شاعر من الجوير

[ودالبدري]

هذه الأبيات لشاعر الجوير المبدع أبراهيم نورالهدى ( الداسوقى ت 0122703630 ) فى الفخر بالجعليين

نحن أولاد جعل والله ثابتين نسبة
نحن بنكرم الضيف الغريب فى الغربة
نحن الجار ونحن السيف ونحن الحربة
ونحن عدونا كان شافنا بتصيبو الرهبة
×××××××××××
القاصدنا ما بنال من شرفنا الحبة
ونوريهو الهوان فى إيدنا يصبح لعبة
نحن صغيرنا كان حارب يجيد الضربة
ونحن بنقابل الموت الوراهو التربة
×××××××××
نحن الفى الكرم سيل البطانة الكبه
ونحن سحاب خريف فى الضهرى نيل وصبا
نحن القوة نحن الخوة نعم الصحبة
ونحنا الفى المحن بجينا هوشة وطربا

ولنا عودة

[الشايابى]

تسلم اخونا تنكابى وفى انتظار المزيد . ودمت

[صلاح بدر العوضى]

التحية لعزيزنا الراقى أبراهيم الدسوقى ،و ربنا يمتعه بالصحة والعافية 0 نعم هذا المبدع الذى يرسم أرقى الصور بالحروف و هو فى صمت كامل 0
والشكر لك اخى تنكابى 0 و أرجو يبليغه تحيات صلاح بدر ، من الشوك

[ودالبدري]

الشايابى صلاح العوضى لكما التحية
إنشاء الله سوف أورد مزيدا من إبداعات هذا الشاعر المبدع

[صلاح بدر العوضى]

أخى تنكابى - أرجو أيفائنا
بمرثية الفكى على من
أبراهيم الدسوقى


مع الشكر الجزيل

[ودالبدري]

مرثية الفكى على بابكر للشاعر المبدع أبراهيم نورالهدى البدوىالداسوقى
الفكى على فى كلمات:
من الشخصيات التى لن تتكرر فى تاريخ المنطقة لما إتصف به من صفات نبيلة اهلته ليكون زعيما وأبا واخا لجميع أهالى كمير العوضية وما جاورها من القرى نال أحترام جميع من عرفه وأعجب به من سمع به كان للتربية الدينية التى نشأ فيها عظيم الأثر فى حياته فقد كان ورعا 000تقيا لم يشغله العلم وتعليمه عن عمله 00كان مزارعا مكافحا 0يد تمسك المحراث وأخرى اللوح 00كان زاهدا متقشفا ما غرته الدنيا 000رحمه الله رحمة واسعة بقدر ما قدم لأهله ووطنه
غنيت وجبت النم
للأسد المربعن فى عرينو رزم
على ودبابكر
××××××××××××××××××××
شديت الوترصيح وجبت نغم
لى سمح الخصال الكلو زوق وفهم
ياأبرايا سديد فى فارغا ما إتكلم
عطاى للضعيف كلك حنان وكرم
××××××××××××××××××××
جريت القصيد ليك بالقوافى نظم
ياكاب الضعيف شوفتك تفرج الهم
فيك شبه الكدركول العظيم وأشم
وفى الحارة أم زحام إنت بتخوض الدم
××××××××××××××××××××
تبكيك السواقى الخضرا والمحراث
الجود والكرم هولك يمين ميراث
ياود بابكر كل ادب وإحساس
ذكراك تبقى لينا الحكمة والنبراس
××××××××××××××××××××
الداسوقى قال جاب ولف الكلمات
ياود المساجد الطاهرة والخلوات
وا أسفاى عليك يامقنع الكاشفات
حكام القدر والجاى ما بنفات

[شنتير]

كلمات جميلات جمال من قيلت فيهم

[ودالبدري]

مشكور الشنتراوىعلى المرور الرائع

[ودالبدري]

بسم الله الرحمن الرحيم
قصيدة كتبها الشاعر أبراهيم نور الهدى بمناسبة الزواج الجماعى السابع لرجل البر والأعمال الخيرة قسم الله فضل الله نصر الدين

أسأل عليك ألقاهو إسمك فى القلب
ياروضة يا نبض الحروف يا واحة لى زولا تعب
يافرحة يا ظلا ظليل يا غيمة والنسام يهب
يامطر صبت فى الجوير والطين فرح طربان شرب
قسم الله يا صوت المؤذن فى السحر شمر إزاروالمنكرب
يا شمعة يا ضو القمرلما القمر فى الظلمة يرحل وينحجب
قسم الله يارقم كبير ما بنكتب وما بنحسب
خيرك كتير عم الشمال وعم الشرق وعم الغرب
يانسمة يا ينبوع حنان منو العديم كب وشرب
يا نصر ه يا سيف الأمان لابسنو فى الضرعات حجب
قسم الله يا لبن الضرع يعتمن ويتحلب
قسم الله يابلسم للمريض الجرحو غور وملتهب
قسم الله ياكف السخا المن كان صغير زمن اللعب
ياغنوه يانغما جميل ياكلمة يالحنا عذب
يرجاك دائما مبتسم حاشاهو ما كشر غضب
قسم الله تاريخ الجوير خالد دوام ما بنشطب
قسم الله ميراث البلد نحمى ونحرسو من السلب
ياولادة الرضا والحلال نسبا شريف ما بتعقب
حيرت فرسان الجهاد الخاضو نيران الحرب
ياوادى خضر فى البلاد نديان خضارو ندى ورطب
ياومضه فى عين الكفيف محتار وقف غلب الدرب
قسم الله يافرح الشباب عزف المزامير منطرب
وقسم الله ياخفقان قلوب لما القلوب تهوى وتحب
ماإنت منسول من رجال ما بعرفو الغش والكذب
وما أكلو حق الناس حرام وما بعرفو الجور والنهب
فيهو عقيد الخيل رجل فارسا هميم بلحيل تلب
وفيهم عبيدول جدنا شيخا ورع قبال يشب
وفيهم كمان فضل الله نصر الدين حنين
ما بعرف العداء والحرب
ما بلدو زى قسم الله كيف!! أسد الخلاء المابنغلب
مايلدو كيف !! ناس كرام حجرو المشارع والدرب
زرعو المحنة رياض زهور فواح عبيرو المنسكب
زرعو الخضار زرعو النضار بعد التراب يبس جدب
خلو الجوير فوق النجوم نجما بعيد ما بنقرب
كلما أقول أكتب وأقول ألقى العقل تاه منجذب
وترحل تضيع منى الحروف وألقى الوزن بقى منخرب
وكل ما أقول أكتب كلام ألقى المداد كملان نضب
قسم الله ما كل الكلام الإنكتب والبنكتب

[أبومؤيد]

أستاذ تنكابي /
لك التحية والتجلة وأنت تبرز شاعرية الأخ ابراهيم نورالهدي من خلال شبكة الجعليين ذلك الشاعر الذي يكتب في صمت مهيب ، فنرجو منك موافاتنا بمرثية المرحوم التوم الدوخ ٠ ولك جزيل الشكر

[الجعلي المثني]

حياك الله استاذي النور علي القصيدة المتفردة

[الجعلي المثني]

أستاذ تنكابي /
لك التحية والتجلة وأنت تبرز شاعرية الأخ ابراهيم نورالهدي من خلال شبكة الجعليين ذلك الشاعر الذي يكتب في صمت مهيب ، فنرجو منك موافاتنا بمرثية المرحوم التوم الدوخ ٠ ولك جزيل الشكر

اخي ابو مؤيد لك التحية علي مشاركتك في المنبر وارجو ان تواصل وارحب بك ترحيبا حارا باسم المنتدي الاجتماعي بدار جعل ، وارجو ان تطلع علي احتفالات الجوير في المنتدي الاجتماعي ومشاركة فتية دار جعل فيها لاني احسب انك لم تتمكن من حضورها لانني لم اقابلك

[أبومؤيد]

أخي الجعلي المثني/
‏ أشكرك جزيل الشكر علي الترحيب الحار وأسأل الله ان يوفق الجميع لما فيه الخيرد وفعلا شاءت ارادة الله أن لا أكون حضورا لذلك الاحتفال الفخم الذي أقيم بقريتنا الحبيبة الجويرو التي نتمني لها التقدم والازدهار

[أبومؤيد]

اأخونا الجعلي المثني أبو محمد
الصورة أحيانا تعبر أكثر من الكلمة
أبدعت في التصوير
شكرا جزيلا

[د خضر الخواض]

تسلم يا تنكابى ويسلم الداسوقى والله اتحفنا باعتزازا بالجعل ، ومرثية الراحل الفكى على هذا الرجل القامه فى تاريخ الجعلين زرته فى منزله بالكمير معى عمى عثمان جاد الرب فوجدت فيه كل ماهو اصيل له الرحمه ،اما عن قسم الله ودالعقيد والله كل الكلام بالتقال ماقدر المك ده والله هو مفخره لكل جعلى فى مكان الله يخليه ضو القبيله ويمدد ايامامه ويوسع رذقه مع امتننانى ، ياتنكابى مافى حاجه لفضل الله؟

[الجعلي المثني]

اأخونا الجعلي المثني أبو محمد
الصورة أحيانا تعبر أكثر من الكلمة
أبدعت في التصوير
شكرا جزيلا

حياك الله اخي ابو مؤيد

[الجعلي المثني]

تسلم يا تنكابى ويسلم الداسوقى والله اتحفنا باعتزازا بالجعل ، ومرثية الراحل الفكى على هذا الرجل القامه فى تاريخ الجعلين زرته فى منزله بالكمير معى عمى عثمان جاد الرب فوجدت فيه كل ماهو اصيل له الرحمه ،اما عن قسم الله ودالعقيد والله كل الكلام بالتقال ماقدر المك ده والله هو مفخره لكل جعلى فى مكان الله يخليه ضو القبيله ويمدد ايامامه ويوسع رذقه مع امتننانى ، ياتنكابى مافى حاجه لفضل الله؟

حياك الله اخي د. خضر ونتمني زياراتك لينا اكثر في الجوير حتي نعيد أيام الشيخ مصطفي الثانوية

[د خضر الخواض]

اكرم وين انتا والله طولنا منك، ايام الشيخ كانت جميله ،اما الجوير فهى قى الخاطر بروعتها وقبابها واضرحتها وعمدها ومشايخها وفنها والكثير لايحصى تحياتى لاصدفائى ملحوظه كنا نتحدث كثيرا هذه الايام انا والاستاذ بشير احمد حامد عن الادب الشعبى بمنطقة الجويرز

[ودالبدري]

أستاذ تنكابي /
لك التحية والتجلة وأنت تبرز شاعرية الأخ ابراهيم نورالهدي من خلال شبكة الجعليين ذلك الشاعر الذي يكتب في صمت مهيب ، فنرجو منك موافاتنا بمرثية المرحوم التوم الدوخ ٠ ولك جزيل الشكر


لك التحية أبو مؤيد 000 طلباتك أوامر 000 ذهبت إلى الشاعر فى منزله لأجل الحصول على القصيد المطلوبة وقام مشكوراًََ فى الحال يبحث عنها فى القصاصات المتناثرة00فى ذلك الصندوق الذى يضم العديد من القصائد فى شتى المواضيع 000 مسدار الحزن فى وفاة المغفور له التوم الدوخ أحد كرماء الجوير المعروفين 00كان منزلة قبلة ودار للغاشى والماشى 00000000

نزل حكم القدر هبر الشرك والكفة
وشال سمح الخصال غادر جويرنا وقفه
يامطر الخريف برق السحاب الرفه
حاج التوم كريم للغاشى بكرم ويلفه
××××××××××
ببكى على حزين دمع الغزير ما جفه
يازين الرجال سيد العفاف والعفة
دارك يا الخزين باقيانا مسكن ومرفه
وأب عمرا قصير ما بتنفعو المستشفى
×××××××
لى ضيف الهجوع قدمك يبس وإتحفا
ويا قدح السخا الجيعانو شبع وإتكفا
ياتوب الغطا البردانو نام وإدفا
منسول من كرام ما وِلد مجرد صدفة
××××××
مطر النتره إيدك مو الرشاش والصرفه
ويا حبل الوصال صافى الضمير والإلفة
يادهب الخزينه الصافى مجلى مصفا
زرع التوم نخل ماهو العدار والحلفة
×××××××××
ياسيف النصر مو دق حسين وأبجلفا
وزنك فى الرجال زائد تقيل ماخفا
يا حوض الروى الماقالو جير وحفا
زائد فى الزهد حاكيت جماعة الصفة
××××
أن شاء الله الكريم منزل حروف الصافه ( الصافات )
ليك يرتا ويحن وعنك يسامح ويفا
تبقى مع الرسول وصحابتوساعة الزفة
وتسكن فى الجنان ما تشوف هجير الوقفة

[الخليل الجعلي]

يا سلام يا شباب و الله عشت لحظات حزينة ندية مع مراثي الخال الداسوقي متعه الله بالصحة و العافية جعلتني اعيش و اتمشي من الفيلاب شاقي البلد بالنص للعوضاب و اعرج علي اهلنا العالماب و الموتاب و ادخل السوق اصلي في الجامع مستمتعا بترتيل شيخنا و والدنا الفكي بشير ياريت تتحفونا بدرره الشعريه و امر بحلة الخلوة و حوش ود العقيد و اعود في حوش الضباع اتعشي مع اخونا استاذ كركب و اكمل السهرة مع اخي عبد الله عبدالحي نتجاذب اطراف الحديث بقفشاته النادرة لكم و لجويرنا و اهل جويرنا و عموم الاهل كل المحبة و الاشواق .

[أبومؤيد]

أخي الغالي الاستاذ/
تنكابي
التحيات الزاكيات
نشكركم جزيل الشكر لاستجابتكم الكريمة لطلبنا {مرثية مسدار الحزن } في وفاة التوم الدوخ للشاعر المبدع الداسوقي والذي كانت تربطه بالمرحوم علاقة ود ومحبة لم يقطعها الا مصيبة الموت الذي خلف حزنا شديدا عليه نتج عنه هذا المسدار الحزين
‏ للمرحوم الرحمة
‏ وللشاعر الصبر
‏ ولتنكابي وافر الشكر

[الجعلي المثني]

لكم التحية
استاذي نور الجليل
الاخ الكريم أبو مؤيد
الاخ الكريم ابراهيم
ولاستاذنا الشاعر الداسوقي كل المودة والتقدير
ولكل ناس الجوير الكرماء ... النجباء

[د خضر الخواض]

تحيه لكم ايها الرائعون.........

[ابومحمد و فاطمه]

تبقى مع الرسول وصحابتوساعة الزفة
وتسكن فى الجنان ما تشوف هجير الوقفة

اااااامين
اللهم اغفر له وارحمه
التحيه للشاعر الداسوقي والشكر لك استاذنا على مشاركتنا هذا الابداع

[ملاك فتوار]

والله جد روعة

[د خضر الخواض]

شنو االحاصل يا جواره؟

[ودالبدري]

شنو االحاصل يا جواره؟

لك التحية خضر 00كمان ماشى على كلى ( السائح ) منبع الإبداع

[د خضر الخواض]

فى الانتظار يا استاذ....

[نورالصباح]

الاخ تنكابى لك الشكر ع المرثيه العظيمه وممكن لو سمحت تكلمنى عن الشيخ سلمان العوضى المدفون فى الجوير

[نقرابيه]

شكرا ياراقي

[ودالبدري]

نور الصباح لك التحية....إن شاء الله سنوافيك بالمطلوب ..بعد جمعه من مصادره الموثوقه

[د خضر الخواض]

مشغول وين يا تنكابى...

[د خضر الخواض]

منتدى الجوير حرمنا منك يا تنكابى وروائعك...