المساعد الشخصي الرقمي

مشاهدة النسخة كاملة : مجادعه بينى وهلالاب...

حسونه خالد
31-12-2008, 12:24 PM
استقبلت بعد مباراة المريخ والوحدات عدة رسائل شماته من اصدقائى الهلالاب
وحبيت أنقله ليكم لكى تتعرفوا على نوايا الهلالاب السئيه تجاه مريخ القرن الذى تسيد افريقيا طولا " وعرضا" ونال ما نال من الكؤوس المحموله جوا" ،مانديلا ..وسيكافا وغيرها
وارجو من اخوانا الهلالاب الموجودين على مستوى منبرنا أن يتحملونى اذا طالتهم كلماتى
وقصدى المزح ليس الا .
.
فالى الرباعيات :

ابن عمى الخليل :
مريخاب جميع مبروك عليكم سبعه
اهداف قاتله تلو الأخرى جات متبعه
فضيحه كبيره تنضاف لى العجائب السبعه
فى غابة النزال مريخكم اصبح ضبعه

الرد:
هلالاب جميع مشكورين فضيلة خيركم
اهداف الهزائم حاملها دائما" طيركم
هونفيد الميجر بى تسعه عطل سيركم
وترجى التوانسه بى سته اخدو شكيركم

خليل :
معروف فى القتال لينا طايل باع
فى استادكم انتو نحن شفنا رباع
اجدد جرحكم والفشل تباع
واكبر شكر ليكم ياحسونه ضباع

الرد:
معروف فى الفشل ياأهله طويل باعكم
وبى صفر الكؤوس الشوالى كم كم زاعكم
متغور جرحكم والهزيمه أسماعكم
وسطيف الجزائرى بهدفينو شل جماعكم
خليل:
نحن الديمه لى رفعة وطنا بنسعه
وانتو الديمه عايدين بالفشل واللسعه
سانجورج دون فى شباكم تسعه
سيرتكم بقت بين الخلوق متسعه

الرد:
السمعه الهزيله بيها محفور ساسكم
ومريخ الشموخ ياخلى رافع راسكم
السيره الزميمه محموده بيها نواسكم
وهونفيد الميجر بى تسعه شالوا مقاسكم

خليل:
الوحدات قدر فى جوله يطفئ شماعكم
والسودان قمح بعد الخراب ماساعكم
اهليك يامصر فى دارو كيف كيف ماعكم
وفى بحر الفشل ما لقينا ند فى قاعكم

الرد:
مجد سوريا بشوف صنع امجادو
على حساب الهليل فنون المهاره اجادو
التاريخ بسطر ونحن يانا اسيادو
خلوهو الزعيم يا اخوانا لى اندادو

مجاهد :
ارباب شندى مافى مثيلوا فى التاريخ
قاد الصفوه لى قدام وماهو مسيخ
انصار النجيمه الفالحه فى التوبيخ
الوحدات تألق وارعب المريخ

الرد:
الوالى اللزوم جمل الحمل والشيل
بدفع مابضن مابكتر الجلجيل
استاد الزعيم خلاهو زاهى جميل
خلا الفرق شاسع بين النهار والليل

مجاهد:
سبعه كتيره مابتستاهل التعليق
فالحين فى الشتيمه وايضا" التلفيق
يا أهل النجيمه البيبسى ببقى دقيق
هلالنا كبير ورافع راسو للتحليق

الرد:
سبعه وتسعه يا خوى من باقيكم
ولسان الشتيمه لابسوا تاج (طاغيكم)
يا أهل الهليل المابتحترموا اذن صاغيكمم
خلوهوا البعيد اخشوا الإله واغيكم

مجاهد:
ايام الدهر السبعه
والجمرات عددهن سبعه
والوحدات قلبكن سبعه
ضافكن لى العجائب السبعه

الرد:
ياهلالابى انبح مريخنا عارف قدرو
فارس النزال دائما" بصارع القدرو
حققنا الكؤوس وانتو ليها بتدرو
وفى دواليبكم انتو شوف عينى العناكب بجرو

ولكم ودى....
مريخابى حتى النخاع

حسونه خالد
0923584974
ود النتيفة
31-12-2008, 12:53 PM
ياخالد يمين... فى النمة شلت الشكرة
على ناساً شُتُر..ما بعرفو غير العترة
وراياتهم جميع فى الكورة يوت منبترة
هلالكم منسحب. .ياخوانا اخير السُترة
حسونه خالد
31-12-2008, 01:17 PM
ياود النتيفه الشكره فيك محريه
ومعروف الزعيم بى حنكتو الشعريه
علوم المعارف قطعه هيلو ثريه
واحد مننا من هلالم يوزن ميه
حسونه خالد
31-12-2008, 01:35 PM
حاولت تعديل الرباعيه الاخيره لكن رفضت حفظ المتغيرات
تعديل:
ياود النتيفه الشكره فيك محريه
ومعروف الزعيم بى حنكتو الشعريه
علوم المعارف قطعه هيلو ثريه
واحد مننا من هلالم يسوى سريه
ود النتيفة
31-12-2008, 01:38 PM
ياود النتيفه الشكره فيك محريه
ومعروف الزعيم بى حنكتو الشعريه
علوم المعارف قطعه هيلو ثريه
واحد مننا من هلالم يوزن ميه

يسلم ابورنا الفيهو بحسن قولى
وما تنسى البطل عباس زعيم ارتولى
والسيد كدوك الفيهو بروى فصولى
ومن غلب الهلال طربان يمين لا حولى
لا تقوليا هيثم لا تقولى سولى
الهميم
31-12-2008, 03:20 PM
ياخالد يمين... فى النمة شلت الشكرة
على ناساً شُتُر..ما بعرفو غير العترة
وراياتهم جميع فى الكورة يوت منبترة
هلالكم منسحب. .ياخوانا اخير السُترة

ما غلباً قديـــم ننساهو لامن نطرا
سبعة مجيّهة ماغسات القلوب منفطرة
في الحارس المجلي متوالية جات متقطرة
ربط الراس بدالو في عيونو أولى القطرة!!!!!!
عباس ودأرتولي
31-12-2008, 03:58 PM
المريــــــخ المتل الدهب في اللـــون..
انت قـــمر عشرة الضــوى الــــكون..
رفعت هامتك..وللجماعة الله يكون في العـون..
الانسحاب صفتهم..ولو غلبم الكلام بنقلو كلام قون
عباس ودأرتولي
31-12-2008, 04:13 PM
يسلم ابورنا الفيهو بحسن قولى
وما تنسى البطل عباس زعيم ارتولى
والسيد كدوك الفيهو بروى فصولى
ومن غلب الهلال طربان يمين لا حولى
لا تقوليا هيثم لا تقولى سولى

ودالنتيفة الدديييمة بتعطي النـاس حلاوة و بلسم
الجمااااااااااعة مفقوعة مرارتم وابورنـا يتبسم
حجر الزلط والكلس مبسوطين بالانجاز الذي يتكلم
وودارتولي يبلغ للمريخاب سلامو في جـو مفعم
أبو الريش
31-12-2008, 04:56 PM
هلالنا مرفوع راس في الكورة ياهو وحيدكم
منضوم في الحرير لامع كمان في جيدكم
يوم اللقا الممتاز للمولى أرفعو إيدكم
كان ما بان الهلال كيفن تعيدو عيدكم
ابو محمد
31-12-2008, 05:01 PM
اسياد البلد مالكم تخلوا الجماعة يعرضوا ..
ناسن مسبعين بلا خجلة ينقزوا ...
جادع ياالسليماني ماينبشوا هلالنا ..
اسياد بلد صعبيين وعالي مقامنا ...


ههههههههههع
عباس ودأرتولي
31-12-2008, 05:37 PM
اسياد البلد مالكم تخلوا الجماعة يعرضوا ..
ناسن مسبعين بلا خجلة ينقزوا ...
جادع ياالسليماني ماينبشوا هلالنا ..
اسياد بلد صعبيين وعالي مقامنا ...


ههههههههههع
انتو للرئيسكم ايـدو فــوق المصحف مختوتـة؟
لا تتكلم عن المريخ الانجازاتو الفي التاريخ منوحتة
نعرض في البلد لانو التاريخ حقنا ومسجلنو في نوتة
خليكم في الربـراب الماعارف رجـلو وين مختوتة
السليماني
31-12-2008, 05:39 PM
آلو ..يا فلان كيف حالك انشاء الله الدكتور طمنك وعليك الله كان شفت أولاد الوالي ديل كلمهم يتصلوا بحسن عبدالسلام لأنو الدنيا عندكم سبيع (جليد)وهم ما متعودين على البرد وما شالوا معاهم بطاطين يتسبعوا (يتغطوا) بيها...
• لا والله انا بخير وطمِّن الجماعة بس ناسكم ديل أمبارح جابوهم في نشرة الأحوال السبعية وشكلهم كدا ما بيطمن لأنهم مسبعين خالص خالص وفي حالة سابة وهسع راقدين في عنبر سبعة
ابو محمد
31-12-2008, 06:05 PM
السليماني الهميم في التلفون يناضم جماعه السبعة ..
خايف عليهم من البرد والغلب اب سبعة ...
خليهم ياخوي ديما ملطشين ب فزعة ...
وسليمان وود ارتولي حالتهم تشبه الصرعة ...

:4tds: :4tds:
ود النتيفة
31-12-2008, 06:07 PM
آلو ..يا فلان كيف حالك انشاء الله الدكتور طمنك وعليك الله كان شفت أولاد الوالي ديل كلمهم يتصلوا بحسن عبدالسلام لأنو الدنيا عندكم سبيع (جليد)وهم ما متعودين على البرد وما شالوا معاهم بطاطين يتسبعوا (يتغطوا) بيها...
• لا والله انا بخير وطمِّن الجماعة بس ناسكم ديل أمبارح جابوهم في نشرة الأحوال السبعية وشكلهم كدا ما بيطمن لأنهم مسبعين خالص خالص وفي حالة سابة وهسع راقدين في عنبر سبعة

السليمانى
ما تبيخ البوست يا شعر يازح بعيد
هههههههههههههه
شقيش
31-12-2008, 06:45 PM
ود خالد اهلا حبابك
فكرة المجادعات فكرة جميلة ولذيذة
وبوستيك دة من اجمل البوستات التي اتمني تثبيتها لردح من الزمان فقط اخذ عليك قولك ان نية الاهلة سيئة تجاه المريخ لان اولا النيات من الاسرار التي لا تعلم وثانيا لان المناكفات موجودة وهي ملح التشجيع الرياضي وثاليا لان الاخوة المريخاب كثيرا ما يناكفوننا ولم نقل انهم سيئي النية

لكن واصل في الدوبيت

تخريمة

كنت داير اكتب الكلام دة بالدوبيت لكن لقيت نفسي ما بعرف :sm215:
ابو محمد
31-12-2008, 06:52 PM
ود خالد اهلا حبابك
فكرة المجادعات فكرة جميلة ولذيذة
وبوستيك دة من اجمل البوستات التي اتمني تثبيتها لردح من الزمان فقط اخذ عليك قولك ان نية الاهلة سيئة تجاه المريخ لان اولا النيات من الاسرار التي لا تعلم وثانيا لان المناكفات موجودة وهي ملح التشجيع الرياضي وثاليا لان الاخوة المريخاب كثيرا ما يناكفوننا ولم نقل انهم سيئي النية

لكن واصل في الدوبيت

تخريمة

كنت داير اكتب الكلام دة بالدوبيت لكن لقيت نفسي ما بعرف :sm215:


شقيش كراعك خضراء يازول ، الفنيلة طالما زرقاء اخدت راحتك ، الجماعة كتار وحنكم قوي ..
تخريمة : يازول البعرف شعر منو ... خامينهم ليك .. سمك ... لبن ... تمرهندي ... عواسة ساكت . :tee43: :tee43:
عباس ودأرتولي
31-12-2008, 07:36 PM
شقيش كراعك خضراء يازول ، الفنيلة طالما زرقاء اخدت راحتك ، الجماعة كتار وحنكم قوي ..
تخريمة : يازول البعرف شعر منو ... خامينهم ليك .. سمك ... لبن ... تمرهندي ... عواسة ساكت . :tee43: :tee43:

:tee43::tee43:والله انتو ماشفتو حاجة دا حالتو من خشم الباب:tee43::tee43:
ود النتيفة
01-01-2009, 09:03 PM
وين ابورنا يا عباس؟
حسونه خالد
08-01-2009, 04:53 PM
زعيم البلد كبوتو كانت عارضه
وظروف الطبيعه عليهو كانت فارضه
سطيف فى الزريبه سوا فعل القارضه
اتنين فى الشباك وتلاته فوق العارضه
حسونه خالد
08-01-2009, 05:10 PM
ما غلباً قديـــم ننساهو لامن نطرا
سبعة مجيّهة ماغسات القلوب منفطرة
في الحارس المجلي متوالية جات متقطرة
ربط الراس بدالو في عيونو أولى القطرة!!!!!!

غلبكم فى الحلوق والله واقف عبره
ودواليبكم مشمعه مافيها لو كان ابره
حالتكم صعيبه مريخنا يسلم ويبره
وشوهتو سمعتنا خليتوها زى العبره
امير
10-01-2009, 12:59 AM
السبعة مع الكأسات ياها الفزورة
لا عندكم علم لاكورة
البرنس ياهو السفير ابوشورة
وعجبكم ياهو أبو قبورة
وريدكسلكم صفيحة بنضورة