المساعد الشخصي الرقمي

مشاهدة النسخة كاملة : وجع الغروب

مهيرة الوطن المتألق
18-06-2006, 07:13 PM
وجع الغروب

--------------------------------------------------------------------------------



وجع الغروب
ما خلاص سكة خطاى ما راضيه
ترجع عن مساره
لملمت وجع الغروب وبيه
صبغت كل خضاره
يا جراحاتى العميقة
ويا محاريبي ومزاره
قولي للى اللساتو بعشم
في سنا الدنيا ونضاره
ما خلاص البيا راحت
والسنين بان انحساره
كنت يا ما كنت ناديه
وفي الصفات طبعى الجساره
وياما كنت لما أضحك
تعلن الآهات وداره
ويا ما أحرفي كان تقارع
في دروب الاستعاره
والقوافي للمنافي
تهزم الغربه ووداره
ويا ما جلجلت المنابر
وبالقصيد كانت مناره
وياما بي لمة غوالي
هان شقا الدنيا ومراره
ويا ما شان زولاً بريدو
كل حزن جواى توارى
ولما كان دنياى تغيم
بكتم الآهة وحساره
وأضوى في كل المسارب
للمساكين الحيارى
بس خلاص البيا راحت
وكل جميل راح يا خساره
Nachtigall
18-06-2006, 08:50 PM
ويا ما جلجلت المنابر
وبالقصيد كانت مناره
الاخت الغالية مهيرة
وستظل المنابر دوما تتطلع لمثل هذة الكلمات الممتلئة بالدعاش ورائحة الرطب
مزيدا من الابداع والتألق

ناخ تيغال
Abu baker
19-06-2006, 08:16 AM
سلام .. مهيرة وسلام ياوطن ..
وفي حضرة القمر تغيب النجوم اللآلئ .. وفي حضرة من أهوى أرقص طرباً مذبوح بغير سلام .. مملوكك لكني سلطان العشاق .. هكذا تغنوا ..
وفي حضرتك تتواري الكلمات خجلاً وتفر عن مخيلتنا كل القوافي . لك التحية وأنتِ تشكلين حضوراً رائعاً في تلك المحبوبة بنغازي .. لك الخلود وأنت تعمقين إرتباطك بالوطن في ليلة ظلماء تنيري بها الطريق عبر أجيالك وبهم "أن شليل وينو أكلو الدودو شليل وين راح أكلو التمساح" في هدأة تلك الليلة .. لك التحية وأنتِ أحاجي وبوح وإرتباط لك التحية وانتِ دبلوماسية أنثي تعبر الآفاق وتُعبر عن كل مهيرة هائمة في رحاب البسيطة .. وعشمنا أنو سكة خطاك ترضي وترجع لي دياره .. رد الله غربتكم أختي فالبوح جميل ..
ويا جراحاتى العميقة
ويا محاريبي ومزاره
قولي للى اللساتو بعشم
في سنا الدنيا ونضاره
ما خلاص البيا راحت
والسنين بان انحساره
كنت يا ما كنت ناديه
وفي الصفات طبعى الجساره
وياما كنت لما أضحك
تعلن الآهات وداره
ويا ما أحرفي كان تقارع
في دروب الاستعاره ...
ـــــــــــــ
بعض عمرك ما لم تعشه
وما لم تمته
ومالم تقله
وما لا يقال
وبعض حقائق عصرك
أنك عصر من الكلمات
وأنك مستغرق في الخيال ! "الفيتوري"

دمتِ بود ..
مجتبى ...
حسين عبدالوهاب عبدالكريم
19-06-2006, 02:52 PM
لما انت بتكتم الآهـ وحساره
ليه بتندب شقوة الدنيا ومرارة
والي جاي لو كنت تعلم
إمكن أحسن
ووجهه تكسوه النضاره
وكل خطاويك اللي جايه
ليك بتحمل
دنيا مليانه ببشاره
والله بعلم
ايه يكون البجري بكره
يمسح الآهـ وحساره
خلي حلمك ديمه سامي
وانفض المره وغباره
وثبت الإيمان بقلبك
تكتسب قوة وجساره
وتلقى كل الكون بغني
والصحاري تبقى مزهوه بخضاره
alrasheed
19-06-2006, 03:55 PM
والله يا اخ حسين عبدالوهاب عبدالكريم

انت شاعر موهوب بالجد
ياربي الابيات دي كتبتها انت؟
وألفتها متين؟
حسين عبدالوهاب عبدالكريم
19-06-2006, 04:32 PM
قالو أصل النار شراره
لما تلقى الليها بزكي
تلتهب تملأ الأكوان حراره
والكلام البلمس الوجدان بحرك
في القلب نيرانه ترتفع الحراره
وغصب عنو الزول بعبر
وعنو ترتفع الستاره
حجر الظلت
20-06-2006, 08:49 PM
الأخت العزيزة والشاعرة المرهفة نجاة ..
لكم نحن مشتاقون لك ولهذا الإبداع ....
واصلي