بإسم الدين !!!

[أنور ميرغني]

مدخل :
عشان أرضك يجيها المطر
لازماً عليك تدفع رسوم
وإن عاندت أو قلتها لا
ياما بالنهار حتشوف نجوم
نص :
ذو الدقنة النسناس
ولّا العسكري
الما بعرف كتابة إسمو
منو الفيهم غرق بلدنا الكان
بضاهي الشموس رسمو
منو الختف اللقمة
من إيد جيعان
وكيل بالرماد خشمو ؟؟؟
منو ؟؟؟
وقال دة ياهو الدين
هو الدين أنهب أسرق
خُش الغابة ؟؟؟
ولّا الدين يتم شرِد
ألهف قوت الغلابة
هو الدين سجون ؟
الدين مقاصل ؟
طبنجات ودبابة ؟
كضابة يا دقون كضابة
دة ماهو الدين
دي الحرابة
وكفاية زيف
كفاية خداع
بإسم الدين بإسم الصحابة
وحريتنا يا دقون بترجع
مهما طال غيابا
صبُرنا عليك فات حدو
ومحال تاني الذلة نرضابا
وما بتهددنا الزنازين
لا أمنجية السلطة وكلابا
بنقلع حقنا زندية
ونرجِع سودان المهابة
بنقلع حقنا زندية
ونبني سودان المهابة