سوماج
31-10-2005, 11:48 AM
راجع للبيت القديم
أنا ماشى راجع للبلد تفتح لى أدق أو ما أدق
من غير تقول الزول منو ولا حتى الداعى خير
لا مالك الجابك شنو
لى بيوت بجيلهن فى أى يوم
إن جيتا ليل أو جيت دغش طوالى أدفر الباب واخش
مرات أضيق قاصر الطريق من بيت لبيت
وفى بيتنا كربش زى نسيمة معدى شيمة
لا أوش ولا أكش
خابرانى كلوب الفريق زولاً رفيق الليل ووناس الدغش
لا قطعت نوم النايمين لا البارى للحيشان تقش
عند شوفتى تجرى على هدم فى محلها الشوق يترسم
تنجهنى حتان بالإسم تندهنى عقبان تبتسم
بسمة بنيات ناس غبش
هادى المخاليق مؤمنا كم تأمنك يوم تأمنا
ولا فرق بين الضيف وأنا غير كليمة ملونة
بالإلفة هليج اعتنا
هادى البيوت وطمنا
ودايماً قريبة من البعيد زى مو غريبة على الدنا
ماها المريبة وما بتكيد مفتوحة طيبة محاننه
زولاً يجيها فى كل فجر وللا إن يتم كمين سنة
تتلقى زى أم الجنا وترشع سحابات المنى
بالصحة بالعز بالهنا
ينجيك من أولاد الحرام يحفظك يغتيك ربنا
هادى البيوت ما بتتلخم فى الحكوة مابتنضم كتر
لاها البتتصنع نضم
شايلة الفصاحة من الطيور اليوت تغنى على التمر
ونور المهابة من النجم مطعوم سكاتها من الصبر
بينا وحروف الأمنيات الطيبة ألف صلة رحم
على رغم آفات الزمن .. الصرمة .. حافات الفقر
وحش المقادير النهم سيل المباهاة المدلهم
نبرو المواعيظ الجهم من ناس كتر
عن قصة النار والقبر فى وضع اضيق من جحر
والناس لو خارجين لو كفر ...
هادى السمره ست الضراعات الخضر
عارفاهو من وين جاء الفقر والحال سجم
يا حكمتا الزى كلمتا المن خدمتا
واطاته واحدة وفد هدم
آيه غفير فوق الحفير حقانى قلبو على الخدير
حيكومتا ماها البتتكلف ستر
مستورة خلقة ودا المهم مفتوحة لكل البشر
من طينها بس كل البسيماتن تبق
لو وش زماناتن عبس مفتوحة قلباً كلو خير
شايل حمالتو بلا جرس مفتوحة كالفضا للطيور
وبيوضه للصيد والدبس لا طبلة لا كيلون سويتش
لا غفير تفاوضو ولا حرس لا كلاب تشمك شم جراب
لا آه لا سب.....
وناس ستى نور كتلو الكلب
كتلوهو مجبورين غصب ما من نياحتو ولا سعر
ظنو الكلب بين الفريق حامى البطينين اللعب
آخر الليالى من البيوت قافل الطريق سادى الدرب
لأخواتها قالت ستى نور مادام فى أمان والناس بخير
سعى الكلاب فى الحلة شر هوهيوا بعزاق للأجر
أحسن تعيش بى راحتها تمشي الجناين .. يالبحر
إن كان تطفش للصبار واب عفنة تشغل للورر
الحلة يكفيها الولاد .. يكفى البهيمات .. الجداد
يكفى الطيور الفى الشدر
الحلة يكفيها البشر كان جاها شر
الحلة يكفيها الحصانة الفيها مادارت كجر
حرس الزرائب شن فضل فطن الزرائب غير بعر
صنت شويتين ستى نور
شالت حجر جدعت حجر جدعت حجر شالت حجر
وقالت : قرايبها ذات ليل يمكن يجوها من السفر
أو زول غريب حاربو الدليل
عابر سبيل زنقو المطر يقصد رواكيبهم جور
أول شيئ يتلقى الكلب اللا بيرحب لا بيبش
وليشن يتورانا الكلب وليش الكلب يبقالن وش ؟
وكان الكلب لازم يموت شان المحبة الفى القلوب تحيا
وخيوط زمن الوصال لا تنسلب لا تنقلب
ومات الكلب ......
وين يا بيوت عز البرد ضمتنا كونية دفى
ومن لدغة الصيف الغريب قامت حواية همبريب
وتحت القمر حيشانا قيزان السمر
تدينا لا من نكتفى
يا بيوت من الخاطر قراب ورهاب رهاب تختفى
الإعتذارات ما بتفى وجيت ما لقيتكم ماهى فى
أبوابنا مو صاجات حديد يغسل درابزينا الرزاز
حيطانا مو اسمنت وحجر شباكنا لا سيخ لا قزاز
يا ضو جماعاتا عزاز
زى مالك بشر ما منو شر لزم الخشم باب مااندفر
قص الدقل تلقى الكشر
يا شيل حطيبة من الارض لاخوف ولفيت لاحذر
لى كلبة الباب أبقى هاز مفتاحنا مو اكتر من كشر
ما أبوابنا من شدر الحراز
والحيطة اقصر من وصا قالوها عن ساعة السفر
وكان القطر قام صوتو راز
البيت دا بيتك يا حبيب أدخل مخير وماك غريب
اتمدا فى اقرب عنقريب مبهول فى حوضو الهمبريب
النيمة يا العنابة ضل أغشى التكل
خرمان فى شاى صيعان أكل وداك التمر
والزير قريب بايت من البارح ملان
راقد فى صدر الهمبريب
در تقرأ ديك كتب الولاد ... قلقت أو طال الرجى
كورك نقولك هوى بعاد رسل لنا المرسال نجى
ياروق بإحساس المحب سيد بيت وعننا ما ضهب
الهيلنا هيلك شن ندس .. ماطال عمراً يتحسب
فى ياتو بنك وياتو عب يات خزنة
غير خزن النفوس الماهلة مفتاحها القلب
قول لابن آدم فى بلد طالت معاناتو وتعب
سكانو دايشين بالشرق وحكامو طاشين بالغرب
إحنا اللى فاقدين أى شئ فى الدنيا مالكين كل شئ
بالفينا بالحيل ودا الدرب والتابع الصاح ما ضهب
شن الأفندية الكبار خدم المرابين التجار
حشم المبارين الكجار الأرزقية .. كضب .. كضب
نحنا التعابى آل باختيار صرمتنا ترتاح الديار
ينجم بال بلداً تعب نحن الغلابة اكبر حزن
لا بنغلب ولا بنقلب والتابع الصاح ماضهب .
أنا ماشى راجع للبلد تفتح لى أدق أو ما أدق
من غير تقول الزول منو ولا حتى الداعى خير
لا مالك الجابك شنو
لى بيوت بجيلهن فى أى يوم
إن جيتا ليل أو جيت دغش طوالى أدفر الباب واخش
مرات أضيق قاصر الطريق من بيت لبيت
وفى بيتنا كربش زى نسيمة معدى شيمة
لا أوش ولا أكش
خابرانى كلوب الفريق زولاً رفيق الليل ووناس الدغش
لا قطعت نوم النايمين لا البارى للحيشان تقش
عند شوفتى تجرى على هدم فى محلها الشوق يترسم
تنجهنى حتان بالإسم تندهنى عقبان تبتسم
بسمة بنيات ناس غبش
هادى المخاليق مؤمنا كم تأمنك يوم تأمنا
ولا فرق بين الضيف وأنا غير كليمة ملونة
بالإلفة هليج اعتنا
هادى البيوت وطمنا
ودايماً قريبة من البعيد زى مو غريبة على الدنا
ماها المريبة وما بتكيد مفتوحة طيبة محاننه
زولاً يجيها فى كل فجر وللا إن يتم كمين سنة
تتلقى زى أم الجنا وترشع سحابات المنى
بالصحة بالعز بالهنا
ينجيك من أولاد الحرام يحفظك يغتيك ربنا
هادى البيوت ما بتتلخم فى الحكوة مابتنضم كتر
لاها البتتصنع نضم
شايلة الفصاحة من الطيور اليوت تغنى على التمر
ونور المهابة من النجم مطعوم سكاتها من الصبر
بينا وحروف الأمنيات الطيبة ألف صلة رحم
على رغم آفات الزمن .. الصرمة .. حافات الفقر
وحش المقادير النهم سيل المباهاة المدلهم
نبرو المواعيظ الجهم من ناس كتر
عن قصة النار والقبر فى وضع اضيق من جحر
والناس لو خارجين لو كفر ...
هادى السمره ست الضراعات الخضر
عارفاهو من وين جاء الفقر والحال سجم
يا حكمتا الزى كلمتا المن خدمتا
واطاته واحدة وفد هدم
آيه غفير فوق الحفير حقانى قلبو على الخدير
حيكومتا ماها البتتكلف ستر
مستورة خلقة ودا المهم مفتوحة لكل البشر
من طينها بس كل البسيماتن تبق
لو وش زماناتن عبس مفتوحة قلباً كلو خير
شايل حمالتو بلا جرس مفتوحة كالفضا للطيور
وبيوضه للصيد والدبس لا طبلة لا كيلون سويتش
لا غفير تفاوضو ولا حرس لا كلاب تشمك شم جراب
لا آه لا سب.....
وناس ستى نور كتلو الكلب
كتلوهو مجبورين غصب ما من نياحتو ولا سعر
ظنو الكلب بين الفريق حامى البطينين اللعب
آخر الليالى من البيوت قافل الطريق سادى الدرب
لأخواتها قالت ستى نور مادام فى أمان والناس بخير
سعى الكلاب فى الحلة شر هوهيوا بعزاق للأجر
أحسن تعيش بى راحتها تمشي الجناين .. يالبحر
إن كان تطفش للصبار واب عفنة تشغل للورر
الحلة يكفيها الولاد .. يكفى البهيمات .. الجداد
يكفى الطيور الفى الشدر
الحلة يكفيها البشر كان جاها شر
الحلة يكفيها الحصانة الفيها مادارت كجر
حرس الزرائب شن فضل فطن الزرائب غير بعر
صنت شويتين ستى نور
شالت حجر جدعت حجر جدعت حجر شالت حجر
وقالت : قرايبها ذات ليل يمكن يجوها من السفر
أو زول غريب حاربو الدليل
عابر سبيل زنقو المطر يقصد رواكيبهم جور
أول شيئ يتلقى الكلب اللا بيرحب لا بيبش
وليشن يتورانا الكلب وليش الكلب يبقالن وش ؟
وكان الكلب لازم يموت شان المحبة الفى القلوب تحيا
وخيوط زمن الوصال لا تنسلب لا تنقلب
ومات الكلب ......
وين يا بيوت عز البرد ضمتنا كونية دفى
ومن لدغة الصيف الغريب قامت حواية همبريب
وتحت القمر حيشانا قيزان السمر
تدينا لا من نكتفى
يا بيوت من الخاطر قراب ورهاب رهاب تختفى
الإعتذارات ما بتفى وجيت ما لقيتكم ماهى فى
أبوابنا مو صاجات حديد يغسل درابزينا الرزاز
حيطانا مو اسمنت وحجر شباكنا لا سيخ لا قزاز
يا ضو جماعاتا عزاز
زى مالك بشر ما منو شر لزم الخشم باب مااندفر
قص الدقل تلقى الكشر
يا شيل حطيبة من الارض لاخوف ولفيت لاحذر
لى كلبة الباب أبقى هاز مفتاحنا مو اكتر من كشر
ما أبوابنا من شدر الحراز
والحيطة اقصر من وصا قالوها عن ساعة السفر
وكان القطر قام صوتو راز
البيت دا بيتك يا حبيب أدخل مخير وماك غريب
اتمدا فى اقرب عنقريب مبهول فى حوضو الهمبريب
النيمة يا العنابة ضل أغشى التكل
خرمان فى شاى صيعان أكل وداك التمر
والزير قريب بايت من البارح ملان
راقد فى صدر الهمبريب
در تقرأ ديك كتب الولاد ... قلقت أو طال الرجى
كورك نقولك هوى بعاد رسل لنا المرسال نجى
ياروق بإحساس المحب سيد بيت وعننا ما ضهب
الهيلنا هيلك شن ندس .. ماطال عمراً يتحسب
فى ياتو بنك وياتو عب يات خزنة
غير خزن النفوس الماهلة مفتاحها القلب
قول لابن آدم فى بلد طالت معاناتو وتعب
سكانو دايشين بالشرق وحكامو طاشين بالغرب
إحنا اللى فاقدين أى شئ فى الدنيا مالكين كل شئ
بالفينا بالحيل ودا الدرب والتابع الصاح ما ضهب
شن الأفندية الكبار خدم المرابين التجار
حشم المبارين الكجار الأرزقية .. كضب .. كضب
نحنا التعابى آل باختيار صرمتنا ترتاح الديار
ينجم بال بلداً تعب نحن الغلابة اكبر حزن
لا بنغلب ولا بنقلب والتابع الصاح ماضهب .