أبحث عن النص الكامل!!!

[hisho]

ياريت واحد يدلني على النص الكامل لقصيدة :
خوفي من تلحق رفيقك ..
يا برق نجم الحيارى ..
وإنت لانور طريقك ..
لا شرق فجر السهارى ..
من زمن يا صحوة طلعك ..
غصة في حلق الصحارى ..
خت شال النمة فرعك ..
دودى زي وهج البشارة ..

[ابراهيم عثمان]

هشو يا اخو ازيك وسلامات لعلك طيب
تعرف انا الا عملت عملية تجميل للخط بتاعك دة حتى قدرت اقرا المرة الجاية كبر الخط عشان نقدر نركز وعموماً انا لقيت ليك القصيدة الجميلة جداً جمال شاعرنا محمد الحسن حميد وشكراً على ذوقك يا راقي.

خوفي من تلحق رفيقك

محمد الحسن سالم حميد


خوفي من تلحق رفيقك
يا بريق نجم الحياري
وانت لا نور طريقك
لا شرق فجر السهاري
من زمن يا صحوة طلعك
غصة في حلقة الصحاري
حتى شال النمة فرعك
دودى زي وهج البشارة
قلنا يا سعد المواسم
عودك المليان جسارة
عودك الفجر المصادم
بالبصيرات و البصارة
يستحيل يرضخ يساوم
مهما كان الريح حصارا
يفضل النخل البقاوم
في السقوط نخل الفقارى
يا اندلاع صوت الغفاري
في حلق دغش الغلابة
لو خريفك تاني يطرح
آه يا آخر سحابة
لما يا شرف المواكب
يبقي هم الناس امارة
تندحر كل المناصب
ينكسر كرسي الوزارة
كنتوا وين . . وين انتو كنتوا
لما الشوارع ما ثبت قداما مرتق
نفض الصمت المسافة
مدت الشوق المضارع
للصباحات التجرتق
كف شهيداً بق مارق
من فرقة الظلمة فجراً
تم بي دمو الشرافه
وضم حضن الأرض عاشق
كنتوا وين . . وين انتو كنتوا
لما كان في سجنو ثائر
بي جلابة السونكي نومتو
ويصحي بي امر العساكر
قومتو في الزنزانة يمحي
و يفتح الاف الحناجر
تجدب الاطفال ويكتب
انبل الاشعار لباكر
تشطب السجان وصوتو
ويبقي فنانا البساسق
كنتوا وين وين انتو كنت
لما فضل الدين عباية تدبي
فوق كتف الغنايا
تنصب في الجو طوابق
تنقلب في التو بنوكا
للبداهن و البنافق و البوافق
ولما كان نفس العباية
تتمسخ بي قدره حبلا
لي قصار عمر الكحايا
من جنب تنسل سيفا
عبّّر السواهو سارق
شدة الفقر الخرافي
حدة الشغل اللمافي
رغم الاف المتاجر
و الخوازيق و المرافق
كنتوا وين . . وين انتو كنتو
لما البيوت في الشمال قامت خنادق
للكتابات البتنزل فوق ضهاريهم مطارق
لما طلاب الحقيقة كانو بختارو المشانق
و لما لسة الله بموت في الجنوب بين البنادق
كنتوا وين وين انتو كنت
آه يا وطني المستف في المطارات القصية
اه يا كفني المنتف في مدرات القضية
اه يا صمتي المكتف في العبارات الندية
اه يا نفسي الملطف بالنهارات الصدية
اه من رفع المصاحف بالرماح الاجنبية
المعاطف ... أجنبية
العواطف ... أجنبية
الجلابيب ... أجنبية
الدواليب ... أجنبية
الدهاليز ... أجنبية
السراير ... أجنبية
المساير ... أجنبية
صبة الكاس ... أجنبية
ختة الراس ... أجنبية
رشة الدلكة ... أجنبية
رعشة الفركة ... أجنبية
طفية النور ... أجنبية
والخوازيق عربية .. عربية
فضي نارك يا محار ب ولا هات البندقية
غني عشقك يا صبية نحن قدامك مدارك
غني للوطن المفارق
عشت يا وطني المبرق بالندى ولون المشارق
يا محرق .. يا مجرب
عشت بشرف البنادق
ويسقط العفن البتلب فوقنا من شرف الفنادق

وابقى عافية

[hisho]

مشكور يا زول يارائع ..
وأعذرنا على الخط الماواضح .. باقي ليك ... أخوك كرت كرتونة
بكره نتعلم منكم يا شباب

[حجر الظلت]

الأخ hisho

مرحب ومنور

[hisho]

تقوم يا يابا تدرج .. قريب وبعيد ..
ولا الغلب الملأ الواطة ...
ولا الحزن الجديد يمنع ..
نشيلك فوق رحلنا نشيد ..
ونقولك في الحضر والبيد ..
واضان العالمين تسمع ..
نحبك يا فرد واحد ..
كما النيل الوقف شاهد ..
وكت مستنشقك واحة ..
وكت نستنثرك راحة ..
تضم قبل المناحة شهيد ..
لك التحية أخي ..وأتمنى أن يمكنني الوقت من التواصل .... خاصة ونحن " مغتربي دول الخليج " نقاتل من أجل ساعات نتنفس فيها عشقنا وحبنا للوطن الحبيب .. وإبداعات أبنائه الميامين ..!!!
و" حميد " بصفة خاصة يحتل مساحة كبيرة في الدواخل .. استحقها بفعل حرفه الصادق المعبر عن آمال وآلام شعبنا الصامد .. فله عبر هذا المنتدى كل التحايا ..والتقدير ..والاحترام ..ودام في أنضر وأبهى صحة وعافية..