سافر .. / قاسم أبوزيد

[حجر الظلت]

سافر ..

مطارات الوداع ضجت

قدامك .. وراك بيضا

وسماك غنـّاى

مساحات الأسى الفى عيونّا

تتفجر مدينة وناى

بطاقات دعوة الرجعة ..

تساب عينين من الفرحة

دموع للحاضرين فجت

زغاريد غطت الدنيا

وعاد .. فرح الرجوع منية

صداك الريح ..

ومن السنبل الغناى

************

كتير بنعاتب الحاضر

ولا أسفاً على الماضى

صدق الرؤية من قلبك ..

بين الشوق وإنسانك

نغم فنان يعيش راضى

مداك إتعدى حد الشوف

دخلت على الشعر .. إنسان

هواك .. إتختّ جوة الجوف

وإنتحر النهار .. هسـّة

نغنيك لى مدن .. شاخت

معاك أحلامى .. ما تنسى

تغنيك القرى الراحت

خلاص يا غربة .. ما ترسى

غنيناك .. وبنغنى

وبتحدى الزمن .. فنان ..