حسدوك ,,, نص شعري

[محمد محبوب]

حسدوك

كل الدروب الماشة ليك
قسوها يا عيني أنا
ظلموك ما راعوني فيك
حرموك من الدرتو ليك
شرقوني ما ضقت الغرام
صدوني عن دربي البجيك
**
كل الدروب الماشة ليك
قسوها يا عيني أنا
كل الأماني الزين بقت
في قلبي آهات محزنة
و أنا في محطات عودتك
راجيك لي من كم سنة
تسمح ظروفك و التقيك
و لو مرة يتحقق مني
**
حسدوك يا أجمل غرام
يا أحلي قصة حب و ريد
يا الكنت لي دوحة فرح
يا الكنت في العشاق فريد
يا من عشقتك و همت بيك
و حبي ليك كل يوم بزيد
لما فارقتك و رحت
لا فرحة جات لا هل عيد
**
ما عارف أبكيك في الحروف
و لا بآهة و نغم
و لا أرسم لعيونك
لوحة بتقطر ألم
لو كل كلمات الحزن
خطوها ما تكفي الندم
كيف انت يحويك الكلام؟
و انت الحضور و انت العدم
**
د. محمد حسن محبوب
18/11/2008

[السليماني]

لك التحية شاعرنا المحبوب . . . وكلمات رائعه . . . من شخص رائع

[محمد محبوب]

بقدر روعتك أحييك أخي السليماني,

أنت دائما تقف علي أبواب سرادق الفرح فتضفي علي الفرح فرحا,,,,


تحياتي

[بت عكاشة]

ما اروعك شاعرنا الكبير

وما اروع كلماتك

[الفنجرية]

الاخ محمد محبوب ,,,,,,,,

فعلا انت الحضور وأنت العدم

مشكووووووووووور علي الروعه