باكر

[سامى سر الختم]

طاريك والخوف سكن الاحساس
نبض الغنيه الفات مهزوم
والضل مورود
حاسى معاو الوان الصوت
والمطره قزح
تسكت صارخه
تنضم شقيش عن ماضى اليم
ازمان العسكروالضالين
تجار الدين
انا وانت وطن ماليهو حدود
رغم الترحال جوانا حنين
يتفرق ببقى نخيل
او سكه توصل للغنيات
المنك مرقت فى الشارع
متل الثوار دايرين الحق
والحق مسافر فى الازمان
ضل الانسان احساس نفسو
والعدل سراب

[الصفر البارد]

يا زول انت من البطانة ولا شنوووووووووووو ووووو


:mrgreen: :mrgreen: :mrgreen:


الصفر البارد

[عادل الخضر]

أخي سامي سر الختم
تذكرني بعاطف خيري والصادق الرضي
لك التحية

[سامى سر الختم]

التحيه للاخوان....
انا فى الحقيقه من مدينة عطبره قرية خليوه
لكن انتمى لكل بقعه فى ارض السودان
لكم التحيه والاحترام
على مروركم الجميل
وتشبيهى بعمالقة الشعر عاطف خيرى
والصادق الرضى هو اطراء
اتمنى ان اكون ذره فى خضمه

[سامى سر الختم]

تكملة باكر.........
العدل سراب اطفال شارع
جوه العتمه عجوز مركوز
متل الما عاش قصة نفسو
ولا ضاق الفرحه
وضاق الخوف
من الضيق الجوه الجوف
ما حن وحاتك لى نفسو
عزق الواطا الشارع ردمو
غرس الغرس
المابي يموت
امى احساسك ياواطا
صوت الاجراس
فى صلاة مولد
او دعوات فى كنيسه غيب
دمعة محروق
سافر للروح
ضلت تبروقة ذاتو قبل يركع
وانا صليتك
فى جواى
دعوه تنادى بحق الريد
وكتين تبقى الواطا غروب
والدنيا شحوب
ما لا العسكر
والقراه من قسوة باكر
باكر باكر باكر
جيت متوكئ عليك قبل الله
بنادى الشوق ود حس النيل
صامد فى الوجعه
المابترحل ولا الانفاس
شدت ارسان الصوت
الخافت قام اتبح
الصحا عيونك من اللوم
ماضل رشاش
المطره الغاب
ساب الاحباب
طارين جيتو
قبل ما يجف عرق الغنيات
والبت عزه
هى سحابا تجيك ووكتين يمطر
فيك دعاش
تعرف انك بى تتخيل
مطره تجيك فى عز الصيف
والصفق النشف
الواطا بكانو بى يتحرق
بس ان نشف العشم الفيك
ما بتتجرتق
والبت عزه هى ان جات بتمر
من غير الشوف
تعبر ذاتك بالانسام
تدخل فى شريانك دم تتعدى على
وطن الاحساس..

[aza]

سامى
والاحساس أنك هناك فى العصير وسط الجروف
حاقب أيديك وتتغزل فى حسيس أمواج تنطط بالحروف
تداعب الشطآن تلامس عروق أوتار تدغدع صعب الظروف
ومصير الحى يلاقى
لك الود

[سامى سر الختم]

ياعزه انتى من الابيض....

[aza]

ياعزه انتى من الابيض....
عزة فى دروب الشوق سافه رماد الغربه سف
وليه السؤال ياسامى؛ والدرب العديل سمح وليه اللف
أن قتا من الحديد والنار مافى أسف
ولو عديت قضيب سكه تلاقى
خليوه
كنور
السلمه والتلواب
ودارمالى
وقلبى انا فى المكيلاب غاب
LOL
وماتعبس بى عنيبس
وتقزقز
تجرى للشرام
وفى المخيرف ساب
وادخل الدكه
للكوكاب سلام منى
وجيتا غريب
فوت السوق وعدى لى باوقة شريف
وفيها نشم الزيف ونتكرح
ونزور الشيخ فى كدباس
محل بكرمو الناس
ويعقلو راس
وتنط عكد الرويس
أسمنت وغبار
وتشم عبير مجدوب
أولاد عكير مجدوب
والرجعه واجبه
لى أبيض دار
وامسك هاك
حى السوق والشويحات تمنة الميرم
وزنديه أم فلنكات
فلسطين الرديف مردوف وللساقات
تقلح لحى فوله والابحاث
وتنتر غابة ألبان جديد فى الجبيهات
وكفايه ولا أزيد
واختصر ليك وبس هاك دى
شلاخ نورى وجريف سمحات
دويم ودحاج والتومات
مروى أبدوم والحوشاب
وهاك فتنه وتنقاسى والفرحاب
قرير والدتى والرابحاب
واجيك ولا خلاس
والمختصر المفيد أنا السودان
Lol

[عادل الخضر]

الأخ سامي سر الختم :
تحية طيبة .....
أتسائل إن كنت إنت أخ محمد سر الختم
فقد كان محمد سر الختم زميلي بجامعة الجزيزة وهو من خليوة وهو الآن خارج أرض الوطن ....

[سامى سر الختم]

الاخ عادل ......
لك التحيه والاحترام ......
ما عرفت محمد سر الختم القاصدو انت مع انو ناس
ناس خليوه معظمهم بى يعرفوا بعض
ورغما عن ذلك لك الاحترام لاهتمامك بالصداقه والاصدقاء

[سامى سر الختم]

ياعزه .....................
لامصطفى بعد مصطفى
والايام دى انا طوالى بسمع كيفك انت
اذا مشيتى العرضه سلمى على الشباب وماتنسى انو حافظ عبد الرحمن بى يشبه
هاشم صديق ومصطفى سيد احمد لانو الدم واحد
والنيل والتبلدى دايما بى يربطم تراب واحد

[سامى سر الختم]

عزه مصير الحى يلاقى............
حتى لو تغير شكل الاغتراب

[حجر الظلت]

الأخ الرائع سامي

إنت وينك يازول ؟؟؟؟
أعجبتني القصيدة صياغةً ومعنىَ
لك التحية ..

[حجر الظلت]

عزة فى دروب الشوق سافه رماد الغربه سف
وليه السؤال ياسامى؛ والدرب العديل سمح وليه اللف
أن قتا من الحديد والنار مافى أسف
ولو عديت قضيب سكه تلاقى
خليوه
كنور
السلمه والتلواب
ودارمالى
وقلبى انا فى المكيلاب غاب
LOL
وماتعبس بى عنيبس
وتقزقز
تجرى للشرام
وفى المخيرف ساب
وادخل الدكه
للكوكاب سلام منى
وجيتا غريب
فوت السوق وعدى لى باوقة شريف
وفيها نشم الزيف ونتكرح
ونزور الشيخ فى كدباس
محل بكرمو الناس
ويعقلو راس
وتنط عكد الرويس
أسمنت وغبار
وتشم عبير مجدوب
أولاد عكير مجدوب
والرجعه واجبه
لى أبيض دار
وامسك هاك
حى السوق والشويحات تمنة الميرم
وزنديه أم فلنكات
فلسطين الرديف مردوف وللساقات
تقلح لحى فوله والابحاث
وتنتر غابة ألبان جديد فى الجبيهات
وكفايه ولا أزيد
واختصر ليك وبس هاك دى
شلاخ نورى وجريف سمحات
دويم ودحاج والتومات
مروى أبدوم والحوشاب
وهاك فتنه وتنقاسى والفرحاب
قرير والدتى والرابحاب
واجيك ولا خلاس
والمختصر المفيد أنا السودان
Lol

عزة
كلماتك دي حاولت كتير أفك شفرتها
لكن للأسف فشلت ..
ماعارف ليها ما قدرت أنساها
حتى وأنا نايم بسمع صداها
(سبحان الله) ..

[سامى سر الختم]

عارف ياكمال الشيفره
صعبه لانو القصيده من عمق العاميه
ولو تعرف انا قريتا اكتر من عشره مرات
وعزه هى اصلا قاصدا تعذبنا وليها التحيه رغما عن ذلك
وليك انت لانو دايما بى تدينا دافع بى كلامك