قصيدة عكير الدامر في وصف الدنيا

[فرح ود تكتوك]

عكير الدامر فى وصف الدنيا :

سرورك ما بتم عاقباهو ديــــمة الفجعـــــــة

وظاهرك ليـــــنا سكر الا طعمك وجعـــــــة

كم طفشتي مرتــــــاح وقلبو مابي الهجعــــة

روحو تشابي وانت قطعت خـــط الرجعــــه
.....

تقابلك عروس تعشق معانــــي رقيصـــــــه

تملاك بالمحبة وتمشي نازله نقيصـــــــــــه

ما يغريك دلاله وتوب جمال بلقيســــــــــــه

عاين للقبور وبعدين سماحـــته بتقيســــــــه

...

بتقابلك جنينة تمتعك بي ثمــــــــــــــــاره

وترقد في امانا وتنهمك بعمـــــــــــــــارا

باكر تبقى ليك حنضل تشوفو دمــــــــارا

تسحب منك .... وتدق مسمـــــــــــــــاره

...

زولاً شاف رقاد العبروهو مشبــــــــــــر

والزول البرص فى الطوب ووشو مغبر

إتأكد دة بكرة مصير غير إتكبـــــــــــــر

إنسى الموت والمــــال والبنون إتبتــــــر

...

دى الغدارة دى الحقارة دى العقـــــــارة

كم قلبت زغاريد عرسه بي نقــــــــــارة

أعلِنا بالحرب قبال تشب الغـــــــــــــارة

وقبل الروح تغرغر وتبقى في الغرغارة

...

إتغشينا بي حبك لبسنــــــا عبايــــــــــــة

يا موية الرهـــــاب الما ملت كبايــــــــة

عجيب يا دنــــيا أمرك الا نحنا غبــــاية

عاشقين الجمــــال في لمعة الحربايـــــة


منقول من محمد عمر الامين منتدى بربر

[فرح ود تكتوك]

الجزء الذي تم نشره هو جزء من قصيده اسمها درقة الرغوه(الدنيا) وهذا هو النص الكامل للقصيده



درقة الرغوه

درقة الرغوه كم دمرت ناس ومساكن
كم زليت بعد العزه شامخ وماكن
كم صبحت حي متلج وراكن
وكم صبحت عمران زي مباني سواكن

************

الغنى فيك يوسع وللزياده يكابس
في اللين يخضر وقلبه طاري اليابس
بسراع تدي ضهرك ويبق وجهك عابس
وحالا ينقلب عريان بعد مو لابس

************

خيرك ما بدوم يالبهرج الغشاشه
يامطر المنيه الديمة سابقه رشاشه
كم قصرا جميل انواره تضوي بشاشه
دمرتيه اصبح فاقد المقشاشه

**********

عمارك لي خراب والفرحه فيك لي كربه
اسمك من الست الفانيه دار الغربه
اولك المعيشه جري وتعب في هربه
والتانيه الامل والثالثه دفن التربه

************

كم حطمت راجلا في مشيه مشلق
صبحتيه بي حبل النكد متعلق
دربك لي البصاحبك بي عجل بينزلق
يا صقر القبور الفوقنا ديمه محلق

تعصري على البريدك وتقربي تانسيه
يترك طاعة الخالق يكون ناسيه
بي توب سحرك البعمي القلب تكسيه
يصبح محتضر في تربته تمسيه

************

سرورك ما بتم عاقباه ديمه الفجه
ظاهرك لينا سكر الا طعمك وجعه
كم طفشت مرتاح قلبوا مابي النجعه
روحه تشابى وانت قطعت خط الرجعه

************
.
شمس حسنك مخنقه ما بدوم اشراقه
يا لعبة شليل عضم اب قبيح براقه
كم لي الليهو منزل في جنان وراقه
خنت اسياده هجوا ولجوا يالفراقه

************

فيك الحي يأمل والفرح يبداله
ترقص ليك ببشر يفتكر رايداله
لي الشبال يميل ترميه يا اللابداله
تتني رقبتك يا الخاربه وتكوسي بداله
اوصيك نفسي اوصيك (الحيا وما فيها)
شق ود الاحد بيت الشبر صافيها
لي متين تقنعي ونار الضلال تطفيها
تمسكي سكة الشافوها حاجه تفيه
************

اتغشينا في حبك لبسنا عبايه
يا موية الرهاب الما ملت كبايه
عجيب يا دنيا امرك الانحن غبايه
عاشقين الجمال في لمعة الحربايه


تبقالك جنينه تمتعك بي ثماره
ترقد في امانها وتنهمك في عماره
باكر تبقى ليك حنضل تشوفه دماره
تسحب منك النعمه وتدق مسماره
*************

دي الغشاشه دي الغداره دي العقاره
كم قلبت زغاريت عرسه بي نقاره
اعلنها بي الحرب قبال تشن الغاره
وقبل الروح تقرقر تبق في القرقاره

************

يا سامع دبيب النمله جوف العاتمه
يا كاشف الخفايا الفي الضمير كاتمه
بي جاه سيد الرسل الكرام ابوفاطمه
لطفك بي عكير يوم الدفن والخاتمه

[فرح ود تكتوك]

هذه قصيد جديده لعكير الدامر يصف فيها رحلته الى الحجاز ونظرا لطول القصيده قمت بتقسيمها الى ثلاثة اجزاء وانشاء الله كل يوم سبت حا يكون في جزء جديد ولكم من دامر المجذوب تحيه .




الجزء الاول


وصف رحلة عكير الدامر الى الحجاز


نحمد ربنا انقطعت خيوط اللعبة
بقت النيه في البيت المسمى الكعبة
سواها اب عروض عيسى البحل الصعبه
رحمان فره القلب الملان بي الرعبه

**********
صبح يوم السفر لاح الفجر واتبسم
ادينا الفريضه هوى البشاير نسم
العفش المسافر لي الحجاز اتوسم
الهم القبيل كاسينا بدا يتقسم

**********
خرجنا من الصرايه الغردت اطيارها
بي شارع المعونه طلعنا بي السياره
الحضروا الكرامه وجونا بدري زياره
ما فاتونا لامن قامت الطياره

**********
ندهونا ودخلنا الجمرك اتفتشنا
ما لقوا حاجه لا في لباسنا لا في عفشنا
الطياره القامت وصوت لخمته دوشنا
حسن الحظ خدمنا ادونا شي نعنشنا
القايد بطل موصوف بكل شطاره
ما شفناه بينا وبينه نازله ستاره
خصانا الاله سفرتنا بيه اختاره
مده بسيطه جده الطيبه جينا مطاره

**********
شبيه ابن الوليد عيسى الرفع رايتنا
بي التكس البيهجر نوره زان جيتنا
في المحجر نزلنا وفزنا بي غايتنا
عن يوسف عظيم العنصرين بيتنا
عصرا بدري لي مكه الكرمه قمنا
جيناها المغيرب وفيها ما تقول نمنا
طفنا البيت وفي الحرم المزخرف حمنا
حالة هيبه ياريت فيها عشنا ودمنا

**********
القلعه الشريفه الربى عزه ملاها
بي نور الجلال الما بيزول جلاها
حمام البيت يدور بي الرحمه لي نزلاها
كرم الله جبريل الامين طلاها

**********

نعمة الجاها لي الحج بي ضميره مهاجر
قاصده الشوفه بي حياته متاجر
محراب السلام سور الامان الحاجر
تاريخ سيدنا ابراهيم وامنا هاجر

**********
جيناك بي اشتياق مافيه بيعه وشروه
شوق لي زمزم البتشفي نشرب ونروه
الشوق لي الهروله الجيناها طابقين سروه
سنة ابو البتول بين الصفا والمروه

*********

[فرح ود تكتوك]

الجزء الثاني من قصيدة عكير الدامر التى يصف فيها رحلته الى الحجاز

في مكة المكرمة فزنا بالدرناها
بي الاثنين صباحا بدري بارحناها
شعاير الحج ملازمين واجبها ومعناها
في منى غير فطور قهوة منى شربناها

**********
اقبلنا ومسينا بعاد من الافات
ناس الحاجه لي كرم الضيوف واقفات
جبل حرا في عيونا ومنهن ما فات
وفي قلوبنا السفر صبحيه لي عرفات

**********
لي عرفات صباحا بدري قمنا رحلنا
حمام الذنوب جيناها غاية املنا
جبل الرحمه فوقه طلعنا واتغسلنا
محمود الاله ولدونا دابنا نزلنا
قرينا دعا الخروج عند المغيب وخرجنا
في مزدلفه لي جمع الحجر عرجنا
صلينا العشا اتهنينا واتخارجنا
لي منى بي السرور الزايد اتدرجنا

**********
الفجراتبسم هبينا لي الثمرات
اتوضيتا رايقين والعقول حاضرات
على الشيطان جميع كبرنا بي نترات
وحكمناالهدف ساعة رمي الجمرات

**********
بعد رجم اللعين لي مكة عدنا رجعنا
لي الكعبه الشريفه نطوف وننهي وجعنا
ادينا الافاضه وفي جواره رتعنا
بي باب الملك فخر الزمان ودعنا

**********
حمدا لي الاله شطبنا كل حرام
تمينا الطواف بي كل خير ومرام
جينا المنزله اتشرفنا بي الاكرام
اكرم الله حجه وفكه الاحرام

**********
غيرنا وحلقنا وتاني منى عدنا له
لي الجمرات نتمها نختم الجينا له
روح ما بتستريح ان نقصت الزاينا له
والعين خلقه ما بتشبع من الباينا له

**********
خلصنا من الرجم والرجعه بقت اشغالنا
من ما قمنا لي العربات مرقنا عزالنا
قاصدين مكه قبلتنا البتصلح حالنا
فيها اجر صلاة الجمعه شاغل بالنا

**********
وصلنا محل قعادنا عمارة الاشراف
جوار بيت الله اقرب سكنه في الاطراف
اتبردنا واتطيبنا برقا راف
لحقنا الجمعه لمينا السعاد وظراف

**********
عيون راسي وعيون قلبي طيلنوا
دي القدامن الكعبه الطشاش زيلنوا
مخزن عنبر الشوق بالفرح كيلنوا
عاينن والوصف لي الما نظر شيلنوا
**********
اهلا كوكب الدين قبلة التبجيل
نعمة الجاها مشتاق للزياره عجيل
دي الكعبه الحماها المولى دون تاجيل
هلك اعداه رش بي حجاره من سجيل

**********
القبله المؤمنه من هجوم وكوارث
الحصن الحصين حامي الجهول والدارس
دي الكعبه ال نزل لها طير ابابيل حارس
في وادي العزاب لا خلا فيل لا فارس

**********
الحرم الموشح بي كل عز وجلال
امان الفوقها طاف لبس السعاده هلال
النور المؤمن بي جبال وتلال
قصاد جامع العظيم عند الله سيدي بلال
بي يوم الاحد بدري الصباح احرمنا
جينا العمرهربنا بيها جاد اكرمنا
نوينا لي جده قانون مكه عرض وحرمنا
عدنا المنزله وبي دم حمل كرمنا

[فرح ود تكتوك]

الجزء الاخير من رحلة عكير الدامر الى الحجاز يصف فيها المينه المنورة


رجعنا المنزله وفكينا احراماتنا

حمدا يا كريم في مكه شي ما فاتنا

حجه وعوده يا مولاي بعد لماتنا


نسالك القبول يا داري بي حالاتنا

**********

بي الاثنين نهار فارقنا مكه وسوره

طالبين جده بي سراع شرفتنا قصوره

جينا على المطار والروح بقت محصوره

في زيارة النبي المعصوم جميل الصوره

**********

اتناشر مساء ربي جاد سرانا

طرنا مبشرين ناسا كتار بي ورانه

قاصدين ساكن الروضه الرسول بشرانا

شوقنا مسابق الطياره في طيرانه

**********

وصلنا سلامة رب القدره هون امرنا

في الروضه الشريفه ورى المطوف درنا

شباك النبي الممدوح قبضنا وزرنا

شقي ما تقول بقيف عن بابه يلق نصرنا

*********

ما همينا بي البرد الدفر موجاته

شاهدنا البقيع الاف مؤلفه جاته

مقام السعداء تتعاله وتلوح سرجاته

زرنا الروضه ذرية النبي وزوجاته

في جامع قبا البقدح طهارة نزلنا

حمدا يا اله العرش تم املنا

قمنا على احد من النخل هللنا (المقصود جبل احد في المدبنه المنوره)

صلينا وسالنا المولى يشفي اهلنا

**********
حبابك سيدي حمزه سلام عشوق يتمنه

شوفة قبرك العندوا النفوس تتهنه

حبابك والصحابه وجبلك القابلنا

جبل احد المبشر بي دخول الجنه

**********

بي يوم الخميس لي جده قالوا العوده

طيارة رجوعكم برزت مبعوده

الزول ما بيفوت ال في الازل موعوده

مطر الفرقه صبت وحركتنا رعوده

**********

اتوضينا جينا الروضه زرنا نبينا

صلينا ادعينا الختوة بيضه لبينا

وادعنا النبي الفوق حبه قمنا ربينا

بي جاه العظيم ما نلاقي شر وغبينه

**********

بي النكس البلاصف لي المطار فرينا

لي الميزان قبل ما يزحموه جرينا

بعدك يالمنوره ما انسرينا

ما طولنا فيكي قعدنا بعنا شرينا

**********

بعد صلينا بي مس الشفا اتسلحنا

شقيتا الالوف بي ناس تقيله رجحنا

في الشباك مسكنا دعكنا واتمسحنا

شلنا الفاتحه بي حب الرسول بارحنا

**********

قاعدين في المطار بي الحاله ربك يدره

ندعك في العيون والدمعه لي منقدره

طال الشوق على النبي سيد رجال الحضره

وطال الشوق على القبه ام هلال الخضره

عشرة وعشرة من ارض المنوره طرنا

حامدين شاكرين زرنا ومحينا وزرنا

بي فوق لي السحاب مثل البخور طرنا

جده قربت لي البيندوره والدايرنا

**********
حداشر وعشرة طبينا المطار ورقدنا

هبت ريح شمال حب الوطن عاودنا

السقط البيلفح في الجسوم هددنا

لي المحجر على يوسف نزلنا وردنا

**********
يومين عنده في جده ام رخام روقنا

بي عربيته من سوق المنى اتسوقنا

اكسير الضيوف بي جميله كم طوقنا

بي انسه اللطيف لي الدامر اتشوقنا

**********
عشرة ونص مساء يوم الاحد ودعنا

جده الربي عظمه زين من مطاره قلعنا

اتعشينا في الجو ربي رحمة رفعنا

زرنا الكعبة والنبي في مقامه رتعنا

حمدا يالاهي نظفنا واتفكينا

رحنا وجينا ما صابتنا حاجه شكينا

كتوفنا نزل تقيله وهللت ملكينا

عدنا سلامه في الخرطوم فرح ركينا

**********

[فرح ود تكتوك]

الجز الاول من قصيدة(فلسطين) عكير الدامر




شعلوها اليهود سالت سبب تحريكه
اصلها نابعه من بير الفساده امريكا
بريطانيا الد نيه البد ري نازله شريكه
فرحت لي الحرب عجب الزمان يد ر يك
اتحدوا العرب جعلوا الشهاده قياده
اظهروا عزة الاسلام وروح اسياده
على سيناء ام رمال الباقه ناره زياده
زحفوا عجاله دبابه وجنود وبياده
***********

الملك الشريف بي رجالته وشرفه
اظهر عزة العربي المؤصل وعرفه
وقت هبشوا العرب زعله المخزن صرفه
بي طيارته قام اللوم بعيد من طرفه
جيش الاردن الجاب الحسين عصبيه
عسكر في الحدود ورسم خطوط حربيه
خطر الرجعه قافله مصر جيوش عربيه
سوريا بقت ورى اسرائيل من الغربيه
**********

عسكروا في الحدود بنيان حجر مرصوص
على اسرائيل نوو وضمروا الهجوم مخصوص
قايلين وحدها بي وراها ما في لصوص
جيوش اثنين دول تنكث تقول السوس

[مينو]

بعد صلينا بي مس الشفا اتسلحنا

شقيتا الالوف بي ناس تقيله رجحنا

في الشباك مسكنا دعكنا واتمسحنا

شلنا الفاتحه بي حب الرسول بارحنا


اتحفنا بالمزيد

لك من كل التقدير

[فرح ود تكتوك]

شكرا لك اخي مينوا على المرور وانشاء الله كل سبت بكون في جزء جديد

[مينو]

إتغشينا بي حبك لبسنــــــا عبايــــــــــــة

يا موية الرهـــــاب الما ملت كبايــــــــة

عجيب يا دنــــيا أمرك الا نحنا غبــــاية

عاشقين الجمــــال في لمعة الحربايـــــة

[مينو]

اخى فرح كم هى مواضيعك جميله وكم انت متدفق كاتدفق الازرق
ونرحب بيك بينا فى المنبر الحر وحقيقى استفدنا منك الكثير
ولى طلب بسيط ياريت لو تحدثنا عن عكير الدامر ولو قليل

[فرح ود تكتوك]

الاخ مينو شكرا على المرور والبوست منور باصحابه


هو علي ابراهيم عكير

ولد بمدينة الدامر مربع واحد حلة العشير عام 1906 والده هدندوي وامه جعليه درس المراحل الاوليه بمدينة الدامر ثم التحق بكلية غردون التزكاريه .اخر وظيفه شغلها هي مشرف كتابي (باشكاتب القيادة الشماليه بشندي )

توفي عام 1990 بمدينة الدامر

نسال الله له الرحمة والمغفره

[مينو]

دائما اى مزيج ينتج منه شىء جميل اللبن غذاء متكامل والعسل فيه شفاء للناس اذا مزجت الاثين معا يعطك مزجه لذيذه تستفيد منها
هذا هو عكير الدامر قراءة له كثير من القصائد فى الشبكه العنكبوتيه
وايضا سمعتها فى التلفاز و الراديو ولكن لم اتعرف عليه من قرب
للاسف الشديد نحن جيل اليوم لا نعرف الكثير عن مبدعينا وهذا الدور دور النشر والمختصين فى هذه المجالات ودورنا نحن فى البحث عن المعرفه

لك منى كل المنى بالتوفيق وشكر على الرد اختك مينو

[فرح ود تكتوك]

اختي مينوا شكرا جزيلا على المرور

الجزء الاخير من قصيدة فلسطين

غاروا المسجد الاقصى القديمه حضارته
هد شعاير الدين الهلال ومنارته
بلد شد الرحال الواجبه شرعي زيارته
بي الاسف اليهود الليله داسوا طهارته


**********
امريكا المحرك قوم عدو جاراتها
والت في العرب ليل والنهار غاراتها
حصنت اليهود ومداينها وحاراتها
غطت بي مظله تقيله طياراتها

**********

امريكا وبريطانيا المناي دمارن
الكون كله اصبح عارف استعمارن
اصلهن من قديم عمل الخيانه عمارن
ومعروف بدري اسرائيل تملى حمارن

**********
لو هزموا العرب بي الاسلحه الفنيه
وارتكبوا الفظائع وكل خصله دنيه
بي البترول سلاحنا وقوة الوطنيه
ناخذ التار بي اذن الله البعرف النية

*********
روسيا البدري قالت انا الصداقه دليله
هي الغدرتنا هي الخدعتنا بتهليله
باطنها نار علينا وفي كلامها خليله
وقت المحنة ما نجتنا اقل قليله

*********
رحم الله شهداء العرب ما ناحت
عايله اتشردت او جرحى انت صاحت
فلسطين يا العليك النكبه نزلت طاحت
الجبين فداك والسابقين الراحت

***********
رجال سوريا الكواسر للدفاع
بي تاريخ مجيد فوق للنجوم ارتفعوا
وقت سلكت معاهم لي اليهود ما شفعوا
وعند النكسه صبر ايوب تجرعوا نقعوا

[mohad tayeb]

**********

عمارك لي خراب والفرحه فيك لي كربه
اسمك من الست الفانيه دار الغربه
اولك المعيشه جري وتعب في هربه
والتانيه الامل والثالثه دفن التربه


************

سرورك ما بتم عاقباه ديمه الفجه
ظاهرك لينا سكر الا طعمك وجعه
كم طفشت مرتاح قلبوا مابي النجعه
روحه تشابى وانت قطعت خط الرجعه

************
pls more

[فرح ود تكتوك]

الجزء الاول من قصيدة الحكم

غاب نجم الاهل بقت العداوة اقارب
البتجيبُ فزعه يكون دبيب وعقارب
البتقول صباح الخير تلق بكره مغارب
دبرة صُرة وجعَه جُوه حربة غارب

**********
يبس شجر المحنة وراحت الاهليه
ود اختك نصيحتي تقاطع بالكليه
ود العم نصيبه وبي المرض ممليه
والعجب ان قبيل عدمان ولِق ماليه

**********
الجنى في المحاكم شفنا خاصم ابوه
والحق الجلي الشياب قبل بابوه
الشبان بقوا البيصلي ما بحبوه
والدين المحمدي اصبحوا يسبوه

**********
الصبي قاطع الوالدين ولم حباله
والاخو بي البترمي اخوه مشغول باله
الخال انسحب ود الاخت سباله
والعم ود اخوه يدُور نسب يا باله

**********
الجار قاطع الجار والحيط علوها
وان قلت النصيحه الفي الكتاب قتلوها
الاخوان على بعض السيوف سلوها
واموال اليتيم اهل السبح اكلوها

**********
ما يتقدم ال لي عله ديمه عطاه
والبهتك عرض مكشوف تملى غطاه
البزرع له شوك لابد يتوطاه
والبطبخ له سم لابد يتعاطاه

ونواصل السبت القادم..............................

[فرح ود تكتوك]

شكرا لك اخي mohad tayeb على المرور

[فرح ود تكتوك]

اول حاجه اسفين على التاخير

الجزء الثاني من قصيدة الحكم


ود بيت المحل ما تجر معاه موده
وما تتغش بي رزقه الحجرما انكد ه
كل يوم الفرح لي لاصلو ياخذ رده
مو زول ستره ود الايده قاطعه المده

*********

كافح في حياتك ولي البزاحمك راكب
واتدور مع الايام نجوم وكواكب
امش قرابى مرة مرة خليك راكب
اصلوا الدنيا طوفان والمعيشة مراكب

**********

ونسة العالمين يا ريبه ولا نميميمه
والانفس على الشهوات كتر تصميمه
الايد البترحم ما بيقولوا هميمه
والبزرع جميل ببقاله لوم وزميمه

*********

الحرة المؤصله اصبحت فجريه
ولدت بالحرام وسط الفريق عصريه
الوليان يقنتوا وديمه في ناريه
خايفين كلمة الضابطيه دي الحريه

**********

الافكار بقت فوق الحساده جريها
واللي الله راحت وما في زول طاريها
انطفت النصيحه وبدري طار طاريها
اما شهادة الزور حاضرة لي البشريها

*********

عمر سوق النفاق سرت وسيعه تجارته
انبهل الفساد الجار قمز فوق جارته
الما تم سبع سنين يبخ في سيجارته
ود التسعه صاحب رخصه واجبه فجارته

*********

الجور والضلال بين الخلائق شرن
الانفس على الشهوات جميع انجرن
ربات الخدود ومن الحجاب اتوارن
السوق فيه باعن واشترن واتعرن

[فرح ود تكتوك]

الجزء الاخير من قصيدة الحكم



جميل خوف الله راح واهل العلم رضيانه
وبي هتك العروض واحدين بقت عيانه
كثير الامنوه وسوى كل خيانه
حاكي المرفعين قال العبور تقيانه

**********

اب عمرا طويل ما بنقتل بي ظروفه
واب عمرا قصير موية شراب مغروفة
سو عيشتك توكل والرزق مصروفه
بيض ديمه والعند الله مي معروفه

***********

تجارة اخر الزمن فانيه وعميره قصير
المال ما بيعز ود القبيل مو خير
الشبع بعد الجوع سيده ديمه صغير
الريش البقوم بعد الكسر ما بطير

*********

تجار اخر الزمن زابله ومتاعه قليل
اخذوا ايامكم اصله طيره في ايد عيل
ما دام شبعوا ناس ود الريالتوا تسيل
الافضل على الخلا وا شديده نميل

*********

عمل الخير اجر والنية مركب وصله
والشر دار خراب لي الديمه بتقنص له
رفق الدون ودار دواه قطعه وفصله
والعب والكلب لو طار يعود لي اصله

[فرح ود تكتوك]

الجزء الاول من قصيدة في مدح الشيخ الجعلي


في مدح الشيخ الجعلي

حباب الكوكب ال لي كل شر حباس
حباب السره من ناس همزه والعباس
طريق ديمه المنيل ونادي خاتي يباس
قباب نور الزمان البق من كدباس

***********

يافرع الطهاره الصافي من ادناس
بعيد قلبك من الوسواس والخناس
جبل الرحمة يا مشرع جميع الناس
تعيش قبلة صلاح لي كافة الاجناس

**********

البنا ما بقيف يا سيدي من غير ساس
ياسر حاج حمد بركه وندى واحساس
صوطك لي المرض من العضم حساس
يخرج بي عجل ذي طلقة الرصاص

**********

احياك الله لي الاسلام ركن حراس
عرق دم الرشيد سيد العلم ميراث
تعالج بي النظر لا محايه لا كراس
وبي موية الوضوء بتطرد جنون الراس

*********

حبتك السعاد اهل العقول النايره
بي جنحات صقور جاتك مخويه طايره
والد المعتصم يالجعلي سيد الدائره
احياك الله يا درع القواسي الغايره

*********

ونواصل السبت الجاي .................................................. ........

[فرح ود تكتوك]

الجزء الثاني والاخير من قصيدة عكير الدامر في مدح الشيخ الجعلي



بدر الكمال ايام زيارتك حالية
صاحب المرتبه المن الله جاتك عاليه
شريان العباده ال في الدراويش ماليه
ملفات الزكر دامت عليك متواليه



***********

ياعينة الرخا الوجت برقها الشايله
وفقك الله بازلها كالسيول السايله
يا جبل التكيه وابو الجيوش الهايله
شاة جابر طعامك فيي المسا و في القايله

**********

خصاك الله بي التقوى النظيفه الصافيه
بالحياة طلوع ثم الصداقه الوافيه
يد ذو الفقار لي كل شر متلافية
فلتحيا وتعيش وعليك تاج العافيه

**********

كم وفقت ناسا طولت متعاديه
كم ارشدت عالم في الحضر والبادية
سفينة نوح صحبتك في الامان متهايه
نعم البها فاز وحياته صبحت ناديه

*********

رايتك في المنام واخذت جلسه وهانيه
واليوم الله جاد بي شوفتي ليك التانيه
لكل كتاب والدنيا اصلها فانيه
نعم الجالسك لو كان دقيقه وثانيه

**********

اشكر خالي مجذوب لي هون قاسيه
صدق لي الرؤيه ثبتت راسيه
يا نسل النبي الضو الليالي الماسيه
اقبلها من عكير الجاب ليك متواسيه

[نصرالدين عبدالله عكير]

إنه علي إبراهيم عكير ينحدر أصله من قبيلة الهدندوه بشرق السودان
ونزحت اسرة عكير ( العيكراب) إلي مدينة الدامر في القرن التاسع عشرومنها الي شتي مدن السودان ولكن ظلت الدامر هي الموطن الروحي للاسرة وقد إرتبط بها عكير إرتباطاً وثيقاً وإرتبطت بأسمه
وكان عكير رجلاً مثقفاً جداً وكيف لا وهو من أوائل المتخرجين من كلية غردون ويجيد اللغة ألانجليزيه بالإضافة للهجة الهدندوه وكان يجد نفسه في حياة البادية التي كان يهاجر إليها في رحلات صيده المشهورة وعاشق البادية الشاعر / عمر البنا وكان يمتلك عدداً
من كلاب الصيد الفائقة السرعة هذا بالاضافة لاجادته إستخدام البندقية في صيد الطيوروالغزلان وكذلك التماسيح .
إن كتابة الشعر جزء من حياة عكير الدامر وهناك جوانب أخرى فهو أول سوداني يمتلك متحفا أثري زود هذا المتحف بنوادر التحف وكان يعتز بهذا المتحف إعتزازاً كبيراً ويعتبره جزء من حياته وقد سجل ألاستاذ/ الطيب محمد الطيب في برنامجه صور شعبيه عدد من الحلقات معه ويضم المتحف أيضا أعداداً من ألإلبومات الضخمة الحجم
بها صور كل آل عكير عبر حقب الزمان المختلفة.
وجانب آخر من شخصية عكير الدامروهو الشجاعة وقد سجل ذلك عبر قصيدته المشهورة ( الدود قرقر حبس الدرب ) والتي يعني بها نفسه
وكان رحمه الله يمتاز بدقة المواعيد ومن الطرائف في هذه النقطة ( إنه في يوم من ألايام كان قد دعاني وقريبة لي لتناول الغداء وكان الموعد في تمام الساعة الثانية وتأخرنا عن الموعد نصف ساعة فاشطاطت غضباً والقي بجميع الطعام لكلبه جغورفأتينا ولم نجد شيئا إلابقايا من عظام )
هذاوقد إشتهر عكير بخفة الظل والفكاهه والطرب والحياة البسيطةفعندما
يدعوا أحداً مقرباً لنفسه ينصب له خيمة مصنوعة من الصوف ويفرش أرضيتها بالسجاد ويعلق القربة المليئة بالماء أمام الخيمة بالاضافة لعدة الجبنة وقطع من متحفه وبذلك يحس أنه أكرمك في المكان المحبب إليه
وهو البادية هذه لمحات من حياة الشاعر عكير الدامر وإسمحوا لي من خلال هذه النافذة أناشدة آل عكير بالحفاظ علي تراثه وأتمني أن يعاد بناء متحفه في قلب مدينة الدامر التي عشقها وإرتبط بها من خلال إسمه ووجدانه.

[فرح ود تكتوك]

شكرا لك اخي نصر الدين على المرور ويكفيك شرفا انك من اسرة هذا الشاعر الرائع

الجزء الاول من قصيدة حرب العلمين

ظروف الانجليز الليله هب نسيمه
في الالمان مدافعهم اشتعل مكسيمه
من(تونس)نفوهم بي خساره جسيمه
عقدوا وعرسوها وسلموها قسيمه

**********

قول لي وين نجع (رومل)وخت رحاله
كيف همل جيوشه وفز يسترحاله
محل ما بروح شبابيك الهلاك فاتحاله
اصبح قبله عصفور والهبوب لافحاله

*********

الفي ناسنا بينه وما بيفيد تهديدنا
عارفين البهضرب قوله ما بفيدنا
خطبكم اصبحت تملي تزيدنا
وين نفخة قبيل مفتاح (مصر) في ايدنا

[حجر الظلت]

فووووووووق

[فرح ود تكتوك]

شكرا لك اخ كمال الطريفي على المرور


الجزء الاخير من قصيدة حرب العلمين


ما حملتوا اللقيتوها وعملتوا حرابه
بالجزم المساجد حمتوا في محرابه
كم شنعتوا كم مثلتوا كل غرابه
ساعة الانتقام حلت ونادى غرابه

***********
البتبد للشر ولي نجمه وغاب
بقتل بي عجل يفني الاهل وعقابه
الداير يشابك (الانجليز)في رقابه
ذي الدار صراع كاس الاسود في الغابه

*********

لاح برقا افل بق كل قلبا امن
استبشر بخير نصر الحليقه ضامن
جيشها الاول اتقدم وتبع التامن
العدو خلى سلحاتوا وكسر قدامن

[فرح ود تكتوك]

الجزء الاول من قصيدة مدح

(الخرطوم) دخوله صعب على العادون
جيشه وشعبه بي حب الحرب مفتون
قسما بالضحى وبالتين والزيتون
بقتلوك ولاد القطعوا (راس) غردون

**********

وقت رصاصه جض وحاك صوت الوابل
جفلت غزال سروب وحلفت ما بتقابل
هرس(ابوالدهب) دكاها عيش وسنابل
السما رعده طيارات ومطره قنابل

*********

وقت عجت الاعصار دخانه زرقن عكل
فتتها يالمربعن قلت اخير اتوكل
جثث اصحابك اتردم كجبل البركل
فيها اتمتع اب صلعه القطابي وشكل

*****************************

[محمد عبدالرحيم]

الغنى فيك يوسع وللزياده يكابس
في اللين يخضر وقلبه طاري اليابس
بسراع تدي ضهرك ويبق وجهك عابس
وحالا ينقلب عريان بعد مو لابس

************

خيرك ما بدوم يالبهرج الغشاشه
يامطر المنيه الديمة سابقه رشاشه
كم قصرا جميل انواره تضوي بشاشه
دمرتيه اصبح فاقد المقشاشه




اللــــــــــه اللـــــــه عليك يا فرح ود تكتوك القصيده اكثر من رائعه إنه يتلاعب بالكلمات كيفما يشاء إنه مبدع ووالله ثم والله لم أكن أعلم عن هذا الشاعر شيئاً .
مشكور مشكور كتير كتير كتير على حرصك على إبداعات هذا المبدع رحمه الله وغفر له ذنبه .

واصل ونحن متابعين

[فرح ود تكتوك]

العفو يا محمد عبد الرحيم وشكرا عل المرور
الجزء الاخير من قصيدة مدح

بحر موتك قرن في التربه جاها عديل
تهديد نفختك لي جيشنا بالتنكيل
تهديد نفحتك لي جيشنا بالتنكيل
تهديد لي التماسيح بي الغرف في النيل

**********

نزلوا الفي المعاشات الصبرقاساهن
لبسوا الكاكي جد عوا الناعمات بي قفاهن
منادي الغيره بي حب الوطن ناداهن
جسومن نملت حس السلاح هزاهن

*********
اسبوعين انس قضيتها فيك هنيه
ياخاتم المنى ويا بهجتي المعنيه
اكسير البلاد بي المتعه ديمه غنيه
يا اعظم مثال لي بلده سودانيه

********
اقدمها دره خالده نظير جميلكم في
ما بسافر واقوم بتشكرات مخفيه
حبكم لي صار كعبادة الصوفيه
ياهل الخليل يا احلى عشره وفيه

********

[فرح ود تكتوك]

شوق وحنين للوطن
خطاب للمرحوم(الخال محمد افندي سليمان رحمه الله)

اهديك السلام يامركز العشمان
عساك في صحه تامه وفي نعيم وامان
تمام فراقه يادود كيده ابوعرمان
ومشتاق الغريب لامن يموت ندمان
ماتقول زينه الخرطوم ولا امدرمان
ينسيني العشير الليله انا ظمان
رحولي من البلد ياخال بلاوي زمان
ومرضا قاسي ما بداوي الحكيم لقمان

*********

مبتول جسمي شوق اما القلب بردان
ومنحرف المزاج من الانس حردان
اصبح قلبي لي خيل الوله ميدان
بقيت كالمحتضر جات روحه في الوردان
بي حكم راضي وباليقين شبعان
وبي القسمه القبيل مقسومه لي قنعان
ما بضيق غير شبيه الفي الذنوب طمعان
شبيه الفاجر النمرود جنى كنعان

**********

كيف حالة البلد كيف حالة الاخوان
وكيف اكل ابن ادم وسائر الحيوان
غلاوة العيش وعدمه الهزت الاكوان
اظن لعبت كتير بي صحة البدوان

**********

ما بستاهل الدامر يكون تعبان
وما بستاهل الجوع رفه العربان
احبه دوام مندي وخيره لي البيبان
وعربة مخرفين عرفهم سمن والبان

***********

[حجر الظلت]

فووووووووووووووووق

[محمد محبوب]

كلام جميل والله

[النحاس الرز]

الله عليييييييييك يا ود تكتوك... رررررائع.. ونحن متابعييييييين

[سودانية]

يا سامع دبيب النمله جوف العاتمه
يا كاشف الخفايا الفي الضمير كاتمه
بي جاه سيد الرسل الكرام ابوفاطمه
لطفك بي عكير يوم الدفن والخاتمه


مشكور فرح ود تكتوك على الأشعار الجميلة لعكير الدامر ويديك عافيه على المجهود