مراسى العز

[الحاج أبو عاقلة]

مراسى العز

شعر الحاج أبو عاقلة :- النهود ولاية شمال كردفان

لا قدر شوقك يسيبني
ولا فتر مشوار حنينك
لا حضن قيفك مراكبي
لا رسيت في مرفأ دونك
* * *
القليب الصافا ريدك
أصلو ما ممكن يخونك
لما تفرحي بيك يفرح
وديمة حزنان لشجونك
* * *
ياني ما بين هم وآهـه
مشتاق دوام انا لعيونك
لا السفر نساني ريدك
لا العمر باعد سنينك
* * *
أصلي ما قادر أفارقك
لأني ما عارف بدونك
ماشي منك وبكره جاي
ليك يا الوضاح جبينك
* * *
تمسح الهم والكآبة
بسمة من أرداف سنونك
يملا رب الكون رحابك
ومن عيون الناس يصونك
* * *
يا مراسى العز وحاتك
أصلى مكتول بعيونك
الشايله من أسمك ملامحك
في هداوتك وفي سكونك

النهود 4/4/1998م


الحاج ابو عاقلة – صحفى - النهود – ولاية شمال كردفان
- مدير مركز الزاجل للإنتاج الإعلامي والفني
- محرر صفحة رسالة كردفان الكبرى بصحيفة أخبار اليوم السودانية
- محرر نشرة موقع النهود في الإنترنيت

[حسين عبدالوهاب عبدالكريم]

ده الشعور من قلبك ينبض
بي حنان تبديه عيونك
والكلام القلتو أجمل
يحكي عن مبلغ شجونك
أنت فيك إحساس وراقي
وصادقة تعبيرات شعورك
تلمس الوتــر المخبى
وديمه تعزف بي لحونك
تشجي من يقرأ لشعرك
والله كان يا حاج في عونك

[الحاج أبو عاقلة]

الأخ/ حسين عبد الوهاب
لك الشكر مثنى وثلاث ورباع على هذه الوصلة الرائعة - كم أدهشني هذا الرد الذي بدى لي وكأنه جزء من قصيدتي مراسي العز - لله درك يا رائع وأنت تنثر درر القول وحلو الكلم لتثلج به صدورنا
أعانك الله ، وما عدمناك

[حجر الظلت]

الأخ العزيز الحاج أبو عاقة
تحية وسلام كتير