بشرى سارة لكل المغتربين فرصة استثمار من الجهاز/متوكل طه محمد

[متوكل طه محمد]

القصة ومافيها ياناس السودان اون لاين المغتربين وياجبر الدار ولدنا
اخونا الاستاذ على الحسن ودحاكم كان مغترب باليمن خمس سنوات وعندما انهى الاعارة فكر فى حلم بعيدا عن ناس جهاز المغتربين
خطوات الحلم
فى اليوم الاول جاء جبريل العربى وهو يحمل جريدا من النخل كم راس ومعها حطب نيم ودقش من التمر
فى اليوم التانى عملو راكوبة كبيرة جوار البوابة على الشارع العام
فى اليوم التالت بدأت القصص والحكايات تروى وبدأ اهل القرية ينسجون الاحلام
الحلم الاول واحد قالى استاد على اشترى لورى هينو كبير ولونو اصفر وانا شفتو فى ام درمان مع ولاد عرديب المشهورين بهذا النوع من العربات
الحلم الثانى واحد قال على ود الحسن اشترى لورى سفنجة شو ف عينى دى وركب فيه حمدان ود الدغير وباكر بيصل البلد
الحلم التالت قالو على ود زينب اشترى بوكس موديل تسعين جديد لنج وجاى فى السكة مسافة السكة ويصل
اما الاستاذ على متعه الله بالصحة والعافية فقد ذهب ذات مساء بهى الى جزيرة مساوى واشترى بقرة والدة لونها احمر تسر الناظرين طبعا يا ابو مروة وياطارق ودياب البقرة والدة ولادة طبيعية وسط البرسيم واللوبيا يعنى ما ولدت فى الخرطوم ولامستشفى ساهرون ولا التين والزيتون ولادة عادية فى مساوى وفى اليوم التانى هاجرت من مساوى الى قو زهندى مسافة 2كليومتر ووصلت قوز هندى فى التاسعة مساء ونامت ليلتها الاولى فى الراكوبة وفى الصباح بدرى مع الدغش صبحت عليها والدة على حاكم متعها الله بالصحة والعافية وقدمت لها برسيم اخضر وحبة عيش فتريتة لزوم الضيافة وانتظار اللبن
فى التامنة صباح اليوم الثانى وزعو اللبن مجانا فى الحلى كرامة للعربات اقصد البقرة...............
والقصة دى كلها ياناس السودان اون لاين عشان الخبر دا
------------------------------------------
أكد الأستاذ السميح الصديق نور وزير الدولة بوزارة الاستثمار , أولوية الترويج في قانون الاستثمار جاء ذلك خلال الاجتماع الذي جمع بينه والمهندس تاج الدين المهدي الأمين العام لجهاز تنظيم شئون السودانيين العاملين بالخارج بوزارة الاستثمار والذي قدم مشروعاً لإنشاء شركة ترويج لاستثمارات المغتربين بالتنسيق بين ادارة الاستثمار بجهاز المغتربين ووزارة الاستثمار , ومن جانبه أفاد السميح أن الجهاز يمكن أن يكون شريكاً أصيلاً في شركة الترويج التابعة لوزارة الاستثمار وفق أسس محددة معبراً عن ذلك بان هذه الشراكة ستكون ضابطاً ممتازاً يرتقي بالأداء ويواكب العالمية.
هذا ويـأتي مشروع شركة الترويج في توسيع دائرة استثمارات المغتربين واستقطاب عدد من رؤوس الأموال الخارجية عبر علاقات السودانيين العاملين بالخارج.

[ود نقزو]

يا جماعة لي متين بيتبقوا مساكين كده

معليش يا جماعة خلونا من الكلام الكبار ده واستثمار عائدات المغتربين وتفعيل الترويج وكلمات ما انزل الله بها من سلطان
يا جماعة الخير نحن ناس بسيطين شديد بساطة اهلنا في القرى المنتشرة في سوداننا العامر
ليه وهنا بأكد بالف سؤال وسؤال ؟؟؟؟؟؟؟؟
ليه ناس جهاز السودانيين العاملين بالخارج ما يعملوا نظام اقراض يسدد بالاقساط في صورة مشاريع صغيرة يقوم بها كل مغترب اختار العودة الطوعية او القسرية الى السودان ؟
ليه نفترض بأنه كل مغترب معاه اموال الدنيا والاخرة وجيوبه مليانه وبنوكه فل الفل ؟

يا جماعة والله المغتربين في بعض منهم مش لاقي يأكل - لا قادر يشتري تذكرة ولا قادر يدفع ضرائب ولا قادر يمشي قدام ولا قادر يرجع وراء اها يعمل شنو؟
معظم المغتربين لما يجوا اهلهم ياخدوا كم يوم مريشين وبعد اسبوع تعال شوف اشكالهم بقت كيف ؟
حتى من الناس الهناك في السودان مش ممكن واحد يتكرم ويمد يد المساعدة ليهو وهو كمان ما بقدر يقول يا جماعة الحقوني يعمل شنو المسكين ده ؟
الا كان يقعد يخت باله لكلام ناس الجهاز وكلامهم الكبار ده والعايز ليهو مجلدات ترجمة علشان تشرحه ليهو؟
ولا ما كده يا اهلنا العزاز - ارجوكم فيدوني لانو مرارتي خلاص انفقعت من الشئ القاعدين نشوفوا

[السليماني]

الموضوع دا عاجبني بالحيل ... بس اشرب كباية شاااااي وارجع .. واشكر الاخوان متوكل وودنقزو