أنا و النيل

[أنور ميرغني]

جيت يا نيل أشكيلك عذابي
أصلي زيك بتحتويني الشجون
حبي إنحبس بين الضلوع
وإنت بين ضفتيك مسجون
يا نيل أسمع حكايتي
وخليك دوام عليّ حنون
ما إنت ياكا الملاذ
وكتين الزمن يخون
جيت أحكيلك حكاية زول
تاه في سراديب العيون
وأخر المطاف فقد الدليل
يفتش للمداخل ما لاقي عون
أصلي زولاً مسهّد
عذبت دواخلو الظنون
يا نيل أجبر بخاطري
أصلو حالي أنا زي حالك
وإنت في لحظة جنون
جواك بتعربد أمواج
وأنا جواي بتتهيج شجون
ما إنت فاتنك عشق الضفاف
وأنا بي ليلاي مفتون
وأنا واقف !! نشفت مويتك
بقيت تتغذي من دمعي الهتون
شفت كيف بقينا أصحاب ؟؟؟
نتشارك حتي في العيون
عيني أنا ياها عينيك ...
وضفتيك صبحت هي العيون
وأه يا نيل !!!!!!!
حتي السر الفيني فيك مدفون
وأه يا نيل !!!!!!!!

[أنور ميرغني]

كتبت هذه القصيدة في مدينة رفاعة وحينها كنت جالساً علي شاطئ النيل الأزرق

[حجر الظلت]

الشاعر الرقيق أنور
علمني كيف تصوغ الكلمات في أشكال بديعة وساحرة كهذه ..
علمني كيف ترتب الأوزان والمعاني وتصنع الفرح من الطبيعة
وتصنع الطبيعة من الجمال ؟؟
علمني بالله عليك

[أنور ميرغني]

صديقي كمال أعذرني إذ خانتني الكلمات وهربت مني فلم أجد ما أرد به علي كلماتك التي أخجلت بها تواضعي
لك مني الود ..

[حسين عبدالوهاب عبدالكريم]

قد أثرت شجني وبعثت في ذكريات جميل
فنحن أهل شمبات نعشق النيل وكلم لنا
فيه من ليالٍ مشبعة بالود
والشجى يبعث الشجى، فإليــك هذه ايضا عن النيل
أتذكر فيها معاهده وملعب صبانا

مشتاق اليك يا نيل وبحبكم ولهان
ماءك لذيذ ونمير يا متعة الأبصار

الأبيض الهادي يتهادى كالنعسان
والأزرق العاتي كالمهر في الميدان
يروون للتاريخ وحضارة السودان
ما ملو طول السير في ليل أو في نهار

في مقرن النيلين يتعانق النيلان
منظر فريد وجميل ما مثلو اي مكان
يتلاقو في الخرطوم مع توتي بالاحضان
بالحب والتقدير يتواصل المشوار

يا نيل كفاك جمال حولك جنان رضوان
وتنظر عيون الناس منظر بديع فتان
طول الضفاف يانيل يتغنى بيك نشوان
الطير بالتغريد في عالي الأشجار

من جنة الفردوس منبع مياهك كان
رؤياك يزيل الهم يمسح اسى الحزنان
نعمة ورغد في العيش لي كافة الجيران
ماءك لجين يا نيل أرضك كساها نضار

انظر جنان شمبات في مقابل ام درمان
كم ليها غنى عبيــد وردد الفنان (1)
كم يحلو فيها مقيل بي رفقة الخلان
بين نغمة التلحين أو رنّــة الأوتار

كالسندس المفروش روعة وخضار ريان
عانق سماها يميس شجر النخيل والبان
والماء يجري يسيل في جدول البستان
صوت الخرير يشجيك وتناغم الأطيار

كم في رحابو نميل نتغنى بالألحان
نسمع هدير الموج في كافة الشطآن
والورد شكلو جميل من كافة الألوان
والجو نسيمو عليل يحمل شذى الأزهار

كم شوقي لي وطني يملاني بالأشجان
وارعى النجوم في الليل لي صيحة الاذان
في الغربة أشكو لمين فاقد فؤادي حنان
مهما تدانى العيش لكن غريب الدار

في رحابو قمت ربيت بين أهلي والأخوان
روتني موية النيل وتشرّب الوجدان
أصبح هواي وحيد في قلبي للأوطان
يا ربي تعلو تفوق لي كافة الأقطار

تنزل عليها الخير تصبح ربوعه أمان
والخير فيها يفيض بالشكر والعرفان
بالعلم والتوفيق يتقدم السودان
من كل شر محيط تحفظنا يا ستار

(1) إشارة إلى اغنية (الجمعة في شمبات لعبيد عبد الرحمن)

[أنور ميرغني]

أخي حسين لك الود فنيل بلادي قد ألهم الكثيرين أدامه الله لنا
وكلماتك حقاً هي كلمات بروعة هذا النيل ..
ولي شمبات ألف تحية ..

[مينو]

[moj=up:80694c45a5]يابت يا نـــــــــــــــــيل
العــــــــــاشق
عاشق كــــــــــــــــل
النـــــــــــيل[/moj:80694c45a5]

[أنور ميرغني]

يابت يا نـــــــــــــــــيل
العــــــــــاشق
عاشق كــــــــــــــــل
النـــــــــــيل


شكراً الرائعة دوماً وأبداً مينو علي هذا التعقيب الجميل .