مسدار

[nazar hussein]

شبكتينا يا آمنه وشبكت الناس معانا
في شباك شبك شبكت شبايكو معانا
لبست توب شبك في شبايكا مشابكانا
والداير الشبك يشبك شبكته معانا

[بدر الدين بابكر مصطفى]

ماهــــا أم تموكة
عناق أم سومري الخدّر تبوكة
تقود الديس على الرقبة الدهوكة
بتتسنّد تقول طاعناها شوكة
ود الفراش

[بدر الدين بابكر مصطفى]

الأخ نزار حسين
أكان ما أخاف الكضبة إنت زاتك شاعر لا يشق له غبار ...
**
مرحباً بك ... وسعيد بأن أتواصل معك هنا ...

[عادل الخضر]

الأخ نزار

لك التحية و أنت تشبكنا بي مشبك في شباك هذه الشبكة الجميلة

في هذا السياق من الشعر الذي أعتقد أنني أحبه كثيراً


ننتظر منك المزيد ...ز

[nazar hussein]

الاخ بدر الدين
انا اكثر سعاده بالتواصل معك
وبالمناسبه انا ما شاعر بس بحب الشعر الجميل
لل من قلبي كل ما تطلب وبعض ما تحب

[nazar hussein]

العزيز عادل
سلام يحوي كل الحب
اعدك باني ساجتهد في مواصلة تشبيكك في شبكتنا الجميله
واتمنى انك ما تنقطع

[بدر الدين بابكر مصطفى]

من القبلة بَان .. لاح لي بِريق النـو
وحِس رعّادو بنقُز في الضمير كو..كو
بشوف طير القطا دوّر مسـارِع هـو
وفُرقان البطانة .. اتماسكَن بالضـّـو
(الصادق)

[nazar hussein]

بدرالدين أخوي ألكع تعال ألفاني
فارقني المنام وأتورمت أجفاني
من شفت البنيه خلاص قليبي جفاني
والروح رفرفت فاضلي بس أكفاني

[عادل الخضر]

يا نزار أخوي الدنيا لفَّت ولفَّت
تب ما مر يوم آلامنا قلَّت وخفت
ولو كانت حياتنا بالوجح إتحفَّت
أرجى الله الكريم لي فرجو ديمة إتلفَّت

[nazar hussein]

عادلنا العزيز الدنيا لفت ولفت
بشوفك في الوجع روحك خلاص اتكفت
لكن بالصبر وكان النفوس أتصفت
تنوم مرتاح ضمير وتصبح دموعك جفت

[عادل الخضر]

يا نزار أخوي أصلو الوجع بارينا
والضيق دوام زايد كمَّـل صبرنا الفينا
بنرجع للإله من شر الخلِـق يكفينا
يفرِّج همومنا وتنزل رَحِـمْـتو علينا

[nazar hussein]

عادلنا العزيز شوف الوجع بارينا
يسقينا الحناضل وبالسموم يهرينا
بس ربك كريم وكمان دوام طارينا
يدينا المراد ونمسى الزمان سارينا

[عادل الخضر]

يا نزار أخوي الدنيا دايرة بصارة
ومن كٌتر الهموم نفوسنا فاقدة خيارا
طمح بحر النزيف وسنينا عدى خدارا
وكل يوماً يمر ربحنا فيهو خسارة

[nazar hussein]

عادلنا العزيز الدنيا جد دواره
بالحلو يوم تجيك..ويوم تجيك بمراره
ضاريها الهموم علق عليها ستاره
وأجعل ابتسامتك تضوي لينا مناره

[عادل الخضر]

إخي نزار
هذا المسدار ليس من تأليفي كسابقاته ... و إنما هو ما رأيته مناسباً للرد على ذلك المسدار الذي كتيته أنت للأخ بدر الدين

أب آمنة عينيا المنام جافاها ما طلاها
وحركة سير شراييني الضغط شلاها
أحاكي الضفدعة الوابل العِـيَــن بلاَّها
لامن عقدة الليل الحمار حلاَّها

وهذا المسدار لأحد شعراء البطانة

[عادل الخضر]

يا نزار أخوي صدقني جد بتشرَّف
في منتدى الدوبيت ألقاك وبيك إتعرَّف
(نتلاقى في المطرة) وكما الصعيد إن خرَّف
في دنيا من أحلام وأصالة ما بتتحرَّف

[حجر الظلت]

الأخ نزار
وهذه تتمة المسدار
يا ريح الصباح ويا الجيتينا من أبو سالف
كيف سبيلها خيولا سيدها عابد وكالف
وده الخلاني فوق نيران جهنم خالف
وحار بالحيل فراق الزول بعدما يوالف
ومن أمس العصير جيت بي فريقك حايم
لقيت ود الأريل الجادع وريده ونايم
نفسك مستكة وريقك فطور الصايم
فرع المحلب التحتو القرنفل قايم
-------
شبكتينا يا آمنة وشبكتي الناس معانا
في شباك شبك شبكت شبايكو معانا
لبست توب شبك وفي شبايكا وشابكانا
والداير الشبك يجدع شبكتو معانا
--------
وفي عينيها عالم تاني ما شفتوها
زي لون آمنة ما لاقاني ما شفتوها
زي آمنة ما لاقاني ما شفتوها
في إيدي الحرير مساني
في إيدي الحرير مساني
ومن يوم داك جاني الجاني
ما شفتوها يا خلاني
تعالوا تعالوا
تعالوا
تعالوا
تعالوا
تعالوا
وأسمعوني خبارا ما شفتوها
دي الحاشاها ما خبارا ما شفتوها
دي الموقده العباد بي نارها ما شفتوها
دي المن النسيم تضارا ما شفتوها
الصديرها عام في الدارة
صديرها عام في الدارة
وخلت ناس فلانة حيارى
ما شفتوها يا خلاني
-------
وعامت
وعامت
وعامت
وعامت
وعامت
عامت وإنتنت زي بانا ماشفتوها
ساقيها الندى ورويانة ماشفتوها
ده الكمل صبرنا وأذانا
شفتو عيونه في سيقانها ماشفتوها
-------
واحدين قالوا شفنا الشافها ماشفتوها
واحدين قالوا ضامر هافا
براي بجيب أوصافها
وسادل ديسها لي أكتافها
ماشفتوها يا خلاني
-----------
الجنن قلبي وزاد عقلي طمسه
فستانها البمبي وزرايرو الخمسة
الليلة ماجا
هنا يا الثريا
وهنا يا البنية
دي الحارقة قلبي وكاوياه كية

[بدر الدين بابكر مصطفى]

أهو أنا ما قلت ليك، وتابعتك قبل كدا يا نزار على ما أظن في سودانيزأونلاين، كان عندكم خيمة بي غادي
وأظنك من جيهات كلي وشندي والعقيدة
والأخ عادل برضو ماشاء الله ... ضربو ضرب أنصار
أنا ما عندي غير أسجل حضوري وإعجابي وأديكم من كلام أبواتنا الكبار:
يا خالق الوجود أنا قلبي كاتم سرّو
ما لقيت من يَدِرْكَ المعنى بيهو أبرّو
قصبة منصح الوادي المخدر درّو
قعدت قلبي تطوي وكل ساعة تفرّو
الحردلو

وعمكُن الطيب ود ضحوية يقول:
الدندر كرب كيف القعاد والراحة
أبقي لزومة يا ناقة البدو السراحة
البلد الغُزار شُدرو وقرودو قُباحة
كيف الصدّة يا عِبدلة منو قماحة

وقال عمكن أمحمد ود القاسم
مشتولة الجزيرة الترّعت ما جفّت
رويانة وعقب شالْت الثمار وأتعفّت
الفوق وشو بي كُلاق مسايرو مكفّت
ما بلقاهو ما دام حظي كلو مزفّت
(البطاحين)

[بدر الدين بابكر مصطفى]

غِشيتْ عِدْ الصُّبـَاغْ نَشَّحْتُو فِيهُو نَشَاحْ
خَتَرْ واتوَجـه الغَافي المِسِن لُوْ وِشَاحْ
عَلي سِيدْ الجمـال ابُوْ مُدْفعـاً رَشَّاحْ
قَنَّبْ يِحـاكي في تِعلْ الخـلا الكَشَّاحْ
(الحردلو)
يا أخوانا الكلام دا فهمتوه

ملاحظة يا أخ الطريفي، لا استطيع تنسيق النص إلا بعدما أرسل المشاركة ثم أضغط على تعديل، لماذا؟

[عادل الخضر]

الأخ الغالي بدر الدين بابكر
لك كل الشكر وأنت تسجل معنا حضور ... وتكتب بصوت عالي
وبعد ما أن إلتقيناك على هذا الويب سايت أتمنى أن نلتقيك على أرض الواقع

[بدر الدين بابكر مصطفى]

أتشرف بذلك يا أخ عادل ...
عسى الله أن يجمعنا في بلدنا
لك تحياتي مثنى وثلاث ورباع

[حجر الظلت]

الأخ نزار وضيوفك الكرام
هاكم دي لحدي ما أجي
--------
قال أبو دقينة ودقلبوس يمدح أب علي

ما بشرب الميخــــــــانة يجرها
عمي القبيلة عقيدها وحـــــــرها
حربو العريضة وواسعــــة بصرها
وعربا تجي عن نوقو بضـــــرها

[عادل الخضر]

حباب دار جعل غرب النيل أو كان شرقو
أسياد الكلام مطرو ورعدو وبرقو
أشراف الوعود وللعهود ما بخرقو
نحن أهل النحاس وعدونا تب بنحرقو

[حجر الظلت]

فوق يا ناس دار جعل

[جبر الدار محمد جبر الدار]

سلام ناس دار جعل جيتكم اعتبرونى بينكم ضيف
معروفين ناس كرم وشهامه درقه وسيف
ان ضبحتولى خير.. وان لا كمان بتا خفيف
لكن بشيل حالكم لسانى طويل وبعرف الوصّيف

[ساداتكو]

سلام ناس دار جعل جيتكم اعتبرونى بينكم ضيف
معروفين ناس كرم وشهامه درقه وسيف
ان ضبحتولى خير.. وان لا كمان بتا خفيف
لكن بشيل حالكم لسانى طويل وبعرف الوصّيف


...

حبابو والله الولد الدايماً بقول حرّم

جبر الدار الأصيل الدايماً بيك أنجم

تسلم يا البحر يا الفيك السمح والسم

دار جعل بيك تتباهي يمين حــرّم

[ساداتكو]

دار جعل عِزّ القبائل من الحضر للبادية

في الشينة وكتين السيوف تكوكب شادية

والخيل تعكّرِس من الوجع وتقبِّل جادية

صغيرنا بيوزن رجال الصفوف العادية

[ود الخليفة]

حباب دار جعل غرب النيل أو كان شرقو
أسياد الكلام مطرو ورعدو وبرقو
أشراف الوعود وللعهود ما بخرقو
نحن أهل النحاس وعدونا تب بنحرقو

يا عترة المختار بيك الخلايق يرقو
أشراف الوجود ساما حاما وبرقو
ما شفت ناس بالبركة فاتحين كتابهم يرقو
جموعهم والفراسة تيمان وما بتفرقو

عربون المحبّة أخوى طوّالي رامي بياضو
والطرف الكحيل سوادو حلّي بياضو
شعر القوافى الشاردة ياما زرت رياضو
وابتهج الصحاب بطهر الفؤاد وبياضو

[ودبامسيكا]

[QUOTE=جبر الدار محمد جبر الدار;23285]سلام ناس دار جعل جيتكم اعتبرونى بينكم ضيف
معروفين ناس كرم وشهامه درقه وسيف
ان ضبحتولى خير.. وان لا كمان بتا خفيف
لكن بشيل حالكم لسانى طويل وبعرف الوصّيف[/QUOTE




مرحبتين حبابك وصل مرتع الضيفان
معروف عز اصل وفلته في الاوزان
مى عوايدنا البخل ولامبيت ضيفنا جعان
حرم فقرانا يعشيك شية ومرارة ضان

[هشام]

فوووووووووووووووووووووووق