الجابودي .. نوع آخر من الدوبيت

[سيف كلي]

الجابودي هو أحد فنون الشعر والغناء الذي اشتهر به الجعليون وهو أحد أنماط الشعر الخفيف إن صح التعبير .. فهو يختلف عن الدوبيت في أنه أقصر أي من ثلاث شطرات أو ثلاثي النظم وأرجو المساهمة في إيراد ما تحفظون من هذا الفن الراقي

قش البطانة الفاقع
برعنو أمات براقع
أنا ما بديك: دهبي اللقيتو واقع

قش البطانة الفرهد
فوق المزرقن يرعد
انا ما جافيت لكن دريبك أبعد

يا يمّة انا المزنّب
ماكلاني نار جهنّب
حليل تومي.. اللقا الخريف وقنّب

[سيف كلي]

اللخدر عيش الحدب
يا القايم فوق اللدب
عاشة القشيش، لابد تبقالي سبب

الأخدر عيش الشاتي
صيفو وخريفو مشاتي
أرمولو القيد مفتاحو في حجباتي

يا اللخدر عيش الزرع
انا منك ما بنقرِع
يا اولاد ابوي السوسة بتاكل الفرع

يا يابا ود حيسونة
يا راجل العيلفونة
عرب أم ضمير ما يرحلو يخلونا

يا فتيل الريحة
الريدة ليك صحيحة
ات كان جفيت كلمني بالنصيحة

نحن الاتنين برانا
نتونس في خلانا
فوقك تقيل يا مطرق الخيدرانة

[سيف كلي]

جِدّياً دابو قرّم
يرعىَ العسين والبرّم
شعرو وسواد شبيه الليل الضلم

قـوقـن يا قمــاري
لى أهلنا الفي الضهاري
رشرش تومي .. بقيــِّد البشاري

ومن نظم البنات
الشايب ما بندورو
بالملالة فوق صنقورو
ناخد الصبي ساكت على حنجورو

الشايب بى التسلو
وبالشوكة التنكسرلو
شايب الضلال أحماني قريني أتلو

الشايب الجمجمــــة
نفسك دعاش الرمـــة
ناخد الصبي ساكت يبرد الحمى

البكرة الحومرية
من الغداد بريــة
لا ضاقت قيد .. لا إنشدت بى حوية

يا صنـــدل العرايــس
الأخــدر المتقايــس
الناس عرب .. ما بتفهم الحدايـث

يا صندل الشقيـقــة
تهمونـي بيـك رفيقـــة
الناس عرب .. ما بتعرف الحقيقة

[سيف كلي]

ما هبن الرشايم
واتملن الخيران .. الوزين العايم
الليلة وين أمسيت .. يا التمير فطور الصايم


يا يمة واحراقي
ما قلتو الحي بلاقي
يا اللابس السديري .. سويني ليك عراقي


ريحة البخور والنــدَّ
توبك سمح ما هــدِّ
حكمك ليهن .. حكم السيوف في جدة

[بت الباوقه]

تسلم ياسيف كلي
لك كل الود والاحترام وانت تحي هذا التراث هنا اكاد اجزم ان معظم الاعضاء هنا لايعرفونه
واعتقد انه قريب من تراث في الغرب ولا البقارة تحديدا ما متاكده اسمو الجراري

وانا شخصيا بحب الجابودي جدا جدا

[حسين عثمان أبكر]

تسلم تسلم تسلم
تسلم تسلم تسلم
تسلم
الكلام سمح تب نرجو الزيادة

[عماد الدين عثمان قمر الدين]

شكرا ليك اخي سيف كلي
علي هذا المجهود القيم
وكل سنة وانت طيب
والجميع بخيـــــــــــــر

[سيف كلي]

التحية لك أختي بت الباوقة ..
ولولا المشغوليات فمثل هذه المنتديات ما بتنفات .. وإن شاء أعمل ما أستطيع جمعه من نظم وأشعار الجابودي ..

ولمزيد من التوضيح للذين لا يعرفون هذا الغناء ..
يصطف (الطمبارة) وبينهم الغناي الذي يرمي جدعات الجابودي .. الشطرين الأول والثاني بنفس واحد ونغمة تحلين عالية ..
ثم يختم بالبيت الثالث بسلم أقل من الأول ويكرر البيت الثالث بينما يقوم الطمبارة بالصفقة بالأيدي وضرب الأرض بالأرجل مترافقاً مع حمحمة شديدة من الحلق (يسمى الحنقوق أحيانا) فيما تقودهم إحدي الحسان بالرقيص المتوافق مع إيقاع الصفقة وضرب الأرجل(رايح جاي) بينما يظل المغني في مكانه يردد جزء من الشطر الأخير ..

أما ملاحظتك بأنه مشابه للجراري في غرب السودان .. فأوافقك على ذلك ولكنه أقرب للتروترو في بادية الكبابيش

[سيف كلي]

التحية لك أخي حسين عثمان .. والشكر على المرور

[سيف كلي]

التحية لك أخي عماد الدين عثمان .. والشكر على المرور

وكل سنة والجميع بخير ..
وإن شاء الله السنة الجديدة فاتحة خير لجميع أهل دار جعل بالخير والنماء

[سيف كلي]

صباح الخير باريها
ومو خابر مراعيها
هاجرين أم فوت .. لآمتين حسين يجيها

غنىّ لي يا ربابة
فريع البان حبابا
هوى يافقير قوم علّب التقابة

توب الزراق مو غالي
وحديث خشيمكمُ حالي
حبيب قساي بالريدة شاغل بالي

[صلاح بعشوم]

[اخي سيف كلي لك كل الود وانا اعلم انك من المهمومين بتراث دار جعل واتمنى ان تشد حيلك شوية مع علمي بمشغوليات الغربة وان تتحفنا بالجميل والرائع من كافة ضروب فن الجعليين ولي رجاء صادق وارجو ان يتحقق وهو القاء الضوء على فنان الطمبور الرائع والاخير في عالم رواد هذا الفن المرحوم السايح ود حمد وان تدعو كل من يحب ويعشق هذا الفن ان يدلي بدلوه في هذا المجال سوا بالمشاركة في التحدث عن هذا الرائع او التفضل بكتابة النصوص التي تغنى بها او ذكريات عن هذا الرجل ولك كل التقدير ودمت لدار جعل[/

[صلاح بعشوم]

الحلة جيت باريها
لقيت غزال الريم تدرج في جديها
يا تومي كان جافيت قولة سلام شن فيها

[صلاح بعشوم]

ايام الضيق بولن
والحادثات بتلن
يا خير ابوك خلي القرب يتبلن

[سيف كلي]

الغالي الحبيب .. صلاح بعشوم .. كل سنة والجميع بخير ..

أشكرك على المرور وإن شاء الله ألبي طلبك بالتوثيق للعم السايح حمد منصور صبرة .. وهو أحد الذين هباهم الله بموهبة غنائية متفردة أو قل فنية نادرة .. فهو مبدع في الدوبيت مبدع في الطمبور مبدع في الحقيبة مبدع في الدلوكة مبدع في الحنقوق مبدع في الجابودي
بس أدعو لنا أن تخف عنا مشاغل الغربة

ومن هنا أرفع طلبي لكم أن تتحفنا بما لديكم عن رائد هذا الغناء الجد ود بعشوم ..
الود كله وزيادة

[دابي الرتجه]

بسم الله الرحمن الرحيم

أخي الكريم ،،،، عمده كلي ،،، سلام
ماقصرت تب، فقد أطربتنا بالسهل الممتنع ،،،،


اللخـدر يا جـملنا
وفوقو الحرير متني
سبق الطائرات مسخ جمال أهلنا
،،،،،،،،،،،،،،،،،
باجوركن أب غرامـه
ما برتع الغنامـــه
باكر تجي أم رعود كاشه الهرع قدامه
،،،،،،،،،،،،،،
باجوركن أب ضريبه
المابشبع الغــربيه
باكر تجي أم رعود وتشرب السوريبه
،،،،،،،،،،،،،،،،،،،،،،،،،،،،،،،،،
يايمه أنا المظلومه
متوجه الحـيكومه
فشان المال أدوني طيرتاً بومه
،،،،،،،،،،،،،،،،،،،،
يا قلبي ماتنطمــس
وأطري الحديث الأمس
يا ضل الغيم غشيتني أديتني الشمس


تقديري العميق لك ،،،،
واصل ماتنقطع ،،،،،،،،،،،،،،،

[علم]

شكرا لكم علي هذه المواد الرايعة فللطمبور اشكال عديدة وتختلط تسمية الجابودي والعطوي عند البعض ولدي نماذج فديو لثلاثة انواع مختلفة للطمبور اسعي لاضافتها بالموقع

[مهدي]

مع تقديري و اندهاشي لتلك الجماليات
تحياتي..



اخوك..

[علم]

ايام الضيق بولن
والحادثات بتلن
يا خير ابوك خلي القرب يتبلن

ايام الضيق بزلن
وعقب الحسرات بقلن
ياضو ابوك خلي القرب ينبلن

[علم]

الفوق البير مو ابوي
والوراد مو اخوي
مو دين قروش يامولا دايرا مويا

[علم]

لك التحية صلاح بعشوم ودالعمدة.
لدي تسجيلات صوت وفديو للرائع السائح ودحمد اسعي لاضافتها بالموقع

[محمد الحاج]

مي زرقا كنيكيجة ومي حمرا هريريجة
عسلية الرقدن سيجة والخلت عقلي دهيجة
***
مي زرقا خويدم نار ومابتجيب غلط الجار
عسلية الرقدن زنهار والخلتني ابيض فوق نار
***
فرع القرض الكابي والتحتو بيكر الدابي
انا جنيت يا اصحابي من ام سنا قصابي

[علم]

السايح ود حمد وابداعاته علي شبكة الجعليين

[حسين عثمان أبكر]

إ مبدعين يا شباب ،
وياريت واحد يعمل مقارنة بين شعر الجاودي والموشحات الأندلسية فهناك تشابه بين النمطين
لتعم الفائدة

[علم]

كما وعدتكم فقد رفعت ملف السايح ود حمد علي اليوتيوت علي الرابط التالي http//www.youtube.comwatchv=2Cf9hLxUhQY
وجاري رفعه في المنتدي حاليا

[عبدالرحيمكو]

تسلموا على هذا الابداع وحا نحاول نشارك معاكم في هذا الفن الراقي

[عبدالعزيز عبدالماجد]

سلام عليكم جميعاً ..
وشكراً صديقي سيف كلي وبقية المتداخلين ..على الحديث عن الجابودي ..

لو لاحظنا لدوبيت الجابودي ..نجده يختلف من الدوبيت العادي ..
فهو مبني على ثلاثة بيوت ..البيتين الأول والثاني يكون متوسط كل بيت حوالي كلمتين الى ثلاثة كلمات تقريباً..
أما البيت الأخير فيكون طويلاً ممتداً لخمس كلمات تقريباً وهو متوسط عدد كلمات بيت الدوبيت العادي (*) ..
مثلاً:
بطلع فوق السارة
بعاين لي القُطارة
الســارية إن جات ..بديكم البُشارة
بالطبع اللحن والإيقاع هو الذي يحكم هذا البناء ..لذلك نجد هذا التكوين يخدم
لحن الجابودي وإيقاعه الموزون ..
وكما ذكر أخونا سيف كلي فمُغني فرقة طمبارة الجابودي ..المغني يقوم بأداء الدوبيت أولاً في شكل (رمية)..فيبدأ بالبيتين الأوائل
ثم البيت الثالث الطويل والذي مع نهايته يتيح لمجموعة الطمبارة عبر اللحن الدخول في الإيقاع والصفقة مع الحمحمة..
ثم يواصل ترديد البيت الثالث بطريقة متكررة ..مع الإيقاع واللحن ..وهو يتابع صف الطمبارة ..
فتتواصل الرقصة و(المشي والجية) ..ثم يبدأون من جديد عبر الدوبيت والرمية مرة اخرى.

وهذه الملاحظة تبينتها من خلال لون الجابودي الذي شاهدته او قل عايشته في تلك المناطق..



--------------------------
(*) حسب ما لاحظته أن دوبيت مناطق الجعليين والذي لا
يفرق كثيراً عن دوبيت أهل البطانة إلا بالمفردة واللحن أيضاً ..
وإختلاف المفردة يتوقف على البيئة الخاصة بكل منطقة ..وبيئة كل مغني أو شاعر هي التي تحكمه..
فالدوبيت العادي كل شطرة من شطراته الأربع ..تتكون من خمسة الى ستة كلمات تقريباً..
وهي بهذا العدد تخدم لحن الدوبيت مهما كان زمن موسيقاه..

(وبالرجوع الى مكتبة منتدى دار جعل الصوتية..وهي مكتبة عامرة حقيقة) نجد أن الألحان مهما تعددت وإختلفت من فنان لآخر
لكنها ترتاح مع هذا العدد من الكلمات في كل بيت ..وبعض الاحيان وحسب ضرورة اللحن تزيد الكلمات او تنقص..
مثلاً الفنان عبد الرحيم الدامر في رمية أغنية (ليه يا دنيا) يقول:

فِيْ جَرحاً منوسِر ما لِقيتلو مضمّد
دا ما لان.. يسيل نامن براهو يجمّد
من السهمو ضارب في القلِب مِتعمّد
تنوم السُقدة..كان عيني تنوم وتغمّد

نلاحظ بناء هذه الدوبيتة يبدو منتظماً بشكل جيد..وكل أبياته تبدو متساوية من حيث عدد الكلمات..

اما الفنان عمر الحواري في رمية أغنية (طاهر العمامة) :

الليلة موية عيونك ناقعة
وأنقع من المنَّقع في مناقع الناقعة
الليلة ما جات تِتهبش قُبّال تعرف الواقعة
وكت بسمت معاك جانا براق ..خُفنا من الصاقعة

او في دوبيتة اخرى يقول:

الليلة إسمك سيدة ..وإنتي السيدة وذاتك سيدة ..ست الجمال والروقة
سمحة و زينة عاجباني الضفاير فوقا
جرّت نغمِك ذكّرني القُمري المِسجِّع قوقا
وطّتني اللهِيب غير أدرا قاعِد فوقا

نجد رغم أن عدد الكلمات في بعض الأحيان يزيد ولكن عن طريق اللحن وطريقة الأداء (وحالة الطرب) تجعل من هذين النموذجين عند عمر أكثر إنتظاماً وسلاسة..

المبدع البشرى جاد السيد في رمية أغنية ( الكي كدي) يقول:

يا أخواني المعاي ..انا حالتي ما بتدرُوبا
وأنا طوّل خلاس من جلوس أم رُوبة
دا الخلاني زي شاعر حَسن في النوبة
وكل اسبابي من مدني ونوايح سوبا

وللبشرى ..بعض المعالجة اللحنية الخاصة فمرات يقول :
يا البشرى أخوي ..انا حالتي ما بتدروبا
او
قول للبشرى أخوي ..انا حالتي ما بتدروبا
او
الليلة..انا حالتي ما بتدروبا

فتارة تزيد الكلمات وتارة تنقص بحسب ما يقتضيه موضوع الدوبيتة..

وكل هذه الملاحظات في رأي الخاص انها إشارات تدل على مدى إبداع هؤلاء الفنانين ..ومعهم شعراء هذا الأدب التراثي ..
الجميل بلغته والعامر بالصور والمشاهد..


لابد ان أذكر ان الفنان علي إبراهيم اللحو.. له ايضاً طريقة جميلة في "تقعيد" كلام الدوبيت بطريقة أكثر طرباً..
طريقة تخدم إيقاع أغانيه وبالذات المربوطة بالتراث -وهو إبن تلك البيئة- وبإستخدام موسيقاه الخاصة ..
ما أجمله عندما "يقوقي" ويغني رميته:

تجيك بي مَهل ..والفلَجة لما تشوفا
عنقاً باهي ..مخرُوتة ومضمّر جوفا
تقول مُهرة سَبَق..متحضِّرة ومكلوفة
قلبي الكان صميم ..جابتلُو فرّة وخوفة


في رأيي الشخصي أن الفن عندما يجد تراثاً يستند عليه..فذلك يمنحه كثير من الصدق وكثير من الجمال..



لكم خالص التحايا


وأقعدوا عافية ..

[سيف كلي]

صديقي ود عبد الماجد (قيسان) صاحب البنبر الكبير في خيمة الحاردلو ..
عارف الزول إن شرك ليك في جنس التقي دي بقبضك ..
زمان أهلنا قالوا (الطير بشركوا ليهو قبل جناهو) ههييي

وينك يا صاحبي ..
والله سائل عليك وفتشت ليك عشان اديك الشرايط بس الغربة ومشاغلها ..
للمواصلة 0506991002

[عبدالعزيز عبدالماجد]

سيف كلي ..أخونا وصاحبنا ..
الله يسلمك ياخي ..

وأكيد بتلقاني جنبك طول ما الحكايا فيها نم ..ونقرة شتم :)


تحياتي لمن هم بطرفك..
ولحدي ما نتلاقى..
سلام

[بت الباوقه]

فوووووووووق
لعشاق الدوبيت

[ودالمحجوب]

اسأل الله لك العافيه الاخ سيف والاخوه المشاركين علي الروعه والذكريات التي افتقدناه مع زحمه الحياه.. ونرجو المزيد

[ابوامامة]

مشكورين يا شباب على هذا الابداع ونحن فى انتظار المزيد

[قوار]

تسلم إيدك سيف كلي
لك الشكر ولكل من ساهم في إثراء هذا البوست المميز

مع مودتي؛؛؛

[شنتير]

مشاركة بسيطة يا شباب
===========================

زمامي رايح مني
جيب لي خبير طمني
يا يمة نشل العد ... في غيابو تب محني

كور الدباس الطاير
قول ليهو عيشك باير
يا ناظر القبيلة ... جيب لي زولي الساير

روحي انتلت هبودة
خداري النشف بالبودة
يا اخواتي ما تناغمني ... ناقة اب سبيب مشدودة

قلبي العليهو بهاتي
قصيبة الخدارو مشاتي
لبينة عشاي المنو ... ما ورعني اخواتي