مرور ربع قرن على رحيل الغناى إسماعيل حسن(ود حد الزين)

[سارة شمو شاع الدين]

اقام منتدى اروقة حفل تأبين بمناسبة مرور خمسة وعشرون عاماً على رحيل الغناى إسماعيل حسن ود حد الزين (رغم تحفظى على كلمتى حفل ومناسبة) وبالتأكيد انا اقل قامة ان اتحدث عن إسماعيل حسن ولكن لى شعر إجتماعى اود مشاركتكم فيه.
&
عندو دكان كان
مستف بالملابس والحراير
والخلق مالياهو تزحف
كل يوم مزحوم وفاير
والزباين ديه جايه وديه فايته
وديه شايل وداك بتفرج وزاير
المهم احوالو طيبة والزمن فى صفه ساير
يوم من الايام لقيتو
للرفوف الفاضية ينفض وحاير
قلت : شن حاصل عليكم ؟
قال لى : ما جار الزمن
قلت: كيف؟
قال لى : راس المال غرق
فى بطون أُمات بصاير!!
فى بطون أُمات ضفاير!!
ويا سلام .
&&
حكاية سماعين ود حد الزين
(حكاية تشبه الاحياء الجديدة)
من بلدنا وجا المدينة
جاى وجاى قام أغتنى
وفى إمتداد الاولى
سوالو بيتاً من قصر
المهم خلا الاهل لا براسل
لا بواصل
وعاشر الناس الكتر
والزمان دولابو داير
ويوم يتم كل ناس بتساووا عندو
المبطر والفقر
بالصدف صادفنى مأتم
والخلق فوق الكراسى
وكلهم ناس صفر
فى الحقيقة قلت المات خواجة
قلت لى واحد بيضحك
انت اسم المات منو ؟
قال لى : بابكر ود بابكر
قلت : دنيا
فى البلد نحنا سامنو ابكر ود ابكر .
* ولاسماعيل حسن قصائد لاتقل اهمية عن شعره الإجتماعى
وا أسفاى .
صُدفة .
الوصية (اوعى يا قلبى تنسى).
بعد إيه(إعتذارك ما بفيدك).
*ويكفي اسرته فخراً فقط إذا إكتفت بقصيدته الوطنية
شايقى ودنقلاوى وجعلى
إيه فايدانى
غير خلت اخوى عادانى
يكفى النيل ابونا والجنس سودانى.

[Abu baker]

سلام .. سارة ..

ونسأل الله أن يتقبله قبول حسن ..
وأصلو نادر ..
ومن طبيعة طبعو نادر ..
كيف جني الريل يطيق سكن البنادر ..
ـــــــــــــــــــــــ
حنان الدنيا ممزوج في عيون الإلفة والطيبين ..
مراسي الشوق تودينا وتجيبنا علي هوى الحلوين ..
وهُم ياهُم وحات الله طيبه ومحنَّة ..
ــــــــــــــــــــ
قلبي مشدود فوق ضلوع الليل وتر ..
غني للشوق من قديم لليلة "أصلن" مافتر ..
جوَّاب دِروب الكون ..
بِكوس أرض الحُنان ..
حتى إن بقت ..
فوق ..
القمر ..
ـــــــــــــــــــ
القمر بوبا .. اسماعيل حسن ..

الصغيرة شجيرة الأراك
ياقمر عشرة الفي سماك
شاغلة روحي وقلبي المعاك
وين لقيتك لامن آباك
القمر بوبا عليك تقيل

العيون الما بدمعن
نامن أو صاحيات يبرقن
لا بصيدن لا بعشقن
سرهن في الجوف يحرقن
كشفن رموشن أو غمضن
كلو موت ماتقول برحمن
القمر بوبا عليك تقيل

الصغيرون الما كبير
الرقيبة قزازة عصير
السنون براقن يشين
العيون متل الفناجين
مابتحش قشة تناقير
مابتشيل جردل على الزير
الزراب فوقا تقول حرير
شتتي شبار يامضمير
خلي قلوب الصبيان تطير
انتي ريحتك دمور فرير
ولا بت السودان اصيل
القمر بوبا عليك تقيل

الجزير ام بحرا حما
فيك روحي وحبي النما
مابسيبا ان بقا في السما
ما بخلي الناس تظلما
روحي في دربك سالمة
يا غرق يا جيت حازمة
القمر بوبا عليك تقيل

القديما قديما الحمام
الوديزين في موجو عام
يا مرايقة قليلة كلام
وا حلاتا تقول السلام
القمر بوبا عليك تقيل

الغزال الفوق في السلم
المحبة تزيد الألم
كل يوم اصبح لي في هم
سيسبان عودك منظم
شمعدان نفسك يامختم
البرتكان نهدك مدردم
القمر بوبا عليك تقيل

الصغيرون ام الجنا
ياكريم ربي تسلما
تبعد الشر من حلتا
جنة للأم الولدتا
الفي جبل عرفات وضعتا
تسلم البطن الجابتا
دي ترباية حبوبتا
التميرة الفي سبيطتا
الصفار صابغ خضرتا
معزورة امها كان دستا
وا هلاكي النار شافتا
معزباني انا ود حلتا
القمر بوبا عليك تقيل

الدفيفيق الدابو ني
البسيمتو بتكويني كي
اهلو ضنو عليها وعلي
حبها النساني والدي
ما بخليك ان بقيت حي
يا قصيبة السكر الني
نهدك الما رضع جني
ووب على امك ووبين علي
القمر بوبا عليك تقيل

الديوان الديمة مقشوش
بالزهور والورد معروش
بالحرير الأصلي مفروش
ريحتو مايقوما بلا رتوش
كان دا وصفو ماهو مغشوش
قدروا الساكنينو في الحوش
القمر بوبا عليك تقيل

بحر الدميرِ العض ونزل
مرة يسقي الفل والنخل
فيهو عام وزينا وقدل
ياهنينة البيك عقلي انشغل
بعت روحي عشان ليك اصل
وانت ابعد لي من زحل
يا قمر بوبا عليك تقيل

المبارك شيخ الظهر
العليك ساسكت وفتر
قلي جنيت ولا دستر
واي أنا المرضان مكنتر
جابو لي حكيم خير وشر
قلي يا زول مرضك كتر
سببك كم شلاخا خضر
القمر بوبا عليك تقيل
رحم الله ود حد الزين ..

تحية الحضور والذكريات العذبة ..



أبوبكر ..

[الكليس]

سلام ايها الرائعه دوماً :
هذا الاسماعيل تغلغل في وجدان السودان حتى صار سوداناً .
بنى اعشاشه وافقس شعراً على سعف النخيل .
وهاجر مع عصافيره . واصبح منسوجاً في مناديل العذارى .
رثاه ودبادي قائلاً :
رحيلك ما رحيل اجيال
رحيل بلداً تمام وكمال
يا العشعشت في نخل السواقي الشال
واتبللت من المويه بين السعفه والبلال
بعد عرقك ضرب في ترابنا حد ما شال
اتلفتنا غادي وجاي وما لقيناك يا انسان

[ساداتكو]

اؤلئك انتم اذا ظهرتُم في حُلتكُم الخضراء...

هيا تدفقوا لذكرى ذلك العملاق...

فالذكرى هي التي تثبت بوجود العمالقة فينا دوماً...

رحم الله ود حد الزين الذي استنطق الأجيال حتى نحنُ...

...

[rose]

مررتُ وإستوقفنى البوست ..
فوجدت الركب ميمونا .. وتزينه روعة المحتوى ..
التحية لكم .. سارة والحاضرين جميلا ..
ورحم الله ود حد الزين بكل حرف فجّره حنينا وحبا للوطن ولإنسان هذا الوطن ..
ودمتم بهذا التعافى والجمال ..

ودام الود

[ابو الصادق]

الاخت ساره والمتداخلون اصالة معدنكم وانتم تحتفون بالذين قدمو عصارة فكرهم من اجل الوطن اسماعين حسن رحمه الله مزروع بحب الوطن شاعر

بلادي اهلا يا بلادي الف تحية ليك من الفؤاد

بلاد ناسا مواريث كتاب الله

بلاد ناسا تكرم الضيف وحتي الطير اجيها جيعان من اطراف تقيها شبع

وبنوتا
واخيرا

لعل الرائعه ساره شمو اختلط عليها الشاعر الوطني الهمام اسماعيل حسن باخر همام هو يوسف مصطفي التني علي ما اذكر شاعر
نشيد العلم
نحن جند الله جند الوطن
وشاعر في الفؤاد ترعاه العناية بين ضلوعي الوطن العزيز

واظنه صاحب الابياتويكفي اسرته فخراً فقط إذا إكتفت بقصيدته الوطنية
شايقى ودنقلاوى وجعلى
إيه فايدانى
غير خلت اخوى عادانى
يكفى النيل ابونا والجنس سودانى


علي كل

رحم الله كل من خط علي التاريخ حرفا من شذي روحه تغزلا في حسن عازه


الف ورحمه ونور علي قبر اسماعين ود حد الزين

وعلي شعراء الوطن من جم