الفقرا والعمال

[سامى سر الختم]

يابنيه هوى
انا وين الاقيكى
والسكه ودرانا
ضهبانا فى الاحساس
تسعل عيون الناس
عن زول طفش جواى
فتشتو فى الاعماق
كان ياهو مجرى الدم
يوصل يودى الشوق
لى غيمه مطرانا
من فوق يدلى عشم
فى شان واطاة الله
يبرد حشاا محروق
وانا يوم بلاقيكى
يضهب وريد حسى
يسقى الافق والصى
لى زول طموحو مطر
او نيل يدفق مى
واطقطق الكمروع
انزل من النخله
ما تطلع السوسه
هى ان فاتت الشريان
جوانا مغروسه
والدم هو مسرى الدم
لو انكشح مابينقلب
مويه .........
ياحرازا جنب النيل
ان عادت المطره
ماتحتى صفقك ليه
اتعلمى الوقفه
من غير ما تحنى الضل
ما الضل بيعنى الروح
والبينا من اشواق
كبر المدى الدفاق
تقروقه فى القبله
او عتنيبه للدلكه
صلواتى ليك تمتد
مسقيه ممطوره
من حنها المطره
رويانا تريانا
وابوى انا مزارعى
ربانى بالتحنان
قالى كون انسان
ادى الضعيف قوه
وادى المراكبى شراع
شان تجدف المركب
نرحل سوا ونلعب
غميضه غميضه
القاكى تلقينى
جنب منقا مطعومه
بى شفتك والروح
تطلع من الداخل
تنده عليك النيل
يا بت تعالى كفاك
انا عارف الخلاك
تمشى وتسيبى الدار
ما خاطرك الجواك
ممكونه بالحوليك
ما بتعرفى احساسك
لانو من الناس
احساسك الاطفال
الفقرا والعمال .....