سوماج
18-09-2006, 12:17 PM
تراجيوكيمديا الضحك والدموع
أنفلونزا الصقور
هاشم صديق
عطسة أولي :
الحجوه
حجيتكم ما بجيتكم خيرا جانا وجاكم
أكل عشانا مص دمانا فات خلانا
يا زول ما تكتّر قول الحجوه
ما دايرين كفوه
محمد معانا ما تغشانا
سمح اسمعوا هي قونقوليسه وعامله منقه
شينه ومره وعامله شّنه طار ولمه .
في كلامه الخير علامه وبالفعايل نار قيامه
رقعوها ركبوها جته جبه
سمينه جقه وقادله ملكه
نافخه لي هدوما وكضوما
"كلوشا " منفوش راسها منكوش
صاحيه يومين دايخه شهرين داخله " كوما "
أها دي شني تبقي يا مطيميس ود بلومه
يا خي دي سااااااهله ما ياها الحيكوومه
عطسه ثانيه
الذاتيه :
" أنحنا زحفنا وكل العالم ما بوقفنا "
أستوردنا حديد ياباني
استحسنا قمح نصراني
"اتسحسحنا" لبان نرويجي
اتمسحنا "كريم" دانماركي
اتستفنا عذاب سوداني
اتقاسمنا نبق ايراني
استوردنا بخور اسباني
استحسنا كلب امريكي
واستفضلنا كديس بريطاني
استوردنا خروف ايرلندي
واستعجلنا "سماد " يوناني
استلهمنا خطاب من مالطا
واستصحبنا ضمير "كوزاني "
استوردنا تلج من كنجا
واتدينا " مدمس " غاني
استنفرنا سيوف من بورما
واستعجلنا "كلبش " انساني
اتعاقدنا مدرب هندي
واستصحبنا "شراب " اوغندي
واستفضلنا "كفر صومالي
استحسنا قلل كوبيه
استوردنا "فلل" بوذيه
استصحبنا تيوس تركيه
اتهافتنا قرود كينيه
اتداولنا "بنس "روسيه
استعجلنا ودك الماني
آآآآه ياااااني
استوردنا قطن سوداني
ْفلنأكل مما نسمع ولنطرح مما نجمع
ولنخمش مما نبلع ولنسمن مما نبلع ْ
(انحنا ولاد الجوع والمحنه
انحنا الفقرا وسرقو قمحنا
خريفنا الرازه واحلامنا حرازه
مخاصمه سمحنا )
عطسه ثالثه
الأغاني :
زمن الغنا " العولاق " صبح الطرب دقداق
حتي الاسامي تميل عشمانه غرب النيل
كوكو سن الفيل كباشي ود صارقيل .
يا مصنغات حي ووب يا "لجنه " قلنا الرووب
ما سمعتو" بت عنتيل "
بتغني نص الليل يا شوشو لايف بوي
اركب عديل ركشه يا فقري يا شطه
نتلاقا في الكبري شان نرسم الخطه
تمشي وتقابل ابوي يا شوشو قرر هوووي
يا لجنة الاشعار يا لجنة الالحان
ما فيش حقوق انسان ؟؟
أنا راكب الدفار اسمع " سماح ترعه "
اركب كمان تكسي اسمع "خميس نقعه :
أو أفتح الرادي يفلقني بالمنقه
اتحاوا بالتلفاز القا العمم واقعين
الربه زي تمرين اتنين يغنو انين
اللبعه باللبعه والبادي "ود بنزين "
اصحا الصباح نعسان
أقرا الجرايد اموت امشي الشغل مهموم
ضبلان تقول هلفوت أدخل لجمر السوق
يبلعني زي الحوت اشرب عصير ليمون
ألقا الغناء الربراب لاحقني بالدراب فالقني بالنبوت
أرجع لسجن البيت أفتح إذاعة "جيم "
القا المذيع طربان من صوت "منال برسيم "
ويسأل كمان فرحان "عن دور غنا البنوت "
أنا أمشي وين لي وين ؟ أطلب لجوء للصين ؟!!!
عطسه رابعه
الدموع أنفلونزا الصقور :
الشمس قرصت جل حلتنا في ساعة البكور
محمد احمد حك جلد احلامو لي فول الفطور
مسكين يا محمد هملان يا مرمد
يوماتي عليك محموم فليل
يوماتي عليك مغبون بالحيل
وسرسار الليل تف تف تف
ماسوره تنقط من عينيك
اوصالك شاكيه هواجسك صاحيه تهد الحيل
عينيك يا محمد زي شباك ضلفاتو قزاز
تزلق في المطره بزفرة حسره لسدر الشارع
وبالحيل آآآآآآآآه يا محمد
غربال الراس الليل وسواس والغيظ خناس
الدنيا شراع والوحشه شراع
مفتل مجداف ممكون في سيل
حاكت خطاك جادلت شقاك
لقيت اخترت تشوف بعيونك وما بسواك .
دقيت طبلين في الصنه الهامله
صداهن رج الريح الخامله
رشاش صب جحيم في عضاك
عضيت في توب الصبر الضيق
حلبت رضاك في جوه اذاك
آآآه يا محمد وصوك من قمت
تريد الرمضا عشان تتعلم كيف تتألم
تصحصح وتصحا بدون ما تصرخ
وترجا العون تدق الصنه تناجي الصاخه
تكون مجنون وتزازي تجابد ليل وبكور
كم ريس نضمو وساقو المركب
غرقت وشربت طين الخور
كم فالح كم طالح جاكا يهرول
في غباش حدادي في ليل مدادي
وقطع نور وحسع جاتك
كفوه في عطسه اخير العطسه
زكمه جديده سرت في الجو
ونزلت شو جابوها صقور
عطسه خامسه
الإتفاق :
حولاً تمام من قالو :
ابشر يا ولد حسع خلاص دغشك شرق
حولاً تمام صاجك مرمد
يا ولد ووشيهو ما صبح طرق
صلح السواد الاصلو ما فات الورق
عطسه سادسه
إعتداد:
جبيوا الشعرا شعرا السلطه
ولموا السحرا كل السحرا مقرم وأوسطي
جيبو ردودكم "ايميل" سيل
او بالبسطه قولوا شعركم
وأرمو حبالكم وأنحنا الشعرا
ضمير الفقرا رسل زي موسي
واصبر كف وآخر يد مداها بعيد
تجدع في الصف
حتلقوا " عصاتنا "رتت لحبالكم
ولقفت كف مكر السحرا
ونكرا الشعرا وحتي الامراء
وناس بيزنطه وأُجرا السيف.
الشعر ضمير ما لف او عك
والغامس قلبو في حبر شعبو
ما باع لعذابو براحة "كامري "
ورزم البنك والشعب بصير
بالصاح والحق بالشق والطق
بفقير او مك عارف صفو وقاطع الشك
عطسه سابعه
توكل :
"اتوكلنا عليك يالله بكره بنمرق
كلنا بره من كل مدينه من كل حواري
من كل حله بكره بنمرق كل خلق الله
ما بنخلي منافق طار بالزانه
ما نخلي نعولف داسنا اذانا
ما نخلي الباعو النيل وهوانا
ما بنخلي العقروا لناقه صالح
وحشو وريدها بالجبخانه
اتوكلنا عليك يا الله
بكره بنمرق كلنا بره نقوقي ونصفق للحريه
غبنا كاسر ميه الميه ندوس الكاتل والف سريه
نقلع حقنا بالزنديه "
عطسه ثامنه
نمه :
لا مديت أيدين حلمك علي المحظور
لا ظنيت عشان وجعك تقيف الدنيا تابا تدور
ولا كسرت ناي شوقك علي المستور
ولا سامرت بي حزنك ندم "ياريت "
لا يوما علي حالك رتيت حنيت
قلدت شقاكا يا مسكين علي نارك
دلقت الزيت
ولا غابت عيون وجعك
ولا سمعك ختاهو النور
عطشه ثامنه
توقيع :
عميان وشايف غبيان وعارف عشمان وخايف
مالي زي شدراً سكن بال الخلا أخضر وناشف
اعذريني ... اصلي ما بعرف شنو الفرح الموالف
الا بس لهب المسارب والمواقف ...
هاشم صديق
11/2/2006
أنفلونزا الصقور
هاشم صديق
عطسة أولي :
الحجوه
حجيتكم ما بجيتكم خيرا جانا وجاكم
أكل عشانا مص دمانا فات خلانا
يا زول ما تكتّر قول الحجوه
ما دايرين كفوه
محمد معانا ما تغشانا
سمح اسمعوا هي قونقوليسه وعامله منقه
شينه ومره وعامله شّنه طار ولمه .
في كلامه الخير علامه وبالفعايل نار قيامه
رقعوها ركبوها جته جبه
سمينه جقه وقادله ملكه
نافخه لي هدوما وكضوما
"كلوشا " منفوش راسها منكوش
صاحيه يومين دايخه شهرين داخله " كوما "
أها دي شني تبقي يا مطيميس ود بلومه
يا خي دي سااااااهله ما ياها الحيكوومه
عطسه ثانيه
الذاتيه :
" أنحنا زحفنا وكل العالم ما بوقفنا "
أستوردنا حديد ياباني
استحسنا قمح نصراني
"اتسحسحنا" لبان نرويجي
اتمسحنا "كريم" دانماركي
اتستفنا عذاب سوداني
اتقاسمنا نبق ايراني
استوردنا بخور اسباني
استحسنا كلب امريكي
واستفضلنا كديس بريطاني
استوردنا خروف ايرلندي
واستعجلنا "سماد " يوناني
استلهمنا خطاب من مالطا
واستصحبنا ضمير "كوزاني "
استوردنا تلج من كنجا
واتدينا " مدمس " غاني
استنفرنا سيوف من بورما
واستعجلنا "كلبش " انساني
اتعاقدنا مدرب هندي
واستصحبنا "شراب " اوغندي
واستفضلنا "كفر صومالي
استحسنا قلل كوبيه
استوردنا "فلل" بوذيه
استصحبنا تيوس تركيه
اتهافتنا قرود كينيه
اتداولنا "بنس "روسيه
استعجلنا ودك الماني
آآآآه ياااااني
استوردنا قطن سوداني
ْفلنأكل مما نسمع ولنطرح مما نجمع
ولنخمش مما نبلع ولنسمن مما نبلع ْ
(انحنا ولاد الجوع والمحنه
انحنا الفقرا وسرقو قمحنا
خريفنا الرازه واحلامنا حرازه
مخاصمه سمحنا )
عطسه ثالثه
الأغاني :
زمن الغنا " العولاق " صبح الطرب دقداق
حتي الاسامي تميل عشمانه غرب النيل
كوكو سن الفيل كباشي ود صارقيل .
يا مصنغات حي ووب يا "لجنه " قلنا الرووب
ما سمعتو" بت عنتيل "
بتغني نص الليل يا شوشو لايف بوي
اركب عديل ركشه يا فقري يا شطه
نتلاقا في الكبري شان نرسم الخطه
تمشي وتقابل ابوي يا شوشو قرر هوووي
يا لجنة الاشعار يا لجنة الالحان
ما فيش حقوق انسان ؟؟
أنا راكب الدفار اسمع " سماح ترعه "
اركب كمان تكسي اسمع "خميس نقعه :
أو أفتح الرادي يفلقني بالمنقه
اتحاوا بالتلفاز القا العمم واقعين
الربه زي تمرين اتنين يغنو انين
اللبعه باللبعه والبادي "ود بنزين "
اصحا الصباح نعسان
أقرا الجرايد اموت امشي الشغل مهموم
ضبلان تقول هلفوت أدخل لجمر السوق
يبلعني زي الحوت اشرب عصير ليمون
ألقا الغناء الربراب لاحقني بالدراب فالقني بالنبوت
أرجع لسجن البيت أفتح إذاعة "جيم "
القا المذيع طربان من صوت "منال برسيم "
ويسأل كمان فرحان "عن دور غنا البنوت "
أنا أمشي وين لي وين ؟ أطلب لجوء للصين ؟!!!
عطسه رابعه
الدموع أنفلونزا الصقور :
الشمس قرصت جل حلتنا في ساعة البكور
محمد احمد حك جلد احلامو لي فول الفطور
مسكين يا محمد هملان يا مرمد
يوماتي عليك محموم فليل
يوماتي عليك مغبون بالحيل
وسرسار الليل تف تف تف
ماسوره تنقط من عينيك
اوصالك شاكيه هواجسك صاحيه تهد الحيل
عينيك يا محمد زي شباك ضلفاتو قزاز
تزلق في المطره بزفرة حسره لسدر الشارع
وبالحيل آآآآآآآآه يا محمد
غربال الراس الليل وسواس والغيظ خناس
الدنيا شراع والوحشه شراع
مفتل مجداف ممكون في سيل
حاكت خطاك جادلت شقاك
لقيت اخترت تشوف بعيونك وما بسواك .
دقيت طبلين في الصنه الهامله
صداهن رج الريح الخامله
رشاش صب جحيم في عضاك
عضيت في توب الصبر الضيق
حلبت رضاك في جوه اذاك
آآآه يا محمد وصوك من قمت
تريد الرمضا عشان تتعلم كيف تتألم
تصحصح وتصحا بدون ما تصرخ
وترجا العون تدق الصنه تناجي الصاخه
تكون مجنون وتزازي تجابد ليل وبكور
كم ريس نضمو وساقو المركب
غرقت وشربت طين الخور
كم فالح كم طالح جاكا يهرول
في غباش حدادي في ليل مدادي
وقطع نور وحسع جاتك
كفوه في عطسه اخير العطسه
زكمه جديده سرت في الجو
ونزلت شو جابوها صقور
عطسه خامسه
الإتفاق :
حولاً تمام من قالو :
ابشر يا ولد حسع خلاص دغشك شرق
حولاً تمام صاجك مرمد
يا ولد ووشيهو ما صبح طرق
صلح السواد الاصلو ما فات الورق
عطسه سادسه
إعتداد:
جبيوا الشعرا شعرا السلطه
ولموا السحرا كل السحرا مقرم وأوسطي
جيبو ردودكم "ايميل" سيل
او بالبسطه قولوا شعركم
وأرمو حبالكم وأنحنا الشعرا
ضمير الفقرا رسل زي موسي
واصبر كف وآخر يد مداها بعيد
تجدع في الصف
حتلقوا " عصاتنا "رتت لحبالكم
ولقفت كف مكر السحرا
ونكرا الشعرا وحتي الامراء
وناس بيزنطه وأُجرا السيف.
الشعر ضمير ما لف او عك
والغامس قلبو في حبر شعبو
ما باع لعذابو براحة "كامري "
ورزم البنك والشعب بصير
بالصاح والحق بالشق والطق
بفقير او مك عارف صفو وقاطع الشك
عطسه سابعه
توكل :
"اتوكلنا عليك يالله بكره بنمرق
كلنا بره من كل مدينه من كل حواري
من كل حله بكره بنمرق كل خلق الله
ما بنخلي منافق طار بالزانه
ما نخلي نعولف داسنا اذانا
ما نخلي الباعو النيل وهوانا
ما بنخلي العقروا لناقه صالح
وحشو وريدها بالجبخانه
اتوكلنا عليك يا الله
بكره بنمرق كلنا بره نقوقي ونصفق للحريه
غبنا كاسر ميه الميه ندوس الكاتل والف سريه
نقلع حقنا بالزنديه "
عطسه ثامنه
نمه :
لا مديت أيدين حلمك علي المحظور
لا ظنيت عشان وجعك تقيف الدنيا تابا تدور
ولا كسرت ناي شوقك علي المستور
ولا سامرت بي حزنك ندم "ياريت "
لا يوما علي حالك رتيت حنيت
قلدت شقاكا يا مسكين علي نارك
دلقت الزيت
ولا غابت عيون وجعك
ولا سمعك ختاهو النور
عطشه ثامنه
توقيع :
عميان وشايف غبيان وعارف عشمان وخايف
مالي زي شدراً سكن بال الخلا أخضر وناشف
اعذريني ... اصلي ما بعرف شنو الفرح الموالف
الا بس لهب المسارب والمواقف ...
هاشم صديق
11/2/2006