لبن القُصّر- قصيدة جديده

[الحاج أبو عاقلة]

لبن القُصّر

كلمات الحاج أبوعاقلة- النهود – ولاية شمال كردفان

يا ريت لو أقدرأكتب عنك
كل خواطرى الما تتفسر
ويا ريت لو أقدر أوصف حالى
لما أشوفك وبيك أتاثر.....
أهـ يا سلافة الريد الصافي
آهـ يا سلالة الناس النُدر
* * * * *
كل ما أقرب لحظات منك
ألاقي خطاكِ بتبعد أكتر
لانك ساميه وراقيه مكانه
لانك شايله الهم الأكبر
هم الناس الديمة غلابة
هم الناس الساكنة الغابة
هدّ الظلم ضلوعها وكّسر
* * * * *
ما بين القاعة وحي الأزهر
خطاكِ بتمشى دوام ما بتفتر
عشان ما تجيب للناس البسمه
عشان ما تعاود الجرف النسمه
عشان ما يلقو اللبن القٌصّر
خطواتك تمشى دام مابتفتر
ما بين القاعة وحى الأزهر
* * * * *
كل مظلوم إتعلق بيك
كايس النصر يجيه مؤزر
جاكِ يغالب في آهاتو
يكفكف دمعو السال إتحدر
همو يلاقي الحلم الضايع
أملو اللقمة التشبع جايع
جثم الظلم في صدرو إتحكر
* * * * *
بحلم يلقي العيشة الصافيه
بحلم يلقي الدواء والعافيه
والأقلام لمجدو تسطر
* * * * *
دايرك تبقي الشوف لعينو
والبسمه النايره تعلو جبنو
زي الولد البين أماتو
وسط الدايرة هزّ وبشر
آهـ يا سلافة الريد الصافي
أهـ يا سلالة الناس النُدّر


الثلاثاء 13-6-20006م
الحاج أبوعاقلة - صحفي

[حجر الظلت]

العزيز الحاج أبوعاقلة
تحياتي لك يا راجل يا ذوق

[الحاج أبو عاقلة]

أستاذنا الطريفي شكراً جزيلاً على لإطراء أو هكذا عودتنا ، يهمنا تعليقك كثيراً وهو الحافز لنا لمواصل الكتابة