أناشيد الزنادقه الأم ... القدال [الأرشيف] - شبكة الجعليين

mohammed elrasheed hassan

18-08-2006, 06:41 PM

أنشودتان من أناشيد الزنادقه الأم
1 :
الصحوة
_____
صباح يا محمد يبقي الحريق
ومن تحتين المجرى التحت
تشم الطينة ويقسى الجلد
وعضمك يقوى وعزمك يلد
وتبقى بحولك ساكر ثمل
وتجي يا محمد متل البريق
لونك شفا ودربك همل
كلمتك هانت متل النعيق
وصوتك بح وصبرك كمل
وتجي يا محمد داخل الفريق
ورجعة دارك لم الشمل
عرقك نازف متل السليق
مسافر سارد صوتك سرك
تصفي حسابك منا وجديد
وتجلد تجلد لامن تفيق
تخلص حقك قبل الحريق
ضريبة الحق ان صابت تعيق
وجرحا كاتم ما بندمل
طلبت الرفقه وزاد الطريق
لقيت الحب في بيت النمل
2 :
أغنية أخيرة للأطفال
____________
قمر الحلة الضوا
والقنديل شن سوا
وليشن يا ود حوا
طالق فينا العوا
ناس الحلة الغادى
سوو الجامع نادى
صوتك فوق الرادى
كلبا نابح وصادى
أولاد الحلة الفوقنا
سارقين نمة مربوقنا
من مرك يلثع ضوقنا
ومن خيرك ناشف سوقنا
أولاد الحوش تحتانى
لاعبين حرت حرانى
نضماتك فايته أضانى
نماتك مى في لسانى
أولاد الحلة ام بوره
شلناها عليهم شوره
شايفنك فوق الصوره
يا كاسر كل مجبوره
أولاد الحلة ام ناله
لاعبين كارو وعتاله
يا ساتر من ها الحاله
الفال الخير ما فالا
نحن اولاد قدامى
لاعبين عسكر وحرامى
ايدينا المطر الهامى
لاعبين عسكر وحرامى
ولسانا السهم الرامى
لاعبين عسكر وحرامى
ابدا ما فينا حرامى
لاعبين عسكر وحرامى
بس درنا اللعب السامى
لعب العسكر وحرامى
واحدين اليبقو العسكر
واحدين اليبقو حرامى
ناس احمد يبقو العسكر
ناس سامى اليبقو حرامى
ناس احمد قبلو العسكر
ناس سامى القبلو حرامى
ما فرقت يا ناس احمد
ما بتفرق يا ناس سامى
ونحن اولاد قدامى
لاعبين عسكر وحرامى
لاعبين عسكر وحرامى