساكن
وسـِّع دروبك ..
ولـِّع مصابيح الأماكن
يا مشرع الحلم الفسيح

سلام روز .. سلام ساداتكو ..



جميلة جداً ورائعة كما كل أزهري محمد علي ..
لك التحايّا فالإنتقاء رائع .. كوني النجمة ...!

الصباح الباهى لونك

وضاحة يا فجر المشارق
غابة الأبنوس عيونك
يا بنية من خبز الفنادق
شيدتي في جواي صوامع ... للفرح
وفتحت في دنياي مسارح ... للمرح
وبقيتي لي سكة وعيون
لا قدرت أطولك شان أجيك
لا قدرت من غيرك أكون
وأنا بيك ماليني الكلام
حركت بيك عصب السكون
جلبت ليك الغيم رحط
طرزت ليك النيل زفاف
حرقت ليك
الشوق بخور
وفرشت ليك
الريد لحاف
لا السكة بيك بتنتهي
ولا معاك مليت الطواف
يا ريتني لو اقدر أكونك
وضاحة يا فجر المشارق
الصباح الباهي لونك
يا بنية من خبز الفنادق
غابة الأبنوس عيونك
وضاحة
لو طال الطريق
بيناتنا واترامي المدي
وصنَت مسامعك من نداي
شربت فيافيك الصدى
ما تحني هامات النخيل
ما ترمي دمعات الندي
ما تشنَفي الزمن الجميل
دا العمر يا دابو ابتدأ
والعمر إيه حيكون بدونك !
وضاحة يا فجر المشارق
الصباح الباهي لونك
يا بنية من خبز الفنادق
غابة الأبنوس عيونك


وأخري تحكي روعة التعبير ..

قصيدة "يا زولة " أزهري محمد علي

الصوت الطالع مني
بِدّي مسامعك راس الخيط
و الشوق البِحسِب حَب الرمل التحتِك
بِعرِف رنّة ضحكِك ..
رقم الهاتف ..
و شارع البيت
و الخوف البِفضَح صمتي
بِعرفِك إنتي
يعلم إنّي
ماني المالي هدومي
و ما في الجُبَّةِ إلّا إنتي ..
زولة ..
و كاكاو الدم الفيك
مين السّماكِ سِفاح
من رحم أبنوسة و نخلة
مين الورّاك إفراز الشهد
و أداكِ مذاق من ريق النخلة
كضّابة الغابة القالت
تشتِل أنناسة على الصحرا
كضّابة القلتي
حتفصّلي توب العيد للهلة
كضّاب القلتَ
ملحوقة خطاوي المهلة
يا زولة ..
مخنوقة الشهقة الفي رئتي اليمنى
محمومة خلايا الدم و الزفرة
مهمومة شعاب القفص الصدري
ممحوقة حُلول الشِفرة
مفقود مفتاح الباب السري
تذّكر؟ ..
وين لاقيتَك صُدفة ؟
قالتلي – حبيبة القلب الأولى
و الفرح المُعلن مدسوس
دسيت على رِحم الذاكرة النطفة
في هذا الزمن السوس
إتْرَفَعتْ بيناتنا الكُلفة
غنيتِك نخلة و أبنوس
و مشيتِك متقرّب لعيونِك زلفى
تذّكر؟ ..
وين لاقيتَك صُدفة ؟
أذكُر كنّا عناصر شتى
إكتملت بيناتنا العفّة
و الصيف اللاذع شتّا
صفق النيم إتساقط حتَّ
طرفة لمحتِك
قلت النفس
الأبى يتختَّ
يضحك صحوِك
نوّر كلَ مناحي الحِتة
و ما إتسائلت عن إسمِك حتى
إتلمينا عليكِ و بغتة
دسيناكِ من خفر الليل
فسحناكِ المليون ميل
صرّينا تراب أقدامِك في المنديل
و شهلناكِ هتاف
.. و مديح
.. و صهيل
و قدّمناكِ قُربان للنيل
و كان من عندِك بدت الصحوة
جيتِك مِنّك
شادّي خيال الشوق الصهوة
بدينا نفلّي الروح
من نزق الشهوة
و إترجّلتَ بفعل النخوة
جلسنا نخمّس فنجان قهوة
إتشاركنا الزاد و المقعد
فتحنا ملف الزمن الأبعد
قام الفرح الطوّل مُقْعَد
لاقيناك دلوكة و دبكة
و إتسالمنا سلام غُبار السكة
زولة ...
و كاكاو الدم الفيك
مين السماك سِفاح ...

[ابو الصادق]

الق
في
الق
هذا البوست
لسيدة الاختيارات الجميلة

ولسادة الحضور الرائع
ساداتكوا
ومجتبي
الف شكر
واعجاب

[ساداتكو]

تسلم الحبوب ابو الصادق على هذه اللمسة والألقُ محله أنت اينما حللت كان أنت...

وإذا تغيبت ظل يُنادي فيك ... ليتك تعود لتزين هذه السطورُ....

ودمتم ابو الصادق

[Abu baker]

الق
في
الق
هذا البوست
لسيدة الاختيارات الجميلة
ولسادة الحضور الرائع
ساداتكوا
ومجتبي
الف شكر
واعجاب

سلام الحبيب أبو الصادق .. وحضورك يجعلنا دائماً ما نتردد قبل الدخول لأنك وقار وكلك حِضور ... سلامنا للحبيب المصطفي صلي الله عليه وسلم ..

معاي وغِشِيْتَك .. أزهري محمد علي

معاي وغشيتك أسلم عليكي
واتكِل قصادك هموم الحراز
أطمن طيوف الخريف الوشيك
وأبشر دواخلك بوعد الرزاز
مـودر مـلامـحك غبـيتك
لقيتك بتلفظ شوارعك بيوتك
تصادر خطـاي وتكاجر مشـيك
تغالط حواسك ملامحك
وتحرد عيونك مقاطع وشييك
سالتك خبارك؟خبارك مسوكر لسانك وصمتك يشفق
خبارك بتغرب شموسك.. زمان الشموس البتشرق
تضيع الملاح التعطن وجيهك ومنك تدفق
خبارك غريبة؟
بقلب دواخلك بكوس الحبيبة لعلك بتفرق
بتفرق حبيبتي البتلبس فصول الخصوبة
بتضحك أغاني وتدفق عزوبة وبتنزل مطر
عشقتك لانك ..لانك حبيبتي و بحبك بحر ...
عشقتك لانك خواتم الحقيقة وطريق الوصول
لانك بداية الخليقة واساس القبول
بحي الغيوم البتفطم زبولك ترضع سهولك مواسم الهطول
واحي المداين البتفتح حدودها وتمنح عيونك جواز الدخول
يزيد خيرك ولا طابت بلاك عيشة
مقسمة انتي في غيرك مقسمة فيكي ما فيشة
ومخيم ليللك العسعس
لا برقن بروق صحوك ولا صبحك رضى اتنفس
يحندك في العطش غيمك تمطري انتي في الخاطر
وتنفضي من دواخلي العس
بديت اتسامى للآخر رميت توب البيات الرس
قويت .. وإتيقنت روحي
وسقط من الكلام الغتس
دنا الداخرك بصيرة وشوف
يا بقع الضو في عتمة قلبي المحفوف
ومسربل في الشتا والليل والخوف
فارعة ومليان بكى ضيقة عليك البشرة
أنا غيبتك بيني وكنتك زملتك في الخاطر بشرى
نزلتي ستار الجلد الهـش وطلعتي من الجسد القشرة
تاوقت لقيتك ..لقيتك فيني النفس الكاملة
تتوقي اليابسة والنهر
يتسارق ضوك خافت متهافت نحوك اجري واهرول راكض
سابقت خطاي وحدقتي الغيمة وضل وبحيرة
ضاربتك بيني وضاريتك من الحزن القابض نفسي وروحي
ورابض عارض ستفت عيونك بالمطرة وقرعتك ضد الزمن الراكض وحدقتك حبيبتي البتلبس فصول الخصوبة
بتضحك أغاني وتدفق عزوبة وبتنزل مطر
عشقتك لأنِك.. لأنِك حبيبتي وبحبك بحر ..

[rose]

الرائعون بلا إنتهاء ...
المجتبى صاحب الحرف الأنيق .. والألق المترامى .. حولنا ..
ساداتكو .. تتناثر فينا إبداعا .. نجدك أمامنا أينما حلت الروعه ..
أبوالصادق .. يُخطىء الحرف إختيار الشبيه .. ويلملم نفسه إنبهارا ..

أزهرى محمد على يتفوق كثيرا على نفسه ويتداعى ...

وهذه أبداكى من وين .....


أبداكى من وين ..

أبداكى من وين .. وفينى منك لسة حاجات

من مخاوف ومن شجن

أبداكى من وين .. وظنى إنك

فكرة إعلان الحياة

وإنتهاءات العوارض والمحن

نفسى ألقاكى وأكون

أنا كلى من بعضك

أو .. بعضى من كلك بدن

وداير أبقاكى وأوحد دورة الدم

المقسمة بينى .. بينك .. والسحن



أبداكى منى .. ولاّ منِّك

أبتديكى محل .. محل

من ياتو منفذ أدخلك

وكل المنافذ فيكى سدّاها النحل

من ياتو شارع أوصلك

وكل الدروب معطونة لى آخر الوحل

.. أستبيح كل الحواجز .. وأدخلك

من كلامك بدخلك

من بين مسامك بدخلك

من أى قاسم مشترك

وشبهة تشابه .. ادخلك

ونتلاقى نهرين من تسامى .. وإشتها

وأبداكى من حيث أنتهت عندك خواتم الإنتها

أبداكى .. وأخلع خيام عمرى المضى

وألقاكى مبسوطة اليدين

مفتوحة أبواب الرضا

أبداكى من لحظة أنستِكْ نار

وأخدت من قبسك .. هُدى

وأنا ضُمـّة زاهد

فى الدروب الما بتجيك

.. ولا بترجِّع ليا من تالاك صدى

أبداكى من وين ؟

ودام الألق والحضور الجميل ..

ودام الود

[ساداتكو]

شكراً الراقية روز للزيادة وما يحرمنا منك ان شاء الله...

دومي كذلك لتحدثينا عن البداية المُمكِنة...


دمتي...