صحوة الخرطوم

[أنور ميرغني]

من نومك أصحي يا خرطوم
كفاية سكات علي الغلط
لمتين بتحكمك شلة نشالين
تجار دين ونقط نقط
فيك ناس بتموت بالتخمة
وناس السل قاطيها قط
ناس خروفين بتتعشي
وناس تزاحم القطط
شعب عدمان الرغيف
والوالي ببلع ظلط
محاكم تدين الشريف
والقاضي واقف لط
لمتين السكات يا خرطوم
وأطرافك صابا القحط
لمتين وإنتي عروس النيل
ملامحك داسوها إنمحت
ويا طالب لمتين بتسكت
وشن فايدة تعليمك المنحط ؟؟
ما دام عزة باعوها
وعزها راح عبط
لمتين ؟؟؟؟؟؟؟؟

[Nachtigall]

فيك ناس بتموت بالتخمة
وناس السل قاطيها قط
ناس خروفين بتتعشي
وناس تزاحم القطط
شعب عدمان الرغيف
والوالي ببلع ظلط


الاخ انور ميرغنى
شكرا على القصيدة المارقة من الاعماق فوصلت الاعماق
وفى بيتين لخصت ماتعجز عن وصفه مجلدات..
لك التحية والتقدير

ناخ تيغال

[أنور ميرغني]

الاخ انور ميرغنى
شكرا على القصيدة المارقة من الاعماق فوصلت الاعماق
وفى بيتين لخصت ماتعجز عن وصفه مجلدات..
لك التحية والتقدير




شكراً كتير ناخ تيغال علي المرور والمشاركة لك ودي وتحياتي ..

[خالدعبدالمجيد محمد]

الاخ انور
صباحاتك خير
شكراّ علي القصيدة الثورية
ولكن هنالك اناس مثلك فان
عزه لا تروح عبط .
لك ودي وتقديري.

[أنور ميرغني]

أخي خالد أشكرك علي المشاركة وأقول لك أنا وأنت ,غيري فلنتحد لإنتزاع حقوقنا وحقوق كل الغلابة .

[مينو]

حتماً ستشرق شمس الحرية

كل سنه وانت طيب ...........استاذ انور ....وينك مختفى ان شاءلله خير ....

صايم ولا شنو :P

[أنور ميرغني]

الرائعة حد الإندهاش مينو
كل سنة وإنتي والوطن وكل أعضاء السودان أون لاين بألف خير .. أشكرك جداً علي مشاركتك والسؤال عني فقد غبت عنكم في رمضان لظروف السفر إلي الدمازين لقضاء رمضان مع الأسرة ولأن النت بالدمازين غير متوفر بالصورة المطلوبة غبت عنكم فأعذروني ..