عزة في هواك .. خليل فرح

[نوال]

:o عزة في هواك

عزة في هواك عزة نحن الجبال

وللبخوض صفاك عزة نحن النبال

عزة ما بنوم الليل محــــال

وبحسب النجوم فوق الرحال

خلقة الزاد كمل وأنا حالي حال

متين أعود أشوف ظبياتنا الكحال

عزة ما سليت وطن الجمــال

ولا أبتغيت بديل غير الكمــال



***



وقلبي لي سواك ما شفتو مال

خذيني باليمين وانا راقد شمال

عزة ما نسيت جنــة بلال

وملعب الشباب تحت الظلال

ونحن كالزهور فوق التلال

نتشابي للنجوم وانا ضافر الهلال

عزة جسمي صار زي الخلال

وحظي في الركاب صابه الكلال

وقلبي لسه ما عرف الملال

أظنه ود قبيل وكريم الخلال

عزة ما أشتهيت نوم الحجال

ولا السوار بكي في يمينا جال

وعزة في الفريق لي ضيق مجال

قبيلة بت قبيل ملأ الكون رجال



***

عزة شفت كيف نهض العيال

جددوا القديم تركوا الخيال

روحك أم سماح سري كالسيال

شجوا الفؤاد حيوا محسور الليال

عزة في الفؤاد سحرك حلال

ونار هواك شفا وتيهك دلال

ودمعي في هواك حلو كالزلال

تزيدى كل يوم عظمة ازداد جلال

***

عزة في حذا الخرطوم قبال

وعزة من جنان شمبات حبال

وعزة لي ربوع ام در جبال

وعزة في الفؤاد دوا يشفي الوبال

[فرح ود تكتوك]

تسلمي يا رائعه على القصيده

[Nachtigall]

الاخت نوال
شكرا على القصيدة الرمز ..
اللهم ارحم خليل فرح واسكنه فسيح جناتك.

ناخ تيغال

[Abu Safi]

شكرا علي تحفة المبدع خليل فرح ( رحمه اللّه رحمة واسعة )
و الرمز الباقي أبد الدهر ....... و ذوقك سليم .
علّ الأجيال تتناقلها بالحفظ و صون الرمز ...... سوداننا الغالي غلاوة النفس . وله العزّة و المنعة .
ولأهله القدرة و الالتفاف حوله و السموء به و نبذ الفرقة و الشتات باذن اللّه .

[صلاح سعيد]

مشكورة أختي ألغالية .. رحم أللة ألمبدع ألسوداني ألدنقلاوي ألحلفاوي ألامدرماني ألشاعر خليل فرح ..

خليل فرح ألشاعر ألنوبي عندما خاض مجال ألشعر قالوا لة أقرانة ألشعراء ألفطاحلة أنت نوبي ولاتصلح للشعر وبالفعل أثبت لهم أنة شاعر فوق كل ألشعراء, حالة كحال ألفنان ألنوبي ألموسيقار ألدكتور وردي قالوا لة أقرانة ألفنانين ألفطاحلة أنت نوبي ولسانك لن يساعدك في ألغناء وبالأخص ألغناء في ألحقيبة وتغني بغنية ألحقيبة بعد تحديث لها ووضح زخرفة موسيقية موزعة جميلة أدهشت فطاحلة ألفنانين من هذا ألفنان ألنوبي ألمبدع ألذي حباة أللة حس مرهف يفتقرة كثيرين من ألمبدعين..
مشكور يارائعة..