المساعد الشخصي الرقمي

مشاهدة النسخة كاملة : بركل الحب والجمال نص لا ينتهي !!!! تكلمة (2)

حمدي السمر
08-06-2010, 12:33 AM
مدخل :
اربعة ايام من العمر لاتنسي ...
حيث كنا في ديار الشايقية (البركل تحت)
حيث اللطافة والجمال ...
المناسبة زواج الصديق العزيز
عبد الله محمد الحسن

نص :

الثلاثا
من 8 لحدي واحدة
القمر راسم ظلالو
علي النخيل والقمرا شاهدة
الموافق شهر خمسة
يوم كأنو كليمة همسة
واللا لمسة
لمسة من ايدين حبيبة
المكان حفلة في كريمة
وفي مكان سموهو بركل
الجمال في إي شارع
بالفرح والشوق منعكل
حفلة بي طنبور يقوقي
وصوت نغيماتو الحنينه
فاض وتسرب عروقي
وبابكر صادح يغني
زي تقول اديتو شوقي
حفلة كاربة
ودارة رابة
6 من كورس منظّم
في ابتهاج الصفقة ضاربة
الدليب طبّالو مُبدع
للرِزم والدُم يجدّع
حاجة تبهج للمشاعر
وكل احزانك تودع
كنت مستمتع بصوّر
في جمال من ريف طبيعي
كنت مستمتع حقيقي
حفلة خالية من الدمامه
واي زول شايل ابتسامة
بهجة ما بعديها بهجة
الشوايقي يا احلي لهجة
من قبيل قاعد بصوّر
ومن بعيد شايف حناسة
ولمة زي موكب رئاسه
اتلفتَ علي صديقي
وبي اختصار قال ليا
باخلة
قلت ليهم خصموها
خصموها وفجاة قامت
من محلتا هادلة عامت
الخلوق وقفت تصفّق
والقلوب بي ريدا هامت
جدّعت ديسا المسدّل
فوق قفا الكفية العجيبة
ناري زادت لي لهيبا
العيون بي شوقا نامت
وفي الخيال مرَقَت تجيبا
حاجة زي من جنة واقعة
واللا سرسار موية ناقعة
وانت ريقك كلو ناشف
برضو آسف
ياخي كيف اقدر اوصّف
رقتا وضحك الانوثه
القلم ضارباهو سوسه
سوسة الدهشه التنقر
لهفة الكرسي البتاوق
منتظر رقة جلوسا
رابطة توب النص مكرّب
في ضمير كملان وناحل
عالية في حتات علاها
والعيون ناعسات كواحل
النغيمات زاد إيقاعا
الدليب مخنوق مولّه
حتي فوق الرقصة طاعا
ولسة عايمة
وبي براحة الدارة حايمة
ملكة والكورس حراسة
وقادلة زي نِقِيز دباسة
الخلوق طربانه هايشة
وسلّمت لي كل حواسا

= يتبع =

بقرسة
2010



بابكر : صاحب الصوت العذب
(بابكر البرصة )
مالديني
08-06-2010, 01:12 AM
تسلم باحمدي علي النص الشعري
الابدااااع
والتصوير الجميل
نحي البركل وكريمه
في انظار الباقي
حمدي السمر
08-06-2010, 01:20 AM
تسلم باحمدي علي النص الشعري
الابدااااع
والتصوير الجميل
نحي البركل وكريمه
في انظار الباقي

تسلم يا ملدنة يا حبيب
الباقي بجيك قريب
محمد الختم احمد محمد
08-06-2010, 02:20 AM
هههههههههه
حمدي البركل..

عمَــلَتا فيك
محمد الختم احمد محمد
08-06-2010, 02:22 AM
قلت لي ضارباهـو سوســة ..
حمدي السمر
08-06-2010, 02:33 AM
قلت لي ضارباهـو سوســة ..


سوسة الدهشة التنقر
رقة الكرسي البتاوق
منتظر رقة جلوسا
***
علي الجزيمة يا محمد
الكرسي زعلان انها قامت
***
محمد الختم ياخي خليني انوم
انا قايم بدري
محمد الختم احمد محمد
08-06-2010, 09:42 AM
سوسة الدهشة التنقر
رقة الكرسي البتاوق
منتظر رقة جلوسا
***
علي الجزيمة يا محمد
الكرسي زعلان انها قامت
***
محمد الختم ياخي خليني انوم
انا قايم بدري

الكترااااااااااابه.!
الدُراشابي
08-06-2010, 09:59 AM
لك التحية يا ود بقروسي

والله وبدون مجاملة نص في غاية الروعة والجمال ,,,

الصور الشعرية تمثلت امامي وكانها فلم مرئي ,,,

عشت مع الاحداث وتخيلتها امامي ,,,

لك التحية مرة اخري ,,,
ملاك فتوار
08-06-2010, 10:02 AM
لا استغرب كل هذا الجمال
عندما يحمل توقيعك
"بقرسه"
جمرية
08-06-2010, 10:11 AM
ابداااااااااااااااااع يا بقرسه
الضريوابى
08-06-2010, 10:13 AM
دمت ايهاالرائع بس اعمل حسابك الشايقيات ديل مايغطسن حجرك
حافظ شندي
08-06-2010, 10:15 AM
بقرسة
الله عليك ...كلمات قمة في الروعة ... واحساس فنان مرهف
ربنا يوفقك وتبدع لينا دوما..
في انتظار بقية الملحمة الشعرية على جمرا تهبو الريح.
محمد الختم احمد محمد
08-06-2010, 10:18 AM
لك التحية يا ود بقروسي

والله وبدون مجاملة نص في غاية الروعة والجمال ,,,

الصور الشعرية تمثلت امامي وكانها فلم مرئي ,,,

عشت مع الاحداث وتخيلتها امامي ,,,

لك التحية مرة اخري ,,,

وهذه بالضبط هي آلة النقاد..
الفاصلة..
الحاسمة
في نقد الشعـــر..
و تمييز الجيـد من الرديء ..

برافـــو حمدي.
حمدي السمر
08-06-2010, 08:22 PM
الكترااااااااااابه.!




:icon_razz::icon_razz:
حمدي السمر
08-06-2010, 08:24 PM
لك التحية يا ود بقروسي

والله وبدون مجاملة نص في غاية الروعة والجمال ,,,

الصور الشعرية تمثلت امامي وكانها فلم مرئي ,,,

عشت مع الاحداث وتخيلتها امامي ,,,

لك التحية مرة اخري ,,,

تسلم يا دراشابي
والحمد لله انها وصلت
لاني بالجد كان يوم جميل
حبيت الناس تشاركني فيهو
لك التحية اين ما تكون
حمدي السمر
08-06-2010, 08:30 PM
لا استغرب كل هذا الجمال
عندما يحمل توقيعك
"بقرسه"


الله يخليك يا ذوق ....
وما تحرمينا من مرورك البهي
حمدي السمر
08-06-2010, 08:32 PM
ابداااااااااااااااااع يا بقرسه

تسلمي ياجمرية تسلمي كتير
حمدي السمر
08-06-2010, 08:35 PM
دمت ايهاالرائع بس اعمل حسابك الشايقيات ديل مايغطسن حجرك


ههههههههههه تسلم يا خال ...
مجرد احساس بالجمال ....
فقط ...
مودتي
سماء
08-06-2010, 08:38 PM
ود بقروسى على قولكم الشى شنو
هههههههههههههههههههههههههههه
عاد لكن اصلهن الشوايقه بكايين
وحتى البيمشى عرسهن
بيبقى بكاى
يا وليدى استغفر
اكان ماك جعلى وكمان امو بت
اعم ابو
هههههههههههه





.......................
مافى شك انك فنان
مزيداً من الابداع
تحياتى
بقروسى
حمدي السمر
08-06-2010, 09:04 PM
بقرسة
الله عليك ...كلمات قمة في الروعة ... واحساس فنان مرهف
ربنا يوفقك وتبدع لينا دوما..
في انتظار بقية الملحمة الشعرية على جمرا تهبو الريح.


تسلم يا حافظ علي الكلام الانيق
ربنا يقدرنا نكون قدرو
تحياتي
حمدي السمر
08-06-2010, 09:06 PM
وهذه بالضبط هي آلة النقاد..
الفاصلة..
الحاسمة
في نقد الشعـــر..
و تمييز الجيـد من الرديء ..

برافـــو حمدي.




عاد دا بقي ... شغل نقاد
نحن مابنعرفلو
تسلم ود الختم
حمدي السمر
08-06-2010, 09:18 PM
ود بقروسى على قولكم الشى شنو
هههههههههههههههههههههههههههه
عاد لكن اصلهن الشوايقه بكايين
وحتى البيمشى عرسهن
بيبقى بكاى
يا وليدى استغفر
اكان ماك جعلى وكمان امو بت
اعم ابو
هههههههههههه



انتي غايتو يا سماء هههههههههه
الله يجازي محنك وقالو الجعلية ما بحبو الجمال
ولا شنو ... كمان كدي انتظري وصف الحفلة الكبيرة
حفلتي براااااااااااااي انا ... هع هع هع




.......................
مافى شك انك فنان
مزيداً من الابداع
تحياتى
بقروسى

الله يخليك يا زوق
قوار
08-06-2010, 09:29 PM
تصوير بديع يابقرسة
شكرا لك فقد عشنا معك أجواء الاحتفال بالكامل
وكالعادة ياحبيب نص مدهش
لا عدمناك يا راقي
سماء
08-06-2010, 09:41 PM
انتي غايتو يا سماء هههههههههه
الله يجازي محنك وقالو الجعلية ما بحبو الجمال
ولا شنو ... كمان كدي انتظري وصف الحفلة الكبيرة
حفلتي براااااااااااااي انا ... هع هع هع







كيف!!! النفس البشريه جُبلت على حب
الجمال والما بحب الجمال ....اكيد
فيه صم ثنق رونق ...........
بس اصلو وصفك كان على السجيه
كنت تغلفو ببعض المحسنات البديعيه
التى تشتت الافكار يعنى ما تكبو طازه:43we:

............
حفلتك براك ...خلى محمد الختم
وعماد المتمه يعملو بانل:icon_razz:
انت بتكون مشتت الفكر:43we:
حمدي السمر
14-06-2010, 11:10 PM
تصوير بديع يابقرسة
شكرا لك فقد عشنا معك أجواء الاحتفال بالكامل
وكالعادة ياحبيب نص مدهش
لا عدمناك يا راقي

الله يخليك يا قوار يا زوق
ودا المطلوب ... لانو جو كان بستاهل
كل الرائعين يكونو موجودين فيهو
طن من المودة
حمدي السمر
14-06-2010, 11:13 PM
بس اصلو وصفك كان على السجيه
كنت تغلفو ببعض المحسنات البديعيه
التى تشتت الافكار يعنى ما تكبو طازه:43we:


ههههههههه
المحسنات البديعة والرمزية في جو جميل زي دا
ما بتنفع

حفلتك براك ...خلى محمد الختم
وعماد المتمه يعملو بانل:icon_razz:
انت بتكون مشتت الفكر:43we:


والله صدقتي ... هع هع هع
حافظ شندي
14-06-2010, 11:20 PM
سلام يا بقرسة
منتظرين الجزء التاني كما وعدتنا....
د خضر الخواض
15-06-2010, 04:14 PM
لك التحيه يارائع ..البركل كم كنت مستمتعا بتلسلق قمته ..
وياليتك كنت حضور فى ليلة الجمعه أول الشهر بدار البركل مع أنغام صديق احمد وعبدالرحيم ارقى..ورواية مختار عجوبه عندما يهتز جبل البركل..
حمدي السمر
15-06-2010, 08:22 PM
سلام يا بقرسة
منتظرين الجزء التاني كما وعدتنا....

ان شاء الله انتظارك ما بطول
حبيبنا حافظ
حمدي السمر
15-06-2010, 08:23 PM
لك التحيه يارائع ..البركل كم كنت مستمتعا بتلسلق قمته ..
وياليتك كنت حضور فى ليلة الجمعه أول الشهر بدار البركل مع أنغام صديق احمد وعبدالرحيم ارقى..ورواية مختار عجوبه عندما يهتز جبل البركل..

دكتورنا الحبيب
ياخي كان تديني خبر
بالله تاني الحاجات الحلوة دي
ادينا بيها خبر
تسلم يا رائع
د خضر الخواض
15-06-2010, 09:58 PM
دكتورنا الحبيب
ياخي كان تديني خبر
بالله تاني الحاجات الحلوة دي
ادينا بيها خبر
تسلم يا رائع
لك التحيه ..
كان ذلك يوم الجمعه يوم عودتنا من مدنى..
وكان يوما رائع ..
اول جمعه من كل شهر منتدى البركل الشهرى بقيادة الاستاذه فتحيه محمد الحسن ..
حمدي السمر
15-06-2010, 11:34 PM
لك التحيه ..
كان ذلك يوم الجمعه يوم عودتنا من مدنى..
وكان يوما رائع ..
اول جمعه من كل شهر منتدى البركل الشهرى بقيادة الاستاذه فتحيه محمد الحسن ..


مية المية
تاني معاكم ان شاء الله
تسلم
روعة شندي
15-06-2010, 11:41 PM
قمة الروعة يا ودبقروسى
سنهوري
22-06-2010, 06:43 PM
بقرسة النيل نضارك
فرقت علينا كتير والله
ابداع متولدو احساس ينبوع فرح
حمدي السمر
22-06-2010, 09:05 PM
قمة الروعة يا ودبقروسى


تسلمي يا روعة الروعة
حمدي السمر
22-06-2010, 09:08 PM
بقرسة النيل نضارك
فرقت علينا كتير والله
ابداع متولدو احساس ينبوع فرح

النضار والجمال
وكل الاشياء المدهشة
هي مرورك من هنا صديقي الجميل
حمدي السمر
08-07-2010, 03:27 AM
تكلمة (2)


حررلولا الصفقة زادت
وانتنت زي بانة مادت
الخلق زحمة خليه
بي انبهار في الدارة ماجت
ناس تصف في إنبساطة
وناس قوام الشتلة جاطا
وناس تقول فجولا لسة
وزيدو في الدارة الاحاطة
ولسة سارح وعقلي رايح
وكلما تروق ليا موية
ألقي أصبع شوقي ساطا
وكلما عيني تمرق
شان تجيب من عينا نظرة
ترجع النجمة واباطا
ولسة مستمتع بصور
العريس في كتوف صحابو
منبسط ناير شبابو
ريدا ستة سنين بيحلم
تبقي في دارو ورحابو
الله أكرمو بي وجودا
ست حسان قلبو وعقابو
امو سوت لي الضريرة
وفي اليمين رابط الحريرة
جنو كل خالاتو جنو
جن يغنن ليْ ويهنو
بي أختصار الكل مشارك
بالفرح والخير يبارك
ولي للحارسين تاني نرجع :crosscrusher:
لي وصف زولتنا تاني
ياخي كملت المعاني
وسكة القول والاغاني
المهم الكرسي مبسوط
لما جاتو حواها حاني
مبتسم في نشوة هايم
والخلق شارفه وتعاني
ولما انقضت السويعات
اللي كانت زي ثواني
انتهت حفلتنا قمنا
وكل زول شايل الاماني

( خليكم قراب ولسة في الخاطر بقية )

بقرسة
2010
الدُراشابي
10-07-2010, 08:11 PM
بس اوع تكون طلعت من المولد بدون حمص ,,

لك التحية , ولسه للقصة بقية !!!
حمدي السمر
10-07-2010, 09:38 PM
بس اوع تكون طلعت من المولد بدون حمص ,,

لك التحية , ولسه للقصة بقية !!!


:tee43: يكفي انو نمرق بي الاحاسيس الجميلة دي