اتشحتفت

[سامى سر الختم]

العين التالته
الحاسا الساتا
البعد التالت
صفق الحنه
كانت ديناصور
قبل التاريخ
بعد الاحساس
صارت كناس
من غيرا بنوك
صارقيل الطين
ياود مسكون
بالبوح وشجون
علمت الشارع
يعض بالناب
ورق الكتشينا
الجوكر بايظ
سكران يازول
قتلك باليل
نادانى النيل
قالى تعال
اركب مركب
وسوق الشارع
والشماسه
شفع ورنيش
ست الكسره
بتاعة الشاى
وانا كنت بجند
فى الكراس
برسم عزه
وطن بى راس
من دون كرعين
وانا ماشى كتر
كوريكى كمان
والواطا فلوت
ود عبد الرحمن
ياساند الليل
بين حس الوجعه
ولون الخوف
شبيك لبيك
انا اديتك كم احزان
وان درت كمان
بديك كمان
قاسم ابو زيد
عاطف خيرى
النغم البضرب
فى اوتارنا
الحس السابع
بدل العين التالته
ننوم خفاش
او تمساح
بى يفتش
طعم اليابسه
يعوم ....
لابس بى هدوم
(يازول يارايع
ومهموم)
انا صليتك
قبل المغرب
ما يأزن
حاضر فى الغيب
والغيب هو سكات
يرحل فى الغيم
من غير اوكات
طنبورا مات
غنايا فات
.........
لسه المناديل
فاضلا
بدموعا الحبيبا
اتشحتفت
والنيل موشح
بالنفايات والغبن
.........
طعم الحزن دفق
غطى الافق
والشوق
بى دمعه
ساخنا تعال
وضينى بى نفسك
اغسلنى بى احساسك
طهرنى بالاخلاص
سجدنى فى كنيسه
ودينى لى ميسا
انا تهت فى الشارع
والدرب تاه فينى
ماقدرت ارجع ليك
وصعب على براى.

[حجر الظلت]

الأخ العزيز سامي
مشتاقين والله
شغلتنا عنك بعض الأعمال الفنية ولكننا نتابع بالرغم عن كل شيء
تحياتي

[سامى سر الختم]

الرائع الطريفى عودا حميدا وانشاء الله
تانى ماتنقطع مننا والمجهود الغبتوا ليه
واضح فى كل الموقع وربنا يساعدكم
انشاء الله عشان تتحفونا دايما بالشئ
الرائع والمتقدم فى مجال التكنولوجيا.

[ساداتكو]

يا ود يا سمسم يا روعة؟؟؟

تحياتنا وكلام عذب وسلس ومنساق...

شكراً لك حيثُ أنت ... والمزيد