يا أبوي يامزارع

[الحاج أبو عاقلة]

أبوي يا مزارع
أبوي يا مزارع
يا حامي أرض
النيل
الكادح العامل
يلاك شد
الحيل
خلي السواقي تدور
أسقيها طول
الليل
*** ***
علمنا يا أبوي
الأصول
ومكارم الخلق
النبيل
لو لاك ما ضاءت
شموس
لو لاك
ما عرف
السبيل
ياك السعد وياك
الهنا
ومنع الفرح
الأصيل
** *** ***
لما الشمس ترسل
شعاعها مع
الأصيل
والعصافير الصغار
تحضن غصينات
الخميل
والهجير يطردنا
لضل
المقيل
ألاقاك هناك
يا أبوي هناك
واقف
عديل
بين السنابل
والجداول
والمعاول
والنخيل
سابح جبينك
في العرق
متوشح الصبر
الجميل
لا كليت ولا
مليت
ولا إتراجعت
يوم
البيت
وسط الحارة
يا أبويه
تجر النمه
والدوبيت
وتتحدي القدر
وتقيف
عشان ما نحن
نسعد بيك

[حسين عبدالوهاب عبدالكريم]

الأخ الحاج عشان ما يزعل الوالد

يا أبويا يا مزارع
في القلب كم زارع
ربيتنا بي جهدك
للخدمة بتسارع
كم قمت في الفجر
في الدنيا بتصارع
تجيب لنا اللقمة
لي جوفنا الجائع
تهدي وتعلمنا
وتسوقنا للجامع
تكسي وتعالجنا
بي قلبك الواسع
حققت ما يطلب
لي ابنك الطامع
مولاي ليك يحفظ
في الدنيا ليك رافع
يديلك الصحة
بي نسلك النافع
تسعد وبيناتم
بي يمنك الطالع
طول لنا عمرو
يا رب يا سامع

[الحاج أبو عاقلة]

بهذه المساجلة الرائعة للأب فقد اثبت يا أخي حسين انك فارس لا شق له غبار ومهما أطنبنا في المدح والثناء لا يمكن أن نوفيك حقك لأن سماك يا حسين لا يمكن أن يطال فقد سمق نجمك وأستعصت حروفك الشوارد علينا فلك منا أسمى آيات الحب والتقدير بقدر حبك لنا
والسلام

[الزعيم]

معقووووول كل هذه الروعة وذاااك الجمااال في التناااول ونمر نقرأ دووون رد لا يا الحاج برد عليك وأرد عليك وأرد عليك كمااان رأيك شنو؟ 8) وأقوليك ما ليهو الزعيم في الكلام الجميل كتير لكن لمن يشعر بيهو بخش في قلبوا بدون ما يدق الباب مستأذن يعني يبقى الكاتب رائع مش بس كده فنان وجميل وسوداني أصيل..
تحية شكر وتقدير ليك يا رائع وحأستأذنك لأني حفظت كم بيت كده للتحشيش وسط الفرد في بلد الغربة يعني طبعاً أسهمك بتكووون في السماء كمغترب لمن توريهم إنت متابع جيد لجديد الشعراء وأحواال البلد هنااااك يقفوا صف ويستمعوا ليك ويدقوا ليك تعظيم سلااام كماااان.. والعجب لمن يخلص الكلااام والدوبيت وكل البنلقطوا من هنا وهناااااااااااااك تشوووف ساااعتك وتقووول "للربع" بالخليجي يعني الأصحاب أستأذنكم شباب ماشي أدخل النت أصلي مواااعد شباب من السودااااااااااان وكده.. "كضبة بيضة وكضبة سودة... ما عااارف :P " تنفع تعمل منها حاجة دي ولا ما تنفع يا الحاج أبوعاقلة..
شكراً كتير متعتنا بأسلوبك الجميل وكلامك الرصين وكلمك البديع يا أبو الحجاج

[الحاج أبو عاقلة]

أخي الزعيم أهلاً بك
أولاً إستمحيك عذراً في أن تسمح لي أن أخاطبك هكذا ( الزعيم ) وأسمح لي أن أحييك على الأسلوب المتفرد الذي ظللت تخاطب به رواد الموقع والحق يقال أن فن الخطابة في حد ذاته إبداع وأنت الذي طوعت نافر الكلمات والمعني الحرون وجعلت العاصى سهلاً . لغتك هذه لا يستخدمها إلا سوداني معتق الأصل.
فلك مني التحية على إسلوبك الجميل
هل تقلبني صديق .... ؟
لكني لا أجيد هذا المفردة التي تسخدمها
تحياتي :
أبوعاقلة
النهود

[حسين عبدالوهاب عبدالكريم]

حيّ النهود وحيّ كل ساكنها
ما بها حَيٌ وحتى كل ساكنها
وردد الشعر في أرجاءها غردا
توصف بها يا حاح أماكنها

[الحاج أبو عاقلة]

وأنا أحييك بحرارة يا أخي حسين يا ملهم الإبداع يا فنان ويا نفس الشعر الذي هو من نفس الرحمن
تحيات صباحبة

[حسين عبدالوهاب عبدالكريم]

الأخ الشاعر الحاج أبو عاقلة
لازلت أردد
أنت الملهم فأنت الذي تحرض قريحتي بشعرك الجميل ومواضيعك الهادفة ومعانيك الجميلة وأسلوبك و الفذ وتعابيرك المؤدية للمعني
والشعر يحتاج للتحريض وإذكاء القريحة والإهتمام بالشعر يولـّد في الشاعر حماس لينتج ويكتب
فشكرا على اطراءك يا شاعر يا ملهم

[الحاج أبو عاقلة]

الأخ حسين أنا أقترح أن تجمع كل الردود المساجلات التي كتبتها للرد على قصائدي في دوان شعر تحت مسمى مساجلات بين النهود والرياض أيه رأيك