هالة

[أنور ميرغني]

يادابو زارني الفرح
والنور غطي سماي
ما الليلة هالة هلت
ضمدت جراح أساي
شفتها في أحلي صدفة
وهواها إنغرس جواي
نسيت جراحي القديمة
ومن جديد إخضرت دنياي
إنطوت صفحة الماضي
وهالة صبحت مرساي
معاها غنيت كتير
نسيت أسباب شقاي
ويا هالة هل تسمحي ؟؟
تمشيهو مشوارك معاي
بيك تفرهد أيامي
وألقي في طلتك دواي
أحضن إيدك في حبور
تتجدد لحظات صفاي
وأهديك يا حلوة دبلة ريد
أهديك موال غناي
والسمحة ردت بي خجل :
حبك سعدي وهناي
إتعاهدنا نصون الريد
توافيني وأفديها بي دماي
سطرنا قصة توحد قلبين
وليك ألف شكر يا مولاي
دي قصة توحد قلبين
وليك ألف شكر يا مولاي

[حجر الظلت]

وليك ألف شكر يا مولاي

[أنور ميرغني]

شكراً كمال ...

[الحاج أبو عاقلة]

أتدفق أتدفق
أملا كل الأواني الأبداعية يا أنور ميرغني
نحن راجيينك
أتدفق

[محمد ابوعاقلة]

تناولك حلو ... لكن الموسيقي فيها شوية اصوات من بحر تاني والا شنو يا الحاج ابوعاقلة
انا واضح معاك ومفروض اكون كده

[أنور ميرغني]

أتدفق أتدفق
أملا كل الأواني الأبداعية يا أنور ميرغني
نحن راجيينك
أتدفق

شكراً أخي وصديقي الحاج أبو عاقلة


تناولك حلو ... لكن الموسيقي فيها شوية اصوات من بحر تاني والا شنو يا الحاج ابوعاقلة
انا واضح معاك ومفروض اكون كده

شكراً أخي محمد أبو عاقلة وأرجو إفادتي أكثر بإيراد الأبيات التي تحوي موسيقي من بحر أخر
لك مودتي ...

[محمد ابوعاقلة]

يادابو زارني الفرح
ولقيت خيالك في سماي
ما الليلة هلت هالة واحده
ضمدت أيام أساي
اتكيت في أحلي صدفة
وانتشي الريد في مداي
اندمل جراحي القديم
ومن جديد القاك حداي

يعني حاجه زي كده
والنهايات مفروض تكون من نفس التفعيلة
سماي. اساي. مداي. حداي. هناي

[أنور ميرغني]

شكراً كتير محمد أبو عاقلة بس كدة إنحرفت شوية عن فكرة القصيدة ..
ولك معزتي ..

[محمد ابوعاقلة]

طبعا ما ح اكون زيك قريب من الموضوع .. احساسي ناقص وتحياتي

[أنور ميرغني]

لك الشكر والتحايا صديقي محمد أبو عاقلة ..