محمد ابو عاقله ليك وليكم ..... دم الدم

[سامى سر الختم]

صفق فردة نعال الريح
دموع حرجل سفوح صحرا
الغبش والخوف
برادع عتمة الدهشه
شحوب لونو
المشدر بين جروح وجراح
فتق عصبا بسند الروح
بنت تالاها هم اعصاب
صباح ليلا بكانو جرح
دخل لجة
براح الشوف
تحت فزع المراكبيه
الطفاشن لسه فى العتمور
قدر سطع الغروب دمعات
نجوم فى ليل دخل ما فات
سكن عش الحمام الطار
رحل من ولدو شان ينجم
دحين بنلم
مشتت زى حصا الالام
وزى وجع الغريب ما تم
يلاقى البت سميحه متل رذاذ مطره
ولو ضاقت عيونو فرح
بتتباصر تمرق الروح
تقول الدنيا ما فى بلاو
قدر جرح البلد
جواو ملان احزان
يحن مرات يجيو
تحنان يمش كلما المطر بتصب
يدب ويدب
دبيب قعدة دليب فى الروح
وفى صنت تبلديه
تشاور ليو
تعال ليا
وتعال ليا
اجيك مجداف
وسط صحرا الحواس والظن
ما بستن
بخاف من ايه
بجيكى اسع
نقالد فى صبرنا حلم
ونتذكر سوا الايام
وكت ما كنتى زى عصفور
وانا بغنيك
بخاف اسأل عليك الناس
وفى تهويمة الحس
البيرجع تانى للزمن الفلانى الفات
وفى عينيك عشم باكر
اقول ليكى
بعزك حتى لو خنتى
لأنك انتى زى الدم
يفوت بنموت
وبتذكر
اشوفك فى حلم ماضى
انا وانتى
ومعانا تلاته من احباب
وكنا اغراب
نفتش شان نظل عايشين
على النفس البيدينا العشق واللين
على حس الامل نخله
تجينا رياح
تسوقنا الريح
نفتش تانى عن معنانا
عن جوانا عن انسان
نفتش شان نكون حاجه
ونعود خايبين
يجينى ملاك حسيسك صاد
واكون فى الساعه ديك ما بين
واطنش انو ده الاحلام
اكيد حا تبقى دى الاحلام
يعاود فى جواى سريان
يضخ الدم
بعزك حتى لو خنتى لأنك
انتى دم الدم

[Abu baker]

سلام .. سامي ..

سلاسة .. دقة .. روعة .. صفق فردة نعال الريح
دموع حرجل سفوح صحرا
الغبش والخوف
برادع عتمة الدهشه
شحوب لونو
المشدر بين جروح وجراح
فتق عصبا بسند الروح
بنت تالاها هم اعصاب
صباح ليلا بكانو جرح
دخل لجة
براح الشوف
تحت فزع المراكبيه
الطفاشن لسه فى العتمور
قدر سطع الغروب دمعات
نجوم فى ليل دخل ما فات
سكن عش الحمام الطار
رحل من ولدو شان ينجم
دحين بنلم
مشتت زى حصا الالام
وزى وجع الغريب ما تم

لك التحية سامي .. وأنت تكتب لتجيد فتبدع .. ونحن كمان بنسأل من أخونا محمد أبوعاقله وينك يارائع .. وعزرك معاك لحدي ما ترجع ..

دمتم بهذا البوح ..

مجتبى ..

[سامى سر الختم]

ليك التحيه مجتبى وتسلم على كلماتك الراقيه
واسلوبك الاسلس من كل شئ
وابقى طيب اينما تكون وكيفما تمنيت
ولك وعليك السلام

[المه]

سلام سامى
الروعة منك
والله رائعة
انت دم الدم

[محمد ابوعاقلة]

وانا الكنت في بلدا
مشتت زى حصا الالام
وزى وجع الغريب ما تم
يلاقى البت سميحه متل رذاذ مطره
ولو ضاقت عيونو فرح
بتتباصر تمرق الروح
تقول الدنيا ما فى بلاو
حليلك يا ولد ... يا بوح
وما متلك
مشتت زي رمال درباً خطاه جروح
وبتكل نفسي بي دعوة
وبدارك اذا ما اتلفلفت مِحنه
دواخل الروح

جيتك ... بوافر الشوق
وطفيف الحب ... عشان ما لقيت مقاسك
فك الكفه ... واقبل باي حاجه
ياخي ازيك ... وكل سنه وانت طيب

[سامى سر الختم]

وانت طيب والبلد المشيت لها انشاء الله
ماترجع ليها لولى الدرجه دى ولو كمان بلد ناس عزاز
مصيرك ترضى بيها
والفكره لوبقت واسوق وينا الطوريه البىتبقى بت
ولو الطين عرس صارقيل يمشى وين الحواتى الزينا
وغايتو بتمنى اكون قيفة فى عز الغرق
لانو المجاديف اتكسرت وكتين ما لقيت الدفه الا
فى عتنيبة الحواس المطهرة
بالمناسبه اكان سألت واحد سودانى معانا هنا
من العتنيبه اوعى تكون ما عارفا.........

[Abu baker]

وانت طيب والبلد المشيت لها انشاء الله
ماترجع ليها لولى الدرجه دى ولو كمان بلد ناس عزاز
مصيرك ترضى بيها
والفكره لوبقت واسوق وينا الطوريه البىتبقى بت
ولو الطين عرس صارقيل يمشى وين الحواتى الزينا
وغايتو بتمنى اكون قيفة فى عز الغرق
لانو المجاديف اتكسرت وكتين ما لقيت الدفه الا
فى عتنيبة الحواس المطهرة
بالمناسبه اكان سألت واحد سودانى معانا هنا
من العتنيبه اوعى تكون ما عارفا.........

سلام سامى ..ويحضرني "الكبشور" وهو البرش العتنيبه الملون الزاهي الذي يجلب من منطقة جنوب كُردفان .. وأيضاً تحضرني طقوس العرس السوداني في كثير من المناطق"الجرتق والدلكه والخُمره والحنه والمحلبيه والصندل والضفره وهي انواع من الروائح" والعتنيبه والفِركه.. والحُق ذلك الإناء للروائح وهو خشبي مُزركش ومطرز ابداع سوداني بالتخصص ..
فقد تشكل العتنيبه علي حد علمي برش عادي قد يكون ملوناً وقد تُشكل البرش الذي يستخدم سجاداً ونستخدمه للصلاة .. وأيضاً قد يكون عبارة عن برش طويل يستخدم ستارة أو قل كسوة تغطي بيوت القش من الداخل تماماً بس يبدو لي دي إسمها الحَجلَة ويُلوَن بها بيت العريس .. والله أعلم .. ومنتظرينك يا سامي توضح ما تشابه علينا .. وتسلم يا سليم الذوق ..

مجتبى ..

[محمد ابوعاقلة]

وانت طيب والبلد المشيت لها انشاء الله
ماترجع ليها لولى الدرجه دى ولو كمان بلد ناس عزاز
مصيرك ترضى بيها
والفكره لوبقت واسوق وينا الطوريه البىتبقى بت
ولو الطين عرس صارقيل يمشى وين الحواتى الزينا
وغايتو بتمنى اكون قيفة فى عز الغرق
لانو المجاديف اتكسرت وكتين ما لقيت الدفه الا
فى عتنيبة الحواس المطهرة
بالمناسبه اكان سألت واحد سودانى معانا هنا
من العتنيبه اوعى تكون ما عارفا.........

لسه قاعد في البلد المشيت ليها وصبر
ما كان نشوقي عبارة عن رجعة دمُر
لسه قاعد في انتظار ...
أو مشتت في نهايات من عمر
..........
الليل عرِش راسي وسكون
والعيون صبابة في الورق المستف بالشجون
سهران براي

[محمد ابوعاقلة]

والفكره لوبقت واسوق وينا الطوريه البىتبقى بت
-----------------------------------
وللواسوق بنات أفكار بتخجل لو أرض بارت ...
كالمجبور علي بت عم ...
او طورية تتلفت اذا رفضت أرض تتشم ...
كما تحلم بإنك أب ...
تحش باقي الضلام بي ضو
تخش من ضو
وتخرت من دواخلك شوف
طفيلي الخوف...
بتتشعب اذا عرف الحقيقة الصوف
ولف وشك ...
اذا الواسوق بزق في وش الطواري الشك

[سامى سر الختم]

ولا زياده على كلامك مجتبى

[سامى سر الختم]

مع انو مافى الطوريه البى تبقى بت
لكن فى الزول الببقى احساس
بى يخش الجوف

[محمد ابوعاقلة]

سامي

يجينى ملاك حسيسك صاد
واكون فى الساعه ديك ما بين
واطنش انو ده الاحلام
اكيد حا تبقى دى الاحلام
يعاود فى جواى سريان
يضخ الدم

يا ود يا سامي ... وينك
انا مرات بدخل في غيبوبه وزن عشرة
ما تيأس لو زماني سرقني فات
او حتي جيت قبل الميعاد